Ntchiwemi Chomene Kuŵa Paubwezi na Ŵabali na Ŵadumbu Ŵithu

1-2. Kasi ntchinthu wuli chimoza icho chikumukhwaska chomene Yehova, ndipo iyo wakukhumba kuti tichite vichi?

UMO tikuchitira vinthu na ŵanyithu vikumukhwaska chomene Yehova. Yesu wakasambizga kuti tikwenera kutemwa ŵazengezgani ŵithu nga umo tikujitemwera taŵene. (Mat. 22:​37-39) Ivi vikusazgapo kuchitira lusungu nanga ni ŵanthu awo tikupambana ivyo tikugomezga. Para tachita nthena, ndikuti tikuyezga Yehova Chiuta, uyo ‘wakufumiskira dazi lake pa ŵanthu ŵaheni na ŵawemi. Ndipo wakulokweska vula pa ŵanthu ŵarunji na ŵambura urunji.’—Mat. 5:45.

² Nangauli Yehova wakuŵatemwa ŵanthu wose, kweni chomene wakutemwa awo ŵakuchita vinthu ivyo vikumukondweska. (Yoh. 14:21) Iyo wakukhumba kuti timuyezge. Ntheura wakutichiska kuti ‘tiŵatemwenge chomene’ ŵabali na ŵadumbu ŵithu. (1 Pet. 4:8; Rom. 12:10) Tikwenera kuŵatemwa nga umo tikutemwera mubali withu wakuthupi panji mubwezi withu wapamtima.

3. Kasi tikwenera kukumbuka vichi pa nkhani ya chitemwa?

³ Nga umo tikuchitira pakupwelelera mbuto zithu kuti zikure makora, tikwenera kuchitapo kanthu kuti chitemwa chithu chikure pa ŵabali na ŵadumbu. Mpositole Paulosi wakaphalira Ŵakhristu kuti: “Mulutilire kutemwa ŵabali.” (Heb. 13:1) Yehova wakukhumba kuti tilutilire kutemwa ŵanji. Mu nkhani iyi tiwonenge chifukwa icho tikwenera kuŵira paubwezi na ŵasopi ŵanyithu kweniso umo tingachitira kuti tilutilire kuŵa nawo paubwezi.

CHIFUKWA ICHO TIKWENERA KUŴIRA PAUBWEZI NA ŴASOPI ŴANYITHU

4. Kuyana na lemba la Salimo 133:​1, kasi tingachita wuli kuti tilutilire kuwona kuti umoza withu ngwakuzirwa? (Wonaniso vithuzi.)

⁴ Ŵazgani Salimo 133:1. Tikukolerana nayo wamasalimo uyo wakalemba kuti kuŵa paubwezi na awo ŵakutemwa Yehova ‘nkhuwemi’ na ‘kwakukondweska.’ Kweni nga umo vingaŵira na munthu uyo wangatondeka kuwona kutowa kwa khuni linyake chifukwa chakuti wakuliwona zuŵa lililose, mwakuyana waka nase tingamba kuwuwona mwakupepuka umoza withu. Tikuŵawona ŵabali na ŵadumbu kanandi waka, ndipo nyengo zinyake mu sabata tikukumana nawo kanandi waka. Kasi tingachita wuli kuti tilutilire kuŵawona kuti mbakuzirwa? Tikwenera kupatura nyengo na kughanaghanira umo ŵaliri ŵakuzirwa ku mpingo kweniso kwa ise. Usange tichitenge nthena, chitemwa chithu pa ŵabali na ŵadumbu chilutilirenge kukura.

5. Kasi ŵanji ŵangakhwaskika wuli para ŵawona chitemwa icho tikulongorana pakati pithu?

⁵ Ŵanyake awo nkhakwamba kwizako ku maungano ghithu, ŵakukondwa chomene na chitemwa icho tikulongorana. Nakuti ŵanandi para ŵawona waka chitemwa icho tikulongorana, ŵakukhorwa kuti ŵasanga unenesko. Yesu wakati: “Usange mukutemwana, wose ŵamanyenge kuti ndimwe ŵasambiri ŵane.” (Yoh. 13:35) Wonani chiyelezgero cha Chaithra, uyo wakaŵa ku yunivesite ndipo wakasambiranga Baibolo na Ŵakaboni ŵa Yehova. Wakazomera kuluta ku ungano wa chigaŵa. Wati wachita nawo zuŵa lakwamba ungano, wakaphalira uyo wakamusambizganga Baibolo kuti: “Ŵapapi ŵane ŵandanihagepo umo nili kuwira. Kweni pa ungano winu, nkhapokera mahagi 52 pa zuŵa limoza pera! Nkhawona kuti Yehova wakunitemwa kwizira mu mbumba yauzimu iyi. Nane nkhukhumba kuŵa chigaŵa cha mbumba iyi.” Chaithra wakalutilira kukura mwauzimu ndipo wakabatizika mu 2024. Nadi, para ŵaphya ŵakuwona milimo yithu yiwemi kusazgapo chitemwa icho tili nacho pakati pithu, kanandi nawo ŵakuchiskika kwamba kuteŵetera Yehova.—Mat. 5:16.

6. Kasi kuŵa paubwezi na ŵabali na ŵadumbu kungativikilira wuli?

⁶ Kuŵa paubwezi na ŵabali na ŵadumbu ŵithu ntchivikiliro. Paulosi wakachiska Ŵakhristu ŵanyake kuti: “Lutilirani kukhwimiskana zuŵa lililose . . . mwakuti paŵavye nanga njumoza wa imwe wanonopeske mtima wake na nkhongono yakupusika ya kwananga.” (Heb. 3:13) Usange tagongoweskeka chomene mwakuti malundi ghithu ghamba kupuluka kwenda munthowa ya urunji, Yehova wangachiska Mkhristu munyithu kuti watipe wovwiri uwo tingakhumbikwira. (Sal. 73:​2, 17, 23) Nakuti wovwiri wanthena nguwemi chomene kwa ise.

7. Kasi pali kukolerana wuli pakati pa chitemwa na umoza? (Ŵakolose 3:​13, 14)

⁷ Tili mu gulu ilo likuŵikapo mtima chomene kulongorana chitemwa, ntheura tikutumbikika chomene. (1 Yoh. 4:11) Mwachiyelezgero, chitemwa chikutichiska kuti ‘tilutilire kuzizipizgirana,’ ndipo ivi vikovwira kuti tilutilire kukolerana. (Ŵazgani Ŵakolose 3:​13, 14; Efe. 4:​2-6) Ntheura pa maungano ghithu, tikusangwa chomene kuŵa pa gulu ilo palije lakuyana nalo pa charu chapasi.

MUCHINDIKANENGE

8. Kasi Yehova wakutovwira wuli kuti tikoleranenge na ŵabali na ŵadumbu ŵithu?

⁸ Umoza uwo tikusangwa nawo ni munthondwe. Yehova ndiyo wakupangiska kuti paŵe umoza uwu nangauli tili ŵambura kufikapo. (1 Kor. 12:25) Baibolo likuyowoya kuti tili ‘kusambizgika na Chiuta kuti titemwanenge.’ (1 Tes. 4:9) Mukayowoyero kanyake tingati, kwizira mu Malemba, Yehova wakutiphalira icho nkhanira tikukhumbikwira kuchita kuti tiŵe paubwezi na ŵanyithu. ‘Tingasambizgika na Chiuta’ para tikusanda mwakupwelelera visambizgo vyake na kuvilondezga. (Heb. 4:12; Yak. 1:25) Nakuti ivi ndivyo Ŵakaboni ŵa Yehova ŵakuyezgayezga kuchita.

9. Kasi tikusambirapo vichi pa Ŵaroma 12:​9-13 pa nkhani ya kulongorana ntchindi?

⁹ Kasi Mazgu gha Chiuta ghakutisambizga vichi kuti tiŵe paubwezi na ŵanji? Wonani ivyo Paulosi wakayowoya pa nkhani iyi, nga umo pakulongolera pa Ŵaroma 12:​9-13. (Ŵazgani.) Wonani kuti wakayowoya kuti “yambani ndimwe kulongora ntchindi ku ŵanyinu.” Kasi mazgu agha ghakung’anamurachi? Tikwenera kupenjerezga mipata yakulongolera kuti ‘tikutemwa ŵanji’ munthowa zakupambanapambana, nga nkhuŵa wakugowoka, kupokelera ŵalendo, na kuŵa na mtima wakupa. (Efe. 4:32) Lekani kulindilira kuti Mkhristu munyinu ndiyo wambe kuŵa namwe paubwezi. Imwe ndimwe mukwenera ‘kwamba’ kuchita nthena. Yesu wakayowoya kuti: “Uyo wakupeleka wakukondwa chomene kuluska uyo wakupokera.”—Mil. 20:35.

10. Kasi tingalongora wuli kuti tikuŵikapo mtima ‘kulongorana ntchindi’? (Wonaniso chithuzi.)

¹⁰ Wonani kuti pamanyuma pakuti wayowoya kuti tambenge ndise kulongora ntchindi ku ŵanji, Paulosi wakutichiska kuti ‘tilimbikirenge ntchito, kuŵa ŵakata yayi.’ Munthu uyo ngwakulimbikira wakuŵa wamwamphu kweniso wakuŵikapo mtima pa ntchito. Para wapika uteŵeti unyake, wakuwuchita na mtima wose. Lemba la Zintharika 3:​27, 28 likutichiska kuti: “Ungaŵanoranga yayi viwemi awo ukwenera kuŵapa, usange uli na nkhongono kuŵawovwira.” Ntheura usange tawona kuti munyake wakukhumbikwira wovwiri, tikwenera kuchita vyose ivyo tingafiska kuti timovwire. Tikwenera kuziwulika yayi; nesi kughanaghana kuti munyake ndiyo wawovwirengepo.—1 Yoh. 3:​17, 18.

11. Kasi ntchivichi chingatovwira kuti tiŵe paubwezi na ŵanji?

¹¹ Nthowa yinyake iyo tingalongolera kuti tikuchindika ŵanji, nkhuŵagowokera mwaluŵiro para ŵatibudira. Lemba la Ŵaefeso 4:26 likuti: “Dazi lileke kunjira uku muchali na ukali.” Chifukwa wuli? Vesi 27 likuyowoya kuti kuchita nthena ‘kukumupa malo Dyabulosi.’ Mu Mazgu ghake, Yehova wakutiphalira mwakuwerezgawerezga kuti tigowokeranenge. Lemba la Ŵakolose 3:13 likutichiska kuti ‘tilutilire kugowokerana na mtima wose.’ Nakuti kusulako waka maubudi gha ŵanyithu, ni nthowa yiwemi chomene iyo tingaŵira nawo paubwezi. Para tachita nthena, tikovwira “kusungilira umoza wa mzimu mu chakukakira cha mtende.” (Efe. 4:3) Mwakudumura, tingayowoya kuti kugowokera ndiko nkhwakovwira chomene kuti tiŵe ŵakukolerana pakati pithu.

12. Kasi Yehova wakutovwira wuli kuti tigowokerenge ŵanji?

¹² Mbunenesko kuti nyengo zinyake vingatisuzga kugowokera awo ŵatikhuŵazga. Kweni na wovwiri wa mzimu wa Chiuta, tingaŵagowokera. Padera pa kutichiska kuti ‘titemwanenge na mtima wose’ kweniso kuti ‘tilimbikirenge ntchito,’ Malemba ghakutichiskaso kuti: “Golerani na mzimu.” Munthu uyo ‘ngwakugolera’ na mzimu wakuŵa wamwamphu na wakuthukutera pa kuchita vinthu chifukwa cha mzimu utuŵa. Ntheura mzimu wa Chiuta ungatovwira kuti titemwenge ŵanji kweniso kuŵagowokera na mtima wose. Lekani nyengo zose tikwenera kumulomba Yehova kufumira pasi pa mtima kuti watovwire.—Luka 11:13.

“PAŴAVYE KUGAŴIKANA PAKATI PINU”

13. Kasi ntchivichi chingambiska kugaŵikana pakati pithu?

¹³ Mu mpingo muli “ŵanthu ŵa mitundu yose” ŵakufuma mu mitheto yakupambanapambana. (1 Tim. 2:​3, 4) Usange tili maso yayi, ivi vingapangiska kuti tiŵe ŵakugaŵikana pa nkhani izo waliyose wakusankha yekha, nga kuvwara na kujitozga, kupwelelera umoyo withu, panji vyakusanguluska. (Rom. 14:4; 1 Kor. 1:10) Chifukwa chakuti Chiuta wali kutisambizga kuti titemwanenge, tikwenera kuŵa maso kuti tileke kuwona kuti ivyo ise tikusankha ndivyo ni viwemi chomene kuluska ivyo ŵanyithu ŵakusankha.—Fil. 2:3.

14. Kasi nyengo zose tikwenera kuyezgayezga kuchita vichi, ndipo chifukwa wuli?

¹⁴ Tingawovwiraso kuti mu mpingo muleke kuŵa kugaŵikana para tikuyezgayezga kusamphuskana na kukhozgana nyengo zose. (1 Tes. 5:11) Mu vyaka vyasonosono apa, ŵanthu ŵanandi awo ŵakalopwa panji awo ŵakafumiskika mu mpingo, ŵali kuwelera. Tikwenera kuŵapokelera mwachitemwa. (2 Kor. 2:8) Wonani ivyo vikachitikira mudumbu munyake uyo wakaweleraso mu mpingo pamanyuma pakuŵa wakulopwa kwa vyaka 10. Iyo wakati, “Ŵanthu wose ŵakanisekelera ndipo ŵakakorako chasa.” (Mil. 3:19) Kasi wakakhwaskika wuli? Iyo wakuti, “Nkhajipulika kuti woko la Yehova likunilongozga kuti niŵeso wakukondwa.” Usange tikukhozga ŵanji, Khristu wangatigwiliskira ntchito kuti tisamphuske awo ‘mbakuphyoka na kunyekezgeka.’—Mat. 11:​28, 29.

15. Kasi ni nthowa wuli yinyake iyo tingawovwilira kuti mu mpingo muŵe umoza? (Wonaniso chithuzi.)

¹⁵ Nthowa yinyakeso iyo tingawovwilira kuti mu mpingo muŵe umoza, nkhwizira mu ivyo tikuyowoya. Lemba la Yobu 12:11 likuti: “Asi khutu likuyezga mazgu, nga umo lulimi lukuchetera chakurya?” Nga umo munthu uyo wakumanya kuphika nyengo zose wakuchetera dankha chakurya chake kuti wawoneseske usange chikunowa pambere wandagaŵire ŵanji, nase tikwenera kughanaghanirapo dankha ivyo tiyowoyenge pambere tindayowoye. (Sal. 141:3) Nyengo zose tikwenera kuwoneseska kuti ivyo tikuyowoya ni vyakukhozga, vyakusamphuska, kweniso ‘vyachandulo ku awo ŵakupulika.’—Efe. 4:29.

16. Kasi mbanjani chomene awo ŵakwenera kuŵikapo mtima kuyowoya vinthu vyakukhozga?

¹⁶ Ŵafumu na ŵapapi ndiwo chomene ŵakwenera kuŵa maso na ivyo ŵakuyowoya mwakuti ŵakhozge ŵanji. (Kol. 3:​19, 21; Tito 2:4) Ŵalara nawo ŵakwenera kuyowoya vinthu ivyo vingasamphuska na kukhozga mberere za Yehova. (Yes. 32:​1, 2; Gal. 6:1) Ntharika ya mu Baibolo yikutikumbuska kuti: “Lizgu ilo layowoyeka pa nyengo yakwenelera ndiwemi nadi.”—Zinth. 15:23.

TITEMWANENGE “MU MILIMO NA UNENESKO”

17. Kasi tingachita wuli kuti tiwoneseske kuti tikuŵatemwa ŵabali na ŵadumbu kufumira pasi pa mtima?

¹⁷ Mpositole Yohane wakutichiska kuti “tingatemwananga na mazgu pera yayi nesi lulimi, kweni mu milimo na unenesko.” (1 Yoh. 3:18) Tikwenera kuŵatemwa ŵabali na ŵadumbu kufumira mu mtima. Kasi tingachita wuli? Para kanandi tikupatura nyengo yakuchezga na ŵabali na ŵadumbu ŵithu, tiŵenge nawo paubwezi ndipo titemwanenge chomene. Ntheura mupenjerezgenge mipata yakuchezgera na ŵanji, kwali mpha maungano panji mu uteŵeti. Kweniso mupaturenge nyengo yakwendera ŵanji. Para tachita nthena, tilongorenge kuti ‘tikusambizgika na Chiuta kuti titemwanenge.’ (1 Tes. 4:9) Ndipo tilutilirenge kujiwonera tekha kuti “ntchiwemi na chakukondweska nadi kuti ŵabali ŵakukhala pamoza mwakukolerana.”—Sal. 133:1.