Ivyo Vingamovwirani Kuti Muzgoŵere Para Mwasamira mu Mpingo Uphya

Kweni Nicolas na Céline ŵakasangana na suzgo linyake. Ŵakapika uteŵeti unyake na ofesi ya munthavi ya France kuti ŵasamire mpingo unyake. Iwo ŵakuti: “Pakwamba tikakondwa chomene, kweni pamanyuma tikamba kuŵasoŵa chomene ŵabwezi ŵithu. Tikaŵa kuti tindazgoŵerane chomene na ŵabali ŵa mu mpingo uphya uwu.”a Pakuwona masuzgo agho ghakuŵapo, kasi mungachita wuli kuti muzgoŵere mu mpingo uphya? Kasi ŵanji ŵangamovwirani wuli? Ndipo kasi mungachita wuli kuti mukhozgeke kweniso namwe mukhozge ŵanji mu mpingo winu uphya?

VINTHU VINAYI IVYO VINGAMOVWIRANI KUTI MUZGOŴERE

1. Thembani Yehova. (Sal. 37:5) Kazumi wa ku Japan, wakasama mu mpingo uwo wakawunganamo kwa vyaka 20, mfumu wake ŵati ŵamusamuska pa ntchito. Kasi wakachita wuli kuti ‘nthowa yake wayipeleke kwa Yehova’? Iyo wakuti: “Nkhapungulira mtima wane kwa Yehova, na kumuphalira umo nkhujipulikira, phukwa ilo nkhaŵa nalo, kweniso ivyo nkhenjerwanga navyo. Nyengo yiliyose para nachita nthena, wakanipanga nkhongono izo nkhukhumbikwira.”

Kasi mungachita wuli kuti mumugomezgenge chomene Yehova? Nga umo vyakumera vikukhumbikwira maji na vundira kuti vikure, chipulikano chithu nacho mwakuyelezgera chikukhumbikwira maji na vundira kuti chikure. Nicolas, uyo tamuzunura kukwambilira, wakaghanaghanirangapo viyelezgero vya Abrahamu, Yesu, na Paulosi, awo ŵakajinora vinthu vinandi kuti ŵachite khumbo la Yehova, ndipo ivi vikamovwira kuti waŵe na chigomezgo chose kuti Yehova wamovwirenge. Kusambira Baibolo nyengo zose kumovwiraninge kuti muzgoŵere luŵiro para vinthu vyasintha pa umoyo winu, kweniso kumovwiraninge kuti musange fundo izo mungakhozgera ŵanji mu mpingo winu.

2. Gegani kuyaniska mpingo winu wasono na wakale. (Muph. 7:10) Jules wakeneranga kuzgoŵera mutheto uphya wati wasama ku Benin kuluta ku United States. Iyo wakuti: “Nkhaghanaghananga kuti nkhwenera kujilongosora kwa waliyose uyo nkhakwamba kusangana nayo.” Chifukwa chakuti mutheto wa uku ukaŵa wakupambana na uwo wakazgoŵera, wakamba kujipatura ku ŵabali na ŵadumbu. Ndipouli, wati wamba kuŵamanya makora ŵabali na ŵadumbu, wakasintha umo wakawoneranga vinthu. Iyo wakuti: “Sono namanya kuti kulikose uko tingaŵa, tose tikuyana waka. Tikupambana waka chiyowoyero na umo tikuchitira vinthu. Ntchakovwira chomene kuzomerezga waka umo ŵanthu ŵaliri.” Ntheura gegani kuyaniska mpingo winu wasono na wakale. Mudumbu munyake mupayiniya zina lake Anne-Lise, wakati, “Nkhasama kuti nkhasange vinthu vyakuyana waka na ivyo nkhavileka ku mpingo wane wakale yayi. Nkhasama kuti nkhasambire vinthu viphya.”

Ŵalara nawo ŵakwenera kugega kuyaniska mpingo wawo wasono na wakale. Para vinthu vikuchitika munthowa yinyake, ni nyengo zose yayi apo vikuŵa vyakubudika. Ntchakuzirwa chomene kumanya dankha umo vinthu viliri mu mpingo uwo, pambere mundapeleke sachizgo linu. (Muph. 3:​1, 7b) Ntchakovwira chomene kuti ŵanthu ŵasambirengeko kwa ise kwizira mu ivyo tikuchita m’malo mwa kuŵika tumalango twithu.—2 Kor. 1:24.

3. Muchitirenge lumoza vinthu na mpingo. (Fil. 1:27) Nangauli kusama kungatimalira nyengo kweniso nkhongono, kweni ntchakuzirwa chomene kuwungana maso na maso na mpingo uphya kufuma waka pakwamba para ntchamachitiko. Nakuti usange ŵabali ŵa mu mpingo uphya ŵakumuwonani yayi maso na maso panji ŵakumuwonani mwa apo na apo, chingaŵa chakusuzga kuti ŵamovwirani. Lucinda, uyo wakasamira mu msumba ukuru ku South Africa lumoza na ŵana ŵake ŵaŵiri, wakati: “Ŵabwezi ŵane ŵakanichiska kuti nkhwenera kuŵika mtima pa kuŵa paubwezi na ŵabali na ŵadumbu mu mpingo uphya, kupharazga nawo, kweniso kuzgorapo pa maungano. Tikajipelekaso kuti ŵabali na ŵadumbu ŵakumanenge ku nyumba kwithu pakuluta mu upharazgi.”

“Kulimbikira pamoza” milimo ya mpingo pamoza na ŵabali na ŵadumbu mu mpingo winu uphya, ni nthowa yiwemi chomene yakukhozgera chipulikano chinu na cha ŵanji. Anne-Lise, uyo tamuzunura kale, wakachiskika na ŵalara kuti wayezge kwenda mu uteŵeti na waliyose mu mpingo uphya. Kasi pakaŵa uwemi wuli? Iyo wakuti: “Nkhawona kuti iyi ni nthowa yiwemi chomene yakuzgoŵelera mpingo uphya.” Kweniso kujipeleka kuchitako milimo yinyake nga kutozga na kunozga Nyumba ya Ufumu, kulongorenge kuti namwe mukujitora kuti ndimwe ŵa mpingo uphya uwu. Para mukuchitira lumoza vinthu na mpingo uphya, muzgoŵeranenge luŵiro na ŵabali na ŵadumbu ndipo muwonenge kuti muli mbumba yimoza.

4. Sangani ŵabwezi ŵaphya. (2 Kor. 6:​11-13) Kunweka na ŵanthu ni nthowa yiwemi chomene yakusangira ŵabwezi ŵaphya, ntheura muchezgenge na ŵanji pambere maungano ghandambe na para ghamara waka kuti muŵamanye makora. Yezgeskani kumanya mazina ghawo. Para ŵanthu mukuŵakumbuka mazina ghawo kweniso ndimwe ŵaubwezi na ŵakufikirika, ŵanji nawo ŵakhumbenge chomene kuti ŵachezge namwe, ndipo ivi viwovwirenge chomene kuti musange ŵabwezi ŵaphya.

M’malo mwa kujibisa umo muliri na chilato chakuti musange ŵabwezi, zomerezgani kuti ŵabali na ŵadumbu ŵamumanyani umo imwe muliri nadi. Namwe chitani nga ni Lucinda uyo wakati, “Sono tili na ŵabwezi ŵanandi chifukwa cha kuchemerako ŵanji ku nyumba kwithu.”

“POKELERANANI YUMOZA NA MUNYAKE”

Ku ŵanyake chingaŵa chakusuzga chomene kunjira mu Nyumba ya Ufumu iyo muli ŵanthu ŵachilendo ŵekhaŵekha. Ipo kasi mungachita wuli kuti awo ŵiza sono mu mpingo winu ŵaŵenge ŵakufwatuka? Mpositole Paulosi wakachiska kuti: “Pokeleranani, umo Khristu nayo wakamupokelerani.” (Rom. 15:7) Para ŵalara ŵakuyezga Khristu, ŵangawovwira awo ŵiza sono mu mpingo kujipulika kuti ŵapokelereka. (Wonani bokosi lakuti “Ivyo Vingamovwirani Kuti Mufwatuke Luŵiro.”) Ndipouli, waliyose mu mpingo kusazgapo na ŵana, wali na udindo wakovwirapo kuti awo ŵiza sono ŵaŵe ŵakufwatuka mu mpingo.

Kupokelera ŵanji kukusazgapo kuŵachemerako ku nyumba kwithu, kweniso kuŵapa wovwiri uwo ŵakukhumbikwira. Mwachiyelezgero, mudumbu munyake wakapatura nyengo kuti wakamulongore tawuni mudumbu munyake uyo wakaŵa kuti wasamirako waka ku chigaŵa icho, kweniso kumulongosolera umo mathiransipoti ghakwendera mu chigaŵa icho. Mudumbu uyu wakakhwaskika chomene ndipo vikamovwira kuti wazgoŵere luŵiro.

NI MWAŴI WAKUTI MUKURE

Apo zombe likukura, likukonkhomoka kanandi waka pambere lindambe kuduka. Mwakuyana waka, para mukusamira ku mpingo uphya, namwe mukwenera kusintha vinthu vinyake ivyo vikumutondeskani kuti muchite vinandi pakuteŵetera Yehova. Nicolas na Céline ŵakuti: “Kusama nkhuwemi chomene chifukwa kukovwira kuti usambire vinyake. Kuti uzgoŵere ŵanthu ŵaphya kweniso malo ghaphya, nawe ukwenera kusambira mikhaliro yiphya.” Jean-Charles, uyo tamuyowoya kale, wakulongosora umo mbumba yake yasangira chandulo, wakuti: “Kusintha kwawovwira ŵana ŵithu kuti ŵakure mwauzimu na kuŵa paubwezi wakukhora na Yehova. Pamanyuma pa myezi yichoko waka, mwana withu msungwana wakamba kuŵa na chigaŵa pa maungano gha mukati mwa sabata, ndipo mwana withu munyamata wakaŵa mupharazgi wambura kubatizika.”

Wuli usange umo vinthu viliri mungasama yayi, mwachiyelezgero nga kukateŵetera uko kukukhumbikwa wovwiri? Mwalekerachi kuti mujitore nga kuti namwe mwasama waka, na kuyezga kulondezga masachizgo gha mu nkhani iyi? Apo mukuthemba Yehova, muchitengeko mwakukwana milimo ya mpingo, mwa kupharazgira lumoza na ŵanji kweniso kupanga ŵabwezi ŵaphya panji kukhozga ŵabwezi awo muli nawo kale. Kasi mungawovwira ŵaphya panji awo mbakusoŵerwa mwa kuŵapa ivyo ŵakukhumbikwira? Pakuti chitemwa ntchimanyikwiro cha Ŵakhristu ŵaunenesko, tikukayika yayi kuti kuchita nthena kumovwiraninge kuti mukure mwauzimu. (Yoh. 13:35) Mungaŵa na chigomezgo chose kuti “Chiuta wakukondwa chomene na sembe zanthena.”—Heb. 13:16.

Nangauli masuzgo ghakuŵapo, kweni Ŵakhristu ŵanandi ŵakuzgoŵera luŵiro para ŵasamira mu mpingo uphya, ndipo namweso mungazgoŵera! Anne-Lise wakuti: “Kusintha mpingo kukanovwira kuti nisanuzge na kuŵa na ŵabwezi ŵakupambanapambana.” Sono Kazumi ngwakukhorwa kuti para wamunthu wasama “Yehova wakukovwiraso mu nthowa iyo wandakovwilirepo nakale.” Kweni wuli pakuyowoya vya Jules? Iyo wakuti: “Ŵabwezi awo naŵasanga ŵanovwira kuti nileke kuchitaso phukwa. Pasono nazgoŵera chomene mpingo uphya uwu mwakuti vinganisuzgaso kuti nisame.”