NKHANI YAKULONGOSORA UMOYO WA MUNTHU
“Sono Nkhutemwa Chomene Kupharazga!”
NKHAKULIRA mu tawuni ya Balclutha, iyo yili pa chirwa chakumwera kwa charu cha New Zealand. Apo nkhaŵa mwana muchoko, nkhamutemwanga chomene Yehova ndipo nkhakondwanga kuŵa Kaboni wa Yehova. Nkhatemwanga chomene kuwungana. Para nili ku mpingo nkhawonanga kuti nili wakuvikilirika kweniso nkhaŵanga wakukondwa. Nangauli mwakawiro nkhaŵa wasoni, kweni nkhakondwanga chomene kupharazga sabata yiliyose. Nkhawopanga yayi kupharazgirako ŵanyane ku sukulu na ŵanthu ŵanyake. Nkhakondwanga chomene kumanyikwa kuti ndine Kaboni wa Yehova, ndipo apo nkhaŵa na vyaka 11, nkhajipeleka kwa Chiuta.
NKHALEKA KUKONDWA
Chachitima ntchakuti apo nkhaŵa na vyaka pafupifupi 13, ubwezi wane na Yehova ukawelera nyuma. Ŵanyane ku sukulu ŵakawonekanga kuti ŵali na wanangwa unandi, ndipo nkhaŵadokeranga chomene. Nkhawonanga kuti malango gha ŵapapi ŵane kweniso fundo Zachikhristu izo tikwendera ni zakufyenya chomene, ndipo nkhawonanga kuti kusopa Yehova ntchintchito chamaseŵera cha! Nangauli nkhagomezganga kuti Yehova waliko, kweni nkhamba kuwona kuti ni bwezi wane yayi.
Nangauli nkhalekerathu yayi kupharazga, kweni nkhamba kupharazga mwa apo na apo.Para namupharazga, nkhanozgekeranga yayi, ntheura vikanisuzganga chomene kwamba kuyowoya na munthu, kweniso nkhadumbiskananga nayo kwanyengo yichoko chomene. Pa chifukwa ichi nkhaŵavya maulendo ghakuwelerako panji masambiro gha Baibolo ndipo kupharazga kukaninozgerangaso yayi. Ivi vikanipangiska kuti nileke kutemwa upharazgi. Ntheura nkhajifumbanga kuti, ‘Kasi wamunthu ungafiska kupharazga sabata yiliyose kweniso mwezi uliwose?’
Nkhati nakwaniska vyaka 17, nkhakhumbanga chomene kuti nijiyimire pandekha. Ntheura zuŵa linyake nkhapakira waka tunthu twane, na kufumapo panyumba, ndipo nkhaluta ku Australia. Ŵapapi ŵane ŵakadandawura chomene nati nafumapo. Iwo ŵakanifipiranga mtima chomene, kweni ŵakaghanaghananga kuti namulutilira kuchita makora mwauzimu.
Ku Australia, umoyo wane wauzimu ukanjira pasi chomene. Kanandi nkhalutanga yayi ku maungano. Nkhasanga mabwezi agho nagho ghakalutanga ku maungano gha namise, ndipo pakuwera tikalutanga ku malo ghavikondwelero kuti tikamwe na kukavina. Para nkhughanaghanira umo umoyo wane ukaŵira, nkhuwona kuti nkhachitanga vinthu viŵiri nyengo yimoza, vya Chiuta na vya charu, kweni kose nkhakondwanga yayi.
CHINTHU CHAKUZIRWA CHOMENE ICHO NKHAKHAZGANGA YAYI CHIKACHITIKA
Pakati pajumpha vyaka viŵiri, nkhakumana na mudumbu munyake uyo wakanipangiska kuti nighanaghanirepo chomene nkharo yane nangauli iyo wakamanya yayi. Nkhakhalanga na ŵadumbu ŵanyane 5 ŵambura kutengwa. Nyengo yinyake tikapempha mulaŵiliri wadera na muwoli wake Tamara, kuti ŵazakafikire kunyumba kwithu na kukhala nase kwa sabata yimoza. Apo mulaŵiliri wadera wakachitanga milimo ya mpingo, muwoli wake wakakhalanga na ise ndipo tikachezganga na kuseka. Ivi vikanikondweska chomene. Wakaŵa wakujiyuyura chomene kweniso wakufwatuka. Nkhazizwa chomene kuti munthu wauzimu nga ni Tamara wangaŵa wakutemwa kuseka nthena.
Tamara wakalimbikiranga chomene uteŵeti wake. Ŵanthu ŵanyake ŵakamba kutemwa unenesko kweniso kulimbikira kupharazga chifukwa cha kuwona umo wakachitiranga. Iyo wakaŵa wakukondwa chifukwa wakalimbikiranga chomene kuteŵetera Yehova, apo ine nkhakondwanga yayi chifukwa nkhachitanga na mtima wose yayi. Vikanikhwaska chomene kuwona umo iyo wakakondweranga kweniso umo wakawoneranga vinthu. Umo iyo wakachitiranga vinthu, vikanovwira kughanaghanirapo fundo yakuzirwa chomene yakuti: Yehova wakukhumba kuti tose timuteŵeterenge “na kusekelera” kweniso “na kuchemerezga mwachimwemwe.”—Sal. 100:2.
UMO NKHAMBIRASO KUTEMWA KUPHARAZGA
Nkhakhumbanga kuti nane nikondwenge nga ni Tamara, kweni kuti ivi vichitike, nkhakhumbikwiranga kusintha nkharo yane. Pakatora vyaka pafupifupi vitatu kuti nisinthe nkharo yane, ndipo vikachitikanga pachokopachoko. Nkhamba kunozgekera upharazgi kweniso nkhachitangako upayiniya wakanyengo pafupipafupi. Ivi vikanovwira chomene kuti nichepeske wofi pakupharazga. Upharazgi ukamba kuninozgera chomene chifukwa chakuti nkhamba kugwiliskira ntchito chomene Baibolo pakupharazgira ŵanthu. Pamanyuma mwezi uliwose nkhamba kuchita upayiniya wakanyengo.
Nkhamba kusanga mabwezi ghakupambanapambana, ŵana na ŵalara wuwo, awo ŵakatemwanga unenesko kweniso ŵakakondwanga pakuteŵetera Yehova. Chiyelezgero chawo chiwemi chikanovwira kuti nighanaghanirepo ivyo nkhwenera kuŵika pakwamba mu umoyo, ndipo paumaliro nkhamba kuŵerenga Baibolo zuŵa lililose. Nkhamba kukondwa chomene na upharazgi, ndipo paumaliro nkhamba upayiniya wanyengozose. Aka kakaŵa kakwamba pa umoyo wane kuŵa wakukondwa chomene na kuchita vinthu mwakufwatuka mu mpingo pati pajumpha vyaka vinandi.
NKHASANGA MUPAYINIYA MUNYANE WAPAMTIMA
Pakati pajumpha chaka chimoza, nkhakumana na Alex. Iyo wakaŵa walusungu kweniso wakatemwanga chomene Yehova na upharazgi. Wakaŵa muteŵeti wakovwira kweniso wakaŵa kuti wachita upayiniya kwa vyaka 6. Alex wakaŵa kuti wachitaposo uteŵeti ku Malaŵi kwakanyengo, uko kukakhumbikwanga ŵapharazgi ŵanandi. Apo wakaŵa ku Malaŵi, wakasangana na ŵamishonale awo ŵakamovwira chomene mwauzimu ndipo ŵakamukhozga kuti walutilire kuŵika vinthu vya Ufumu pa malo ghakwamba.
Ine na Alex tikatorana mu 2003, ndipo tichali kuchita uteŵeti wanyengozose. Tasambira vinthu vinandi chomene ndipo Yehova watitumbika munthowa zinandi.
YEHOVA WAKATITUMBIKASO MU NTHOWA YINYAKE
Tikupharazga ku Gleno, Timor-Leste
Mu 2009, ŵakatituma kuti tikachite umishonale ku Timor-Leste, kacharu kachoko ako kakusangika ku chirwa cha Indonesian. Tikazizwa chomene, tikakondwa kweniso panyengo yimoza tikawopangaso. Pakati pajumpha myezi yinkhondi, tikafika mu msumba wa Dili.
Tikeneranga kusintha vinthu vinandi chomene pa umoyo withu. Tikeneranga kusambira mitheto yawo, chiyowoyero, chakurya, kweniso umo ŵakukhalira. Para taluta kukapharazga, kanandi tikakumananga na ŵanthu awo ŵakaŵa ŵakavu chomene, ŵanyake ŵakamanyanga yayi kuŵerenga, ndipo ŵanyake ŵakaŵachitiranga nkhaza. Kweniso tikawonanga ŵanthu ŵanandi awo ŵakasuzgikanga maghanoghano kweniso ŵakaŵa ŵakupwetekeka chifukwa cha nkhondo na viwawa.a
Uteŵeti ukanozganga chomene. Mwachiyelezgero, nyengo yinyake nkhakumana na msungwana munyake wa vyaka 13, zina lake Maria,b ndipo wakaŵa na chitima. Apo tikakumananga, pakaŵa kuti pajumpha vyaka vichoko waka kufuma apo amama ŵake ŵakafwira, ndipo adada ŵake wakaŵawonanga mwapatalipatali. Nga umo vikuŵira na ŵana ŵanandi, Maria nayo wakamanyanga yayi icho wangachita pa umoyo wake. Nkhukumbuka nyengo yinyake apo wakaniphaliranga umo wakujipulikira uku wakulira. Kweni nkhapulikanga yayi ivyo wakayowoyanga chifukwa nkhachimanyanga yayi chiyowoyero chake. Nkhalomba kwa Yehova kuti wanovwire kuti nimukhozge, ndipo pamanyuma nkhamba kumuŵerengera malemba ghakukhozga. Pakati pajumpha vyaka vichoko waka, nkhawona kuti unenesko ukasintha umo Maria wakachitiranga vinthu, umo wakawonekeranga, kweniso umoyo wake wose. Wakabatizika ndipo sono nayo wali na masambiro gha Baibolo. Mazuŵa ghano, Maria wali na mbumba yikuru yauzimu ndipo sono wakuwona kuti wakutemweka.
Yehova wakutumbika mulimo wakupharazga ku Timor-Leste. Nangauli ŵapharazgi ŵanandi ŵabatizika mu vyaka 10 ivyo vyajumpha, kweni pasono ŵanandi mbapayiniya, ŵateŵeti ŵakovwira panji ŵalara mu mpingo. Ŵanyake ŵakuteŵetera pa ofesi yakung’anamulirako mabuku mu chiyowoyero chawo ndipo ŵakovwirapo pa mulimo uwu. Nkhakondwanga chomene para nkhapulikanga umo ŵakimbiranga sumu pa maungano, umo ŵakawonekeranga ŵakukondwa, kweniso umo ŵakakuliranga mwauzimu.
Nili na Alex, tikuluta ku chigaŵa icho kukupharazgika viŵi yayi kuti tikagaŵire tumapepara twakuchemera ŵanthu ku Chikumbusko
NKHAMANYANGA YAYI KUTI NINGAŴA WAKUKONDWA NTHENA
Umo tikakhaliranga ku Timor-Leste vikapambananga chomene na umo tikhaliranga ku Australia, kweni tikakondwanga chomene. Nyengo zinyake tikakweranga minibasi iyo tikakhomanangamo taŵanandi kweniso yanyamura somba zakomira pamoza na mphangwe kufuma navyo ku msika. Mazuŵa ghanyake tikachitiskanga masambiro gha Baibolo mu tunyumba uto mukawotchanga chomene, kweniso pasi pali nakanaka, nkhuku nazo zikatidukangadukanga uku takhala pasi. Nangauli tikakumananga na masuzgo, kweni kanandi mu maghanoghano nkhatenge, ‘Uwu ndiwo mbumoyo na!’
Tili mu nthowa
Para nkhughanaghanira umoyo wane wa kumasinda, nkhuwonga chomene ŵapapi ŵane pakunisambizga nthowa za Yehova, na kunovwira nanga ni apo nkhaŵa panyengo yakusuzga chomene ya usungwana. Najiwonera nekha kuti lemba la Zintharika 22:6 likuneneska nadi. Adada na Amama ŵakunotha nase chomene ine na mfumu wane, Alex. Ŵakukondwa chomene para ŵakutiwona kuti tikuteŵetera Yehova. Kufuma mu 2016, ine na mfumu wane tikwendera dera mu chigaŵa icho chili pasi pa ofesi ya munthavi ya Australasia.
Tikulongora ŵana vidiyo ya Kalebi na Sofiya ku Timor-Leste ndipo mbakukondwa
Nkhugomezga yayi para nkhukumbuka kuti nyengo yinyake kumanyuma nkhakondwanga yayi na mulimo wa kupharazga. Sono nkhutemwa chomene kupharazga. Najiwonera nekha kuti nangauli nyengo zinyake ungakumana na masuzgo, kweni wamunthu ukuŵa wakukondwa zanadi pekha para ukuteŵetera Chiuta na mtima wose. Kuyowoya unenesko, vyaka 18 ivyo nateŵetera Yehova pamoza na mfumu wane Alex, vyaŵa vyakukondweska chomene pa umoyo wane. Sono namanya kuti mazgu agho wamasalimo Davide wakayowoya kwa Yehova ngaunenesko nadi. Iyo wakati: “Wose awo ŵakubisama mwa imwe ŵasekelerenge. Nyengo zose ŵachemerezgenge mwachimwemwe. . . . Ndipo awo ŵakutemwa zina linu ŵasekelerenge mwa imwe.”—Sal. 5:11.
Vikanozganga chomene kusambira Baibolo na ŵanthu ŵakujiyuyura aŵa!
a Kwamba waka mu 1975, mu charu cha Timor-Leste mukachitika nkhondo vyaka vyakujumpha 20 chifukwa ŵanthu ŵakakhumbanga kuti ŵajilamulirenge ŵekha.
b Zina lasinthika.