Vikachitika Chifukwa cha Kumwemwetera Waka!

ZUŴA linyake ŵasungwana ŵaŵiri ŵakendanga lumoza mu msumba wa Baguio ku Philippines. Ŵakawona kashelufu ka matayala, kweni ŵakalutapo yayi. Mudumbu Helen uyo wakimilira pafupi na kashelufu aka, wakamwemwetera chomene apo ŵasungwana aŵa ŵakajumphanga. Nangauli ŵakajumpha waka kweni ŵakaluwa yayi umo Helen wakamwemweteleranga kweniso kuwoneka mwaubwezi.

Pamanyuma, apo ŵasungwana aŵa ŵakaŵa mu basi kuwelera kunyumba kwawo, ŵakawona Nyumba ya Ufumu apo pakaŵa chikhwangwani chikuru chakulembeka kuti jw.org. Ŵakakumbukira kuti mazgu agha ndigho ŵangughawonaso pa kashelufu kamatayala. Mbwenu ŵakakhira basi na kuluta pa Nyumba ya Ufumu na kukawona nyengo iyo maungano gha mpingo ghakuchitikira pa holo iyi.

Ŵasungwana aŵa ŵakiza ku maungano ghakulondezgapo. Ŵati ŵanjira waka mu Nyumba ya Ufumu, ŵakazizwa kuwona Helen. Nyengo yeneyiyo ŵakakumbuka kuti ni msungwana uyo wakaŵamwemwetelera chomene. Helen wakuti: “Apo ŵakizanga kwa ine, nkhafipa mtima, nkhawonanga nga nanangiska chinthu chinyake.” Kweni ŵasungwana aŵa ŵakamuphalira Helen kuti ŵali kumuwonapo kale pa kashelufu ka matayala.

Ŵasungwana aŵa ŵakakondwa chomene na maungano kweniso kuchezga mwakufwatuka na ŵabali na ŵadumbu. Ndipo ŵakati ŵawona kuti ŵanji ŵakunozga holo maungano ghati ghamara, ŵakapempha kuti nawo ŵawovwirepo. Yumoza mwa ŵasungwana aŵa wali kufumako ku Philippines, kweni munyake uyo wachali kwenekuku, wakuluta ku maungano, kweniso wali kwamba kusambira Baibolo. Vyose ivi vikachitika chifukwa cha kumwemwetera waka.