Kasi Nyengo Zose Mukugomezga Umo Yehova Wakuchitira Vinthu?

1-2. (a) Chifukwa wuli ŵanandi mazuŵa ghano chikuŵaŵira chakusuzga kugomezga awo ŵali na mazaza? (b) Kasi tiwonenge vichi mu nkhani iyi?

MAZUŴA ghano, ŵanandi chikuŵaŵira chakusuzga kugomezga ŵamazaza. Iwo ŵawona kuti maboma na malango kanandi ghakutemwera chomene ŵasambazi na ŵanthu awo ŵali na maudindo ghakuru, kweni ŵakavu ghakuŵawovwira chomene yayi. Lekani Baibolo likuti: “Munthu wakuwusa munyake na kumupweteka.” (Muph. 8:9) Kweniso ŵalongozgi ŵanyake ŵavisopa ŵakuchita vinthu viheni chomene, ndipo ivi vyapangiska ŵanthu ŵanyake kuleka kugomezga Chiuta. Ntheura para munthu wazomera kuti tisambirenge nayo Baibolo, tikwenera kumovwira kuti wasambire kugomezga mwa Yehova pamoza na awo wali kuŵimika pa charu chapasi.

² Mbunenesko kuti mbasambiri ŵa Baibolo pera yayi awo ŵakukhumbikwira kusambira kugomezga mwa Yehova na gulu lake. Nanga tingaŵa ise takhala mu unenesko vyaka vinandi, tikwenera yayi kutaya chigomezgo chithu chakuti nthowa izo Yehova wakugwiliskira ntchito pakuchita vinthu, nyengo zose ndizo zikuŵa ziwemi chomene. Nyengo zinyake pangachitika vinthu ivyo vingayezga chigomezgo chithu mwa Yehova. Mu nkhani iyi, tiwonenge vigaŵa vitatu apo chipulikano chithu chingayezgeka: (1) para tikuŵazga nkhani yinyake ya mu Baibolo, (2) para tapokera ulongozgi kufuma ku gulu la Yehova, ndiposo (3) para tazakasangana na masuzgo munthazi.

GOMEZGANI YEHOVA PARA MUKUŴERENGA BAIBOLO

3. Kasi nkhani zinyake za mu Baibolo zingatipangiska wuli kuti tambe kukayikira Yehova umo wakuchitira vinthu?

³ Para tikuŵerenga Mazgu gha Chiuta, nyengo zinyake tingaŵa na mafumbo ghakukhwaskana na umo Yehova wakachitira vinthu na ŵanthu ŵanyake kweniso chifukwa icho wakasankhira kuchita vinthu vinyake. Mwachiyelezgero, mu buku la Maŵazgo, tikuŵazga kuti Yehova wakalangura kuti Muisrayeli munyake wakomeke chifukwa chakuti wakathenya nkhuni pa Sabata. Apo mu buku lachiŵiri la Samuyeli, tikusambira kuti vyaka vinandi vyati vyajumphapo, Yehova wakagowokera Themba Davide lati lachita uleŵi na kukoma munthu. (Maŵa. 15:32, 35; 2 Sam. 12:9, 13) Nyengo zinyake tingajifumba kuti, ‘Chifukwa wuli Yehova wakagowokera Davide wati wakoma munthu na kuchita uleŵi, kweni wakalangura kuti munthu munyake wakomeke chifukwa chakuchita chinthu icho chikuwoneka kuti ni kwananga kukuru yayi?’ Kuti tizgore fumbo ili, tiyeni tiwone vinthu vitatu ivyo tikwenera kukumbuka para tikuŵerenga Baibolo.

4. Kasi malemba gha Genizesi 18:20, 21 na Dotoronome 10:17, ghakukhozga wuli chigomezgo chithu pa ivyo Yehova wakusankha?

⁴ Ni nyengo zose yayi apo Baibolo likuyowoya vyose ivyo vikachitika. Mwachiyelezgero, tikumanya kuti Davide wakapera kufumira pasi pamtima pa ivyo wakachita. (Sal. 51:2-4) Kweni kasi munthu uyo wakaswa dango la Sabata wakaŵa munthu wuli? Kasi chitima chikamukora chifukwa cha ivyo wakachita? Kasi kumanyuma wakaswapo malango gha Yehova? Kasi wakasulako panji na kukana wuwo machenjezgo agho wakapikapo kumanyuma? Baibolo likuyowoya yayi. Nangauli vili nthena, fundo yambura kususkika njakuti: Yehova ‘ngwambura ubendezi.’ (Doto. 32:4) Iyo pambere wandadumure ivyo wachitenge wakuŵa na maukaboni ghose, wakwendera vyakupulika waka yayi, panji sankho nesi vinthu vinyake ivyo kanandi vikupangiska ŵanthu kuwona vinthu mwambura kwenelera. (Ŵazgani Genizesi 18:20, 21; Dotoronome 10:17.) Para tikulutilira kusambira vinandi vya Yehova na fundo zake za urunji, ndipo tingapulikiska makora vyeruzgo vyake. Nanga nkhani yinyake ya mu Baibolo yingatipangiska kuti tiŵe na mafumbo ghambura mazgoro, kweni tikumanya vinandi vyakukhwaskana na Chiuta withu ivyo vikutikhorweska kuti “ni murunji mu nthowa zake zose.”—Sal. 145:17.

5. Kasi kuwura kufikapo kukutimbanizga wuli kuti munthu weruzge mwaurunji? (Wonani bokosi lakuti “Kuwura Kufikapo Kukutimbanizga Umo Tikuwonera Urunji.”)

⁵ Ni nyengo zose yayi apo ise tingeruzga mwaurunji chifukwa tili ŵambura kufikapo. Chiuta wali kutilenga mu chikozgo chake, lekani tikuŵa ŵakukhumbisiska kuwona kuti ŵanthu ŵakuchitirika vinthu mwaurunji. (Gen. 1:26) Kweni chifukwa chakuti ndise ŵambura kufikapo, tingeruzga mwambura urunji nanga tingaghanaghana kuti tili na maukaboni ghose. Mwachiyelezgero, kumbukani umo Yona wakajipulikira Yehova wati wasankha kulongora lusungu ŵanthu ŵa ku Nineve. (Yona 3:10–4:1) Kweni ghanaghanirani ivyo vikachitika chifukwa chakuti Yehova wakaŵalongora lusungu. Ŵanthu ŵakujumpha 120,000 awo ŵakapera mu Nineve ŵakathaskika. Paumaliro vikawoneka kuti Yona ndiyo wakaŵeruzga uheni ŵanthu, Yehova yayi.

6. Chifukwa wuli Yehova wakukhumbikwira kutilongosolera dankha yayi ivyo wasankha?

⁶ Yehova wakukhumbikwira kulongosolera ŵanthu yayi chifukwa icho wachitira chinthu chinyake. Mbunenesko kuti Yehova wakaŵapa mwaŵi ŵateŵeti ŵake kumasinda kuti ŵayowoyepo maghanoghano ghawo pa ivyo iyo wakasankha kuchita panji ivyo wakaŵa pafupi kuchita. (Gen. 18:25; Yona 4:2, 3) Ndipo nyengo zinyake wakalongosoranga chifukwa icho wachitira vinthu vinyake. (Yona 4:10, 11) Nangauli vili nthena, Yehova wakukhumbikwira kutilongosolera yayi vifukwa ivyo wasankhira kuchita chinthu chinyake. Pakuŵa Mlengi withu, iyo wakukhumbikwira kuti timuzomerezge dankha yayi para wakukhumba kuchita chinthu chinyake panji kuyowoyapo maghanoghano ghithu para wachita chinthu chinyake.—Yes. 40:13, 14; 55:9.

GOMEZGANI MWA YEHOVA PARA MWAPOKERA ULONGOZGI

7. Kasi ntchivichi chingatiŵira chakusuzga, ndipo chifukwa wuli?

⁷ Kwambura kukayika tose tikuzomerezga na mtima wose kuti nyengo zose Yehova wakuchita vinthu mwaurunji. Ndipouli, nyengo zinyake chingaŵa chakusuzga kugomezga ŵanalume ŵakwimikika awo wali kusankha pa charu chapasi. Tingamba kukayika usange awo ŵali na udindo mu gulu la Yehova ŵakuchita vinthu kuyana na ulongozgi wa Yehova panji wawo. Maghanoghano agha ndigho ghakwenera kuti ghakaŵa na ŵanthu ŵanyake mu nyengo yakale. Ghanaghanirani chiyelezgero cha mu ndime 3 chira. Panji mubali wa munthu uyo wakaswa dango la Sabata wakwenera kuti wakajifumbanga usange Mozesi wakafumba dankha kwa Yehova pambere munthu yura wandakomeke. Ndiposo panji mubwezi wa Uriya Muhiti, wakwenera kuti wakaghanaghananga kuti Davide wakagwiliskira ntchito mazaza gha uthemba agho wakaŵa nagho kugwentha chilango cha nyifwa chifukwa chakuchita uleŵi na muwoli wa Uriya. Kweni unenesko ngwakuti, tingayowoya yayi kuti tikugomezga Yehova para tikuŵagomezga yayi ŵanalume awo wali kwimika kuti ŵalongozgenge mu gulu lake.

8. Kasi pali kuyana wuli pakati pa ivyo vikuyowoyeka pa Milimo 16:4, 5 na umo mpingo Wachikhristu ukwendera mazuŵa ghano?

⁸ Mazuŵa ghano Yehova wakulongozga chigaŵa cha gulu lake la pa charu chapasi kwizira mwa “muzga wakugomezgeka na wavinjeru.” (Mat. 24:45) Nga umo vikaŵira na wupu wakulongozga mu nyengo ya Ŵakhristu ŵakwambilira, muzga uyu nayo wakulaŵilira ŵanthu ŵa Chiuta pa charu chose chapasi na kupeleka ulongozgi ku ŵalara mu mpingo. (Ŵazgani Milimo 16:4, 5.) Ŵalara nawo ŵakuwoneseska kuti ŵakulondezga ulongozgi uwu mu mpingo. Tikulongora kuti tikugomezga nthowa za Yehova para tikupulikira ulongozgi uwo tikupokera kufuma ku gulu lake na ŵalara.

9. Kasi mphawuli apo chingatiŵira chakusuzga kukolerana na ivyo ŵalara ŵasankha, ndipo chifukwa wuli?

⁹ Nyengo zinyake chingatiŵira chakusuzga kukolerana na ivyo ŵalara ŵasankha. Mwachiyelezgero, mu vyaka vyasonosono apa, mipingo yinandi panji madera ŵali kusazga pamoza panji kugaŵa. Ndipo mu vigaŵa vinyake ŵalara ŵali kupempha ŵapharazgi kuti ŵakawovwire mipingo yinyake kuti Nyumba za Ufumu zigwirenge ntchito mwakukwana. Usange tapempheka kuti tilute ku mpingo uphya, chingatiŵira chakusuzga kuleka ŵabwezi na ŵabali ŵithu. Kasi ŵalara ŵakuchita kupokera ulongozgi wapadera kufuma kwa Chiuta uwo ukuŵawovwira kumanya mpingo uwo ŵakwenera kusamuskirako mupharazgi waliyose? Yayi. Ndipo fundo iyi panji ndiyo yingatipangiskaso kuti chitiŵire chakusuzga kulondezga ulongozgi uwo tikupokera. Kweni Yehova wali kupeleka udindo uwu ku ŵalara kuti ŵapangenge vyakusankha ivi, ndipo nase tikwenera kuŵagomezga.b

10. Kuyana na Ŵahebere 13:17, chifukwa wuli tikwenera kukolerana na ŵalara?

¹⁰ Chifukwa wuli tikwenera kukolerana na ŵalara na kukhozgera ivyo ŵasankha nanga vingaŵa kuti ivyo ŵasankha tikukolerana navyo yayi? Chifukwa para tichitenge nthena, tikovwira kusungilira umoza pakati pa ŵanthu ŵa Chiuta. (Efe. 4:2, 3) Mpingo ukwenda makora para wose ŵakupulikira ivyo wupu wa ŵalara wasankha. (Ŵazgani Ŵahebere 13:17.) Kweniso chakuzirwa chomene ntchakuti tikulongora Yehova kuti tikumugomezga, para tikukolerana na awo wali kusankha kuti ŵatilaŵilirenge ise.—Mil. 20:28.

11. Kasi ntchivichi chingatovwira kuti tigomezgenge chomene ulongozgi uwo tikupokera kufuma ku ŵalara?

¹¹ Tigomezgenge chomene ulongozgi uwo tikupokera kufuma ku ŵalara para tikumbukenge fundo yakuti ŵakulomba dankha kwa Yehova kuti mzimu utuŵa uŵawovwire para ŵakudumbiskana nkhani zakukhwaskana na mpingo. Iwo ŵakusandaso mwakupwelelera fundo za mu Baibolo na kuwona ulongozgi uwo gulu la Yehova likupeleka. Nakuti iwo mbakukhumbisiska chomene kukondweska Yehova na kupwelelera makora chomene ŵanthu ŵake. Ŵabali ŵakugomezgeka aŵa ŵakumanya kuti ŵazamupatawura kwa Chiuta umo ŵakuchitira na ŵanthu ŵake. (1 Pet. 5:2, 3) Ghanaghanirani fundo iyi: Mu charu ichi ŵanthu mbakugaŵikana chifukwa cha mtundu, chisopa, na ndyali; kweni ŵanthu ŵa Yehova mbakukolerana pa kusopa Chiuta yumoza waunenesko mwamtende. Ivi vikuchitika chifukwa chakuti Yehova ndiyo wakovwira gulu lake.

12. Kasi ŵalara ŵakwenera kuwona vichi kuti ŵamanye usange munthu wapera nadi?

¹² Yehova wali kuŵapa ŵalara mulimo wakuzirwa chomene wakusungilira mpingo kuŵa wakutowa. Usange Mkhristu wachita kwananga kukuru, Yehova wakukhazga ŵalara kuti ŵawone usange munthu uyo ngwakwenelera kulutilira kuŵa mu mpingo panji yayi. Mwa vinyake, ŵalara ŵakweneraso kuwona usange munthu uyo wali nadi na chitima chifukwa cha ivyo wali kuchita. Nyengo zinyake mweneko wangayowoya kuti wapera, kweni kasi wakutinkha nadi ivyo wali kuchita? Kasi waŵikapo mtima kuleka kuwerezgaso kwananga uko wakachita? Usange mendezgano ghaheni ndiyo ghakamupangiska kuti wanange, kasi ngwakunozgeka kudumura ubwezi na ŵanthu awo? Ŵalara ŵakulomba kwa Yehova, ŵakusanda maukaboni ghose na ivyo Baibolo likuyowoya, ndipo ŵakuwonaso umo wakwananga wakujipulikira chifukwa cha ivyo wali kuchita. Kufuma apo ŵakudumura usange wakwananga uyu wangalutilira kuŵa mu mpingo. Ndipo nyengo zinyake wakusezgeka.—1 Kor. 5:11-13.

13. Kasi tingamba kukayikira vichi usange mubwezi withu panji mubali withu wasezgeka?

¹³ Kasi chigomezgo chithu pa ŵalara chingayezgeka wuli? Usange munthu uyo wasezgeka ni mubwezi withu yayi nesi mubali withu, chingaŵa chipusu kuzomerezga ivyo ŵalara ŵadumura. Kweni wuli usange uyo wasezgeka ni mubwezi withu wapamtima? Tingamba kukayika kuti ŵalara ŵakasanda maukaboni ghose yayi, panji tingamba kukayika usange ŵeruzga umo Yehova wakhumbiranga. Kasi ntchivichi chingatovwira kuti tilutilire kuwona vinthu mwakwenelera pa ivyo ŵalara ŵadumura?

14. Kasi ntchivichi chingatovwira usange ŵalara ŵadumura kuti mubali withu panji mubwezi withu wasezgeke?

¹⁴ Tikwenera kukumbuka kuti kusezga munthu ni ndondomeko ya Yehova ndipo yikuvikilira mpingo na kovwira wakwananga. Usange wakwananga wangalutilira kuŵa mu mpingo, wangapangiska ŵanyake kuti nawo ŵachite kwananga. (Gal. 5:9) Kweniso wangawamo yayi za ukuru wa kwananga uko wakachita, ndipo wangawona kuti palije chifukwa icho wakwenera kusinthira maghanoghano na vyakuchita vyake kuti waŵeso paubwezi na Yehova. (Muph. 8:11) Tikugomezga kuti apo ŵalara ŵakudumura usange munthu wakwenera kusezgeka, ŵakuwona kuti ni nkhani yamaseŵera yayi ndipo ŵakuŵa kuti ŵasanda maukaboni ghose. Ŵakumanya kuti nga umo vikaŵira na ŵeruzgi mu Israyeli, ‘ŵakweruzgira munthu chara kweni Yehova.’—2 Mid. 19:6, 7.

UMO KUGOMEZGA YEHOVA SONO KUNGAZAKATOVWILIRA MUNTHAZI

15. Chifukwa wuli tikwenera kugomezga chomene ulongozgi wa Yehova sono kuluska kumanyuma kose?

¹⁵ Apo umaliro wa charu ichi ukusendelera chomene, ndipo tikwenera kugomezga chomene nthowa za umo Yehova wakuchitira vinthu kuluska kumanyuma kose. Chifukwa wuli? Pa suzgo yikuru, tingazakapokera ulongozgi wakuwoneka nga ngwakusuzga kuwupulikiska panji kuwulondezga. Nakuti Yehova wazamuyowoya nase maso na maso yayi. Wazamupeleka ulongozgi kwizira mu ŵimiliri ŵake. Iyi yingazakaŵa nyengo yiwemi yayi ya kukayikira ulongozgi na kujifumba kuti, ‘Kasi wafuma nadi kwa Yehova panji ndimo ŵabali awo ŵakulongozga ŵakuwonera waka?’ Kasi muzamugomezga Yehova mu nyengo yakusuzga chomene iyi, iyo yindaŵepo mu mbiri yose ya ŵanthu? Zgoro likuthemba pa umo mukuwonera ulongozgi wa gulu pasono. Usange mukugomezga ulongozgi uwo tikupokera na kuwulondezga mwambura kuchichizgika, pa suzgo yikuru napo ndimo muzamuchitiraso.—Luka 16:10.

16. Kasi chigomezgo chithu mwa Yehova chiyezgekenge wuli sonosono apa?

¹⁶ Tikweneraso kughanaghanirapo mwakupwelelera umo tizamuchitira apo Yehova wazamupeleka cheruzgo chake paumaliro wa charu chiheni ichi. Pasono, tikugomezga kuti ŵanthu ŵanandi awo ŵakuteŵetera Yehova yayi kusazgapo ŵachibali ŵithu, ŵasankhenge kuteŵetera Yehova pambere umaliro undize. Kweni pa Aramagedoni, Yehova kwizira mwa Yesu, ndiyo wazamuwona umo wangachitira nawo. (Mat. 25:31-33; 2 Tes. 1:7-9) Uzamuŵa udindo withu yayi wakusankha uyo wakwenera kulongoreka lusungu na Yehova na uyo wakwenelera yayi. (Mat. 25:34, 41, 46) Kasi tizamulutilira kugomezga Yehova panji tizamuleka kumuteŵetera chifukwa chakuti tikukolerana navyo yayi ivyo wasankha? Apa ntchakuwonekerathu kuti tikwenera kulutilira kugomezga chomene Yehova sono kuti tizakamugomezgeso chomene munthazi.

17. Kasi tizamusanga vyandulo wuli para Yehova wazakeruzga charu chiheni ichi?

¹⁷ Ghanaghanirani waka umo tizamujipulikira mu charu chiphya cha Chiuta para tawona ivyo vyachitika chifukwa cha vyeruzgo vya Chiuta. Chisopa chautesi chizamuŵakoso yayi, kuzamuŵavya awo ŵakuchita mabizinesi ghakwibira ŵanthu, panji maboma agho ghakutambuzga ŵanthu kwamba waka kale. Maulwari, uchekuru na nyifwa, vizamuŵakoso yayi. Satana na viŵanda vyake ŵazamujalirika kwa vyaka 1000. Vinthu vyose ivyo vyachitika chifukwa cha kugaluka kwawo kuzamuŵavya. (Chivu. 20:2, 3) Tizamukondwa chomene kuti tikagomezga Yehova na nthowa zake zakuchitira vinthu.

18. Kasi tingasambirako vichi ku Ŵaisrayeli kuyana na lemba la Maŵazgo 11:4-6 na 21:5?

¹⁸ Kasi umoyo mu charu chiphya uzamuŵa na masuzgo ghanyake agho ghazamuyezga chigomezgo chithu mwa Yehova? Ghanaghanirani ivyo vikachitika nyengo yichoko waka Ŵaisrayeli ŵati ŵafwatulika waka kuwuzga ku Eguputo. Ŵanyake ŵakamba kudandawura chifukwa chakuti ŵakachisoŵanga chakurya icho ŵakaryanga kura, ndipo ŵakayuyuranga mana agho Yehova wakaŵapanga. (Ŵazgani Maŵazgo 11:4-6; 21:5.) Kasi nase tizamuŵa na maghanoghano agha para suzgo yikuru yamara? Tikumanya yayi unandi wa ntchito iyo yizamuŵapo yakunozga charu, kuti pachoko na pachoko chiŵeso paradiso. Ntchakuwonekerathu kuti pazamuŵa ntchito yinandi chomene ndipo umoyo uzamuŵa upusu yayi pakwamba. Kasi tizamudinginyika na ivyo Yehova wazamutipa panyengo iyo? Tingasimikizga fundo yimoza: Usange tikuwonga chomene ivyo Yehova wakutipa pasono, tizamuwongaso chomene ivyo wazamutipa panyengo iyo.

19. Longosorani mwakudumura fundo zikuruzikuru izo tasambira mu nkhani iyi.

¹⁹ Yehova nyengo zose wakuchita icho ntchakunyoloka. Tikwenera kukhorwa na fundo iyi. Tikweneraso kugomezga awo Yehova waŵimika kuti ŵatipenge ulongozgi. Tingaluwanga yayi mazgu agho Yehova wakayowoya kwizira mwa ntchimi yake Yesaya ghakuti: “Musangenge nkhongono chifukwa cha kukhala mwakufwasa na kugomezga.”—Yes. 30:15.