Umo Yehova Wakuzgolera Malurombo Ghithu

1-2. Kasi tingajifumba vichi pa nkhani ya malurombo ghithu?

KASI muli kujifumbapo usange Yehova wakuzgora malurombo ghinu? Usange ni nthena muli mwekha yayi. Ŵabali na ŵadumbu ŵanandi ŵali kujifumbapo nthena, chomenechomene para ŵasangana na suzgo likuru. Usange tikusuzgika, nase chingatiŵira chinonono kumanya umo Yehova wakuzgolera malurombo ghithu.

² Tiyeni sono tiwone chifukwa icho tingaŵira na chigomezgo chose kuti Yehova wakuzgora malurombo gha ŵasopi ŵake. (1 Yoh. 5:15) Tiwonengeso mafumbo agha: Chifukwa wuli nyengo zinyake vikuwoneka nga kuti Yehova wakuzgora yayi malurombo ghithu? Kasi Yehova wakuzgora wuli malurombo ghithu mazuŵa ghano?

YEHOVA WANGAZGORA MU NTHOWA IYO TAKHAZGANGA YAYI

3. Chifukwa wuli Yehova wakukhumba kuti timulombenge?

³ Malemba ghakutisimikizgira kuti Yehova wakutitemwa chomene kweniso kuti ndise ŵakuzirwa kwa iyo. (Hag. 2:7; 1 Yoh. 4:10) Lekani wakutipempha kuti timulombenge usange tikukhumba wovwiri wake. (1 Pet. 5:6, 7) Iyo wakukhumba kuti watovwire kuti tilutilire kuŵa paubwezi wakukhora na iyo na kuzizipizga masuzgo agho tikusangana nagho.

4. Kasi tikumanya wuli kuti Yehova wakuzgora malurombo gha ŵasopi ŵake? (Wonaniso chithuzi.)

⁴ Mu Baibolo, kanandi tikuŵazga kuti Yehova wakazgoranga malurombo gha ŵasopi ŵake. Chiyelezgero chimoza ni Themba Davide. Davide wakakumana na ŵalwani ŵakofya ŵanandi pa umoyo wake, ndipo kanandi wakalombanga Yehova kuti wamovwire. Nyengo yinyake wakaŵeyelera Yehova kuti: “A Yehova, pulikani lurombo lwane. Tegherezgani apo nkhuŵeya kuti munovwire. Nizgorani mu kugomezgeka kwinu na mu urunji winu.” (Sal. 143:1) Yehova wakazgora malurombo gha Davide ghakuti wamuponoske. (1 Sam. 19:10, 18-20; 2 Sam. 5:17-25) Na chigomezgo chose, Davide wakayowoya kuti: “Yehova wali pafupi na wose awo ŵakumuchema.” Nase tingaŵa na chigomezgo chanthena ichi.—Sal. 145:18.

5. Kasi ŵasopi ŵa Yehova mu nyengo yakale, nyengo zose ŵakazgorekanga malurombo ghawo umo iwo ŵakakhumbiranga? Yowoyani chiyelezgero. (Wonaniso chithuzi.)

⁵ Yehova wangazgora malurombo ghithu mu nthowa iyo takhazganga yayi. Umu ndimo vikaŵira kwa mpositole Paulosi. Iyo wakalomba Chiuta kuti ‘wamuwuskiremo munga mu thupi lake.’ Katatu kose, Paulosi wakalomba mwakudunjika vya suzgo lake likuru ili. Kasi Yehova wakazgora malurombo ghake? Enya, kweni umo Paulosi wakakhumbiranga yayi. M’malo mwa kumuwuskirapo suzgo, Yehova wakamupa waka nkhongono izo wakakhumbikwiranga kuti walutilire kumuteŵetera mwakugomezgeka.—2 Kor. 12:7-10.

6. Chifukwa wuli nyengo zinyake tingawona nga kuti Yehova wakuzgora yayi malurombo ghithu?

⁶ Nase Yehova wangazgora malurombo ghithu mwakupambana na umo ise takhazgiranga. Kweni tingaŵa na chigomezgo chose kuti Yehova wakumanya makora umo wangatovwilira makora. Nakuti ‘wangachita vinandi nkhanira kuluska vinthu vyose ivyo tikulomba panji kughanaghana.’ (Efe. 3:20) Pa chifukwa ichi, wangazgora malurombo ghithu panyengo iyo takhazganga yayi panji wangazgora mu nthowa iyo ise takhazganga yayi.

7. Chifukwa wuli nyengo zinyake tingakhumbikwira kusintha ivyo tikulomba? Yowoyani chiyelezgero.

⁷ Nyengo zinyake tingakhumbikwira kusintha ivyo tikulomba usange tamanya makora ilo ni khumbo la Yehova. Wonani ivyo wakachita Martin Poetzinger. Wati watora waka, Mubali Poetzinger wakajalirika ku msasa wakuyuzgirako ŵanthu wa Nazi. Pakwamba, wakalomba Yehova kuti wamufumiske mu msasa uwu mwakuti wakapwelelere muwoli wake na kwambiraso kupharazga. Ndipouli, pati pajumpha masabata ghaŵiri pakaŵavya chimanyikwiro chakulongora kuti Yehova wajurenge nthowa kuti wafumiskike. Ntheura wakamba kulomba kuti: “Yehova, chonde nilongorani ivyo imwe mukukhumba kuti nichite.” Pamanyuma wakamba kughanaghanira masuzgo agho ŵabali ŵanyake ŵakasangananga nagho mu msasa wura. Ŵanandi ŵakafipiranga chomene mtima ŵawoli ŵawo na ŵana ŵawo. Sono Mubali Poetzinger wakalomba kuti: “Yehova, nkhumuwongani chifukwa cha mulimo uphya uwo mwanipa. Novwirani kuti nikhozge ŵabali ŵane.” Wakakhala vyaka 9 mu misasa, uku wakukhozga ŵabali ŵanyake.

8. Kasi ntchinthu wuli chakuzirwa icho tikwenera kukumbuka para tikulomba?

⁸ Tikwenera kukumbuka kuti Yehova wali na khumbo ndipo wazamufiska panyengo yake iyo wali kutema kale. Khumbo lake ndakuti wazakawuskepo masuzgo ghose agho tikutambura nagho mazuŵa ghano. Masuzgo nga masoka ghachilengiwa, ulwari, na nyifwa. Yehova wazamufiska khumbo lake kwizira mu Ufumu wake. (Dan. 2:44; Chivu. 21:3, 4) Ndipouli, pasono Yehova wachali kumuzomerezga Satana kuwusa charu ichi m’paka panyengo iyo wazamufiskira khumbo lake.b (Yoh. 12:31; Chivu. 12:9) Usange Yehova wangawuskapo sono masuzgo ghose agho taŵanthu tikusangana nagho, vingalongora nga kuti Satana wakuwusa makora charu. Ndipouli, apo tikulindilira kuti wafiske malayizgo ghake, Yehova watilekenge waka nthena yayi kwambura kutovwira. Tiyeni tiwone nthowa zinyake izo Yehova wakutovwilira.

NTHOWA IZO YEHOVA WAKUZGOLERA MALUROMBO GHITHU MAZUŴA GHANO

9. Kasi Yehova wangatovwira wuli para tikukhumba kupanga chakusankha pa nkhani yinyake? Yowoyani chiyelezgero.

⁹ Wakutipa vinjeru. Yehova wakulayizga kuti watipenge vinjeru ivyo tikukhumbikwira kuti tisankhe makora vinthu. Tikukhumbikwira chomene vinjeru vya Chiuta para tikusankha vinthu ivyo vikhwaskenge umoyo withu wose, nga mpha nkhani ya kunjira mu nthengwa panji kuleka kunjira mu nthengwa. (Yak. 1:5) Wonani ivyo vikachitikira mudumbu munyake wambura kutengwa zina lake Maria.c Wakakondwanga chomene kuteŵetera nga mupayiniya panyengo iyo wakakumana na mubali. Iyo wakuti: “Apo ubwezi withu ukakuranga, ndipo tikadokerananga chomene. Nkhamanya kuti nkhakhumbikwiranga kuti nipange chakusankha. Nkhalomba chomene pa nkhani iyi kweniso kwa nyengo yitali. Nkhakhumbikwiranga wovwiri wa Yehova, kweni nkhamanyaso kuti Yehova ndiyo wanisankhirenge chakuchita yayi.” Mudumbu uyu wakujipulika kuti Yehova wakazgora malurombo ghake pakumupa vinjeru. Mwawuli? Wakachita kafukufuku mu mabuku ghithu ndipo wakasanga nkhani izo zikamovwira kuzgora mafumbo agho wakaŵa nagho. Wakapulikiraso ulongozgi wavinjeru wakufuma kwa amama ŵake. Ulongozgi uwu ukamovwira kuti wasandeso umo wakajipulikiranga. Paumaliro wakasankha makora vinthu pa nkhani iyi.

10. Kuyana na Ŵafilipi 4:13, kasi Yehova wachitenge vichi kuti wawovwire ŵasopi ŵake? Yowoyani chiyelezgero. (Wonaniso chithuzi.)

¹⁰ Wakutipa nkhongono kuti tizizipizge. Nga umo wakachitira na mpositole Paulosi, nase Yehova watipenge nkhongono izo tikukhumbikwira kuti tizizipizge masuzgo ghithu. (Ŵazgani Ŵafilipi 4:13.) Wonani umo Yehova wakawovwilira mubali munyake zina lake Benjamin kuti wazizipizge chiyezgo chikuru. Pafupifupi waka nyengo yose iyo wakaŵa muwukirano, Benjamin wakakhalanga ku misasa ya ŵanthu ŵakuchimbira kwawo ku Africa. Benjamin wakuti: “Nkhalombanga pafupipafupi kwa Yehova kuti wanipe nkhongono kuti nichite icho ntchakukondweska mu maso ghake. Yehova wakazgora malurombo ghane pakunipa mtende wa mu mtima, chikanga kuti nilutilire kupharazga, kweniso mabuku kuti ghanovwire kulutilira kuŵa wakukhora mwauzimu.” Iyo wakutiso: “Kuŵazga nkhani zakukhwaskana na ivyo vikachitikirapo ŵabali na ŵadumbu kweniso kumanya umo Yehova wakaŵawovwilira, kwanovwira kuŵa na nkhongono zakuzizipizgira na kuŵikapo mtima kulutilira kugomezgeka.”[4]

11-12. Kasi Yehova wangazgora wuli malurombo ghithu kwizira mwa ŵabali na ŵadumbu ŵithu? (Wonaniso chithuzi.)

¹¹ Wakutovwira kwizira mu mbumba yithu yauzimu. Pa usiku wakuti namachero wafwenge, Yesu wakalomba chomene kwa Awiske. Wakalomba Yehova kuti waleke kuzomerezga ŵanthu kumuwona kuti iyo ni munthu wakuyuyura Chiuta kweniso kuti ŵaleke kumukana. M’malo mwakuchita ivyo wakalomba, Yehova wakamovwira waka pakutuma mungelo kuti wamukhozge. (Luka 22:42, 43) Yehova wangatovwiraso kwizira mwa ŵabali na ŵadumbu awo ŵangatiyimbira foni kutikhozga, panji kutiyendera. Ntheura tose tipenjenge mipata iyo tingayowoyera “mazgu ghawemi” ghakukhozga Ŵakhristu ŵanyithu.—Zinth. 12:25.

¹² Wonani ivyo vikachitikira mudumbu munyake zina lake Miriam. Masabata ghachoko waka mfumu wake wati wafwa, Miriam wakakhala waka yekha panyumba, ndipo wakaŵa na chitima chomene kweniso kusuzgika maghanoghano. Wakaliranga waka ndipo wakakhumbanga nga wangayowoya na munthu munyake. Iyo wakuti: “Nkhaŵavya nkhongono zakwimbira foni waliyose, ntheura nkhalomba waka kwa Yehova. Apo nkhaŵa kuti nkhulira uku nkhulomba, foni yane yikalira. Wakaŵa mulara, mubwezi wa mfumu wane.” Miriam wakapembuzgika na mulara uyu pamoza na muwoli wake. Iyo ngwakukhorwa kuti Yehova wakachiska mubali uyu kuti wimbe foni.

13. Yowoyani chiyelezgero cha umo Yehova wangagwiliskilira ntchito awo ŵakumusopa yayi kuti wazgore malurombo ghithu.

¹³ Wangatovwira kwizira mu ŵanthu awo ŵakumusopa yayi. (Zinth. 21:1) Nyengo zinyake Yehova wakuzgora malurombo ghithu mwa kuchiska ŵanthu awo ŵakumusopa yayi kuti ŵatovwire. Mwachiyelezgero, wakapangiska Themba Aritazekisesi kuzomerezga Nehemiya kuwelera ku Yerusalemu mwakuti wakawovwirepo pa mulimo wakuzengaso msumba. (Neh. 2:3-6) Mazuŵa ghano napo, Yehova wangapangiska awo ŵakumusopa yayi kuti ŵatovwire para tikukhumbikwira wovwiri.

14. Kasi ivyo vikachitikira Soo Hing vyamukhozgani wuli? (Wonaniso chithuzi.)

¹⁴ Mudumbu munyake zina lake Soo Hing wakawona kuti Yehova wakamovwira kwizira mwa dokotala wake. Mwana wake msepuka kamutu kakwenda makora yayi. Mwana wawo uyu wakati wachita ngozi yikuru, iyo na mfumu wake ŵakaleka ntchito kuti ŵamupwelelere makora. Ivi vikapangiskaso kuti ŵaŵe na suzgo la vyachuma. Soo Hing wakati vinthu vikajumpha mzere mwakuti wakawonanga kuti wangazizipizgaso yayi. Wakamukhutulira Yehova vya ku mtima wake, na kumupempha kuti wamovwire. Dokotala wakasankha kuti wawovwirepo, ndipo wakasanga nthowa yakumovwilira iyo pamoza na mbumba yake. Pa chifukwa ichi ŵakapokera wovwiri ku boma kweniso ŵakasanga malo ghakukhala ghakuti ŵangakwaniska kulipira lenti. Pamanyuma, Soo Hing wakati: “Tikawona woko la Yehova pa suzgo ili. Iyo ‘Ngwakupulika nadi malurombo.’”—Sal. 65:2.

TIKUKHUMBIKWIRA CHIPULIKANO KUTI TIMANYE NA KUZOMEREZGA KUTI YEHOVA WAZGORA MALUROMBO GHITHU

15. Kasi ntchivichi chikawovwira mudumbu munyake kumanya kuti Yehova wakazgoranga malurombo ghake?

¹⁵ Malurombo ghithu kanandi ghakuzgoreka mu nthowa yapadera yayi. Kweni mazgoro agho tikupokera ndigho tikukhumbikwira nadi kuti ghatovwire kulutilira kuŵa ŵakugomezgeka kwa Adada ŵithu ŵakuchanya. Ntheura muŵenge maso kuwona umo Yehova wakuzgolera malurombo ghinu. Mudumbu munyake zina lake Yoko wakawona kuti Yehova wakazgoranga yayi malurombo ghake, kweni pamanyuma wakamba kulemba ivyo wamulomba Yehova. Nyengo yati yajumphapo, wati waweleramo ivyo wakalemba mu buku wakawona kuti vinandi ivyo wakalomba Yehova wali kuzgora, nanga ni ivyo wakaŵa kuti waviluwa. Ntheura nyengo na nyengo, tikwenera kughanaghanirapo umo Yehova wakuzgolera malurombo ghithu.—Sal. 66:19, 20.

16. Kasi tingalongora wuli kuti tili na chipulikano pa nkhani ya malurombo ghithu? (Ŵahebere 11:6)

¹⁶ Padera pa kulomba kwa Yehova, tikulongoraso chipulikano para tikuzomerezga umo Yehova wazgolera malurombo ghithu nanga ghangazgoreka mu nthowa iyo takhazganga yayi. (Ŵazgani Ŵahebere 11:6.) Wonani chiyelezgero cha Mike na muwoli wake, Chrissy. Ŵakaŵa na chilato chakuti ŵakateŵetere pa Beteli. Mike wakuti: “Tikapempha uteŵeti uwu kanandi waka na kulomba kwa Yehova mwakuwerezgawerezga kuti chilato chithu chifiskike. Kweni tikachemeka yayi.” Mike na Chrissy ŵakalutilira kugomezga kuti Yehova ndiyo wakumanya umo wangaŵagwiliskilira ntchito makora mu gulu lake. Ŵakalutilira kuchita vyose ivyo ŵangafiska. Iwo ŵakachitanga upayiniya wanyengozose ndiposo ŵakateŵeteranga uko kukakhumbikwanga ŵapharazgi ŵanandi, kweniso ŵakawovwirangapo pa mulimo wakuzenga. Sono ŵakuchita mulimo wakwendakwenda. Mike wakuti: “Nangauli ni nyengo zose yayi apo Yehova wazgoranga malurombo ghithu umo ise takhazgiranga, kweni unenesko ngwakuti iyo wali kuzgora malurombo ghithu ghose. Kweniso wali kuzgora munthowa yiwemi chomene kuluska iyo ise tikaghanaghananga.”[9]

17-18. Kuyana na Salimo 86:6, 7, kasi tingaŵa na chigomezgo wuli?

¹⁷ Ŵazgani Salimo 86:6, 7. Wamasalimo Davide wakaŵa na chigomezgo chose kuti Yehova wakupulika na kuzgora malurombo ghake. Namwe mungaŵa nacho chigomezgo chanthena. Viyelezgero ivyo tadumbiskana mu nkhani iyi vyatisimikizgira kuti Yehova wangatipa vinjeru na nkhongono izo tikukhumbikwira kuti tizizipizge. Wangagwiliskira ntchito Ŵakhristu ŵanyithu, panji nanga ni ŵanthu awo ŵakumusopa yayi panyengo yasono kuti ŵatovwire.

¹⁸ Nangauli ni nyengo zose yayi apo Yehova wazgorenge malurombo ghithu mu nthowa iyo takhazganga, kweni tikumanya kuti wazgorenge nipera. Watipenge ivyo tikukhumbikwira nadi kweniso panyengo yake. Ntheura tiyeni tilutilire kulomba na kugomezga kuti Yehova wakutipulika, kweniso kuti watipwelelerenge sono, kweniso munthazi ‘wazamukhorweska chamoyo chilichose’ mu charu chiphya.—Sal. 145:16.