Yezgani Ŵangelo Ŵakugomezgeka

1-2. (a) Kasi tikupambana wuli na ŵangelo? (b) Kasi tikuyana wuli na ŵangelo?

APO Yehova wakamuguzirani mu unenesko, wakamuchemerani mu mbumba yachitemwa iyo muli ŵasopi ŵake ŵakufuma mu mitundu yakupambanapambana, kusazgapo na ŵangelo ŵakugomezgeka mamiliyoni ghanandi. (Dan. 7:​9, 10) Para tikughanaghanira za ŵangelo, tingawona umo iwo ŵaliri ŵakupambana na ise. Mwachiyelezgero, ŵangelo ŵakhala nyengo yitali kuluska umo ise takhalira. (Yobu 38:​4, 7) Ndipo iwo mbankhongono chomene kuluska ise. Kweniso mbatuŵa na ŵakufikapo, ndipo ise tingayana nawo yayi chifukwa ndise ŵanthu ŵambura kufikapo.—Luka 9:26.

² Nangauli tikupambana mu vinyake na ŵangelo, kweni tikuyana mu vinandi. Mwachiyelezgero, nga mbangelo, nase tingalongora mikhaliro yiwemi ya Yehova. Nga mbangelo, nase tili na wanangwa wakusankha. Kweniso nga umo iwo ŵaliri, nase tili na mazina, mikhaliro, kweniso maudindo ghakupambanapambana. Ndipo mwakuyana waka na ŵangelo, nase tili na khumbo la kusopa Mlengi withu.—1 Pet. 1:12.

3. Kasi tingasambirako vichi ku ŵangelo ŵakugomezgeka?

³ Pakuti tikuyana mu vinandi na ŵangelo, chiyelezgero chawo chiwemi chingatikhozga kweniso kutisambizga. Nakuti tingasambirako vinandi ku ŵangelo. Mu nkhani iyi, tiwonenge umo tingayezgera ŵangelo pa nkhani ya kujiyuyura, kutemwa ŵanthu, kuzizipizga, kweniso kuchitapo kanthu kuti mpingo uŵenge wakutowa.

ŴANGELO MBAKUJIYUYURA

4. (a) Kasi ŵangelo ŵakulongora wuli kujiyuyura? (b) Chifukwa wuli ŵangelo mbakujiyuyura? (Salimo 89:7)

⁴ Ŵangelo ŵakugomezgeka mbakujiyuyura. Nangauli ŵakumanya vinandi, mbankhongono, kweniso mbavinjeru, kweni ŵakumupulikira Yehova. (Sal. 103:20) Apo ŵakuchita milimo yawo, ŵakujikuzga yayi chifukwa cha ivyo ŵachita panji kujilongora chifukwa cha nkhongono zawo zapadera. Iwo ŵakukondwa kuchita khumbo la Chiuta nanga vingaŵa kuti ŵanyake ŵakumanya yayi mazina ghawo.a (Gen. 32:​24, 29; 2 Mathe. 19:35) Kweniso ŵakukana kupokera ntchindi izo zikwenelera Yehova. Chifukwa wuli ŵangelo mbakujiyuyura chomene? Chifukwa ŵakumutemwa Yehova kweniso ŵakumuchindika chomene.—Ŵazgani Salimo 89:7.

5. Kasi mungelo munyake wakalongora wuli kujiyuyura apo wakapelekanga ulongozgi kwa mpositole Yohane? (Wonaniso chithuzi.)

⁵ Wonani chakuchitika chimoza icho chikulongora kuti ŵangelo mbakujiyuyura. Cha mu 96 C.E., mungelo munyake uyo zina lake likumanyikwa yayi, wakamuwoneska mboniwoni yakuzizwiska mpositole Yohane. (Chivu. 1:1) Kasi Yohane wakachita wuli wati wawona mboniwoni iyi? Wakayezga kuti wamusope mungelo uyu. Ndipouli, mungelo wakugomezgeka uyu mwaluŵiro wakamulekeska na kuyowoya kuti: “Chenjera! Kuchita nthena yayi! Nane ndine waka muzga munyako pamoza na ŵabali ŵako . . . Sopa Chiuta!” (Chivu. 19:10) Apa mungelo wakalongora kujiyuyura chomene. Ndipo wakakhumba yayi kupika ntchindi zambura kwenelera panji kulumbika. Mwaluŵiro wakaphalira Yohane kuti wasope Yehova Chiuta. Panyengo yimozamoza, mungelo wakamuyuyura yayi Yohane. Nangauli mungelo wakaŵa kuti wateŵetera Yehova kwa nyengo yitali kweniso wakaŵa wankhongono chomene kuluska Yohane, kweni mwakujiyuyura wakaphalira mpositole uyu kuti ni muzga munyake. Ndipo nangauli mungelo wakamupa ulongozgi Yohane, kweni wakamukalipira yayi mpositole muchekuru uyu. M’malo mwake, mungelo wakayowoya nayo mwalusungu. Wakwenera wakamanya kuti Yohane wakachita nthena chifukwa cha wofi.

6. Kasi tingaŵayezga wuli ŵangelo pa nkhani ya kujiyuyura?

⁶ Kasi tingaŵayezga wuli ŵangelo pa nkhani ya kujiyuyura? Nase apo tikuchita mauteŵeti ghithu tikwenera yayi kujikuzga panji kujilongora chifukwa cha ivyo tachita. (1 Kor. 4:7) Ndipo tikweneraso yayi kujiwona kuti ndise ŵapachanya kuluska ŵanyithu chifukwa chakuti tateŵetera Yehova kwanyengo yitali, panji chifukwa chakuti tili na mauteŵeti ghanyake. Nakuti para tili na milimo yinandi, ndipo tikweneraso chomene kujiwona kuti ndise ŵachoko chomene. (Luka 9:48) Nga mbangelo, nase tikwenera kuteŵetera ŵanji. Tikwenera yayi kujiwona kuti ndise ŵapachanya kuluska ŵanji.

7. Kasi tingalongora wuli kujiyuyura para tikupeleka ulongozgi kwa munthu munyake?

⁷ Tingalongoraso kujiyuyura para tikupeleka ulongozgi kwa munthu munyake, wangaŵa Mkhristu munyithu panji mwana withu. Apo tikupeleka ulongozgi, nyengo zinyake tingakhumbikwira kuti tiwupeleke mwankhongono. Kweni nga ni mungelo uyo wakapeleka ulongozgi kwa Yohane mwalusungu, nase tingawupeleka mwankhongono kweni mwambura kumukhuŵazga munyithu. Para ise tikujiwona kuti ndise ŵapachanya yayi, tipelekenge ulongozgi mwantchindi kweniso mwalusungu.—Kol. 4:6.

ŴANGELO ŴAKUTEMWA ŴANTHU

8. (a) Kuyana na Luka 15:​10, kasi ŵangelo ŵakulongora wuli kuti ŵakutemwa ŵanthu? (b) Kasi ŵangelo ŵakutovwira wuli pa mulimo wakupharazga? (Wonaniso chithuzi.)

⁸ Ŵangelo ŵakuwona kuti ŵanthu mbapasi yayi. Iwo ŵakuŵatemwa ŵanthu. Ŵakukondwa chomene para wakwananga walapa panji kuti para mberere yakuzgeŵa yawelera kwa Yehova, panjiso para munthu waliyose wasintha na kusambira unenesko. (Ŵazgani Luka 15:10.) Ŵangelo ŵakovwiraso chomene pa mulimo wakupharazga vya Ufumu. (Chivu. 14:6) Nangauli iwo ŵakupharazgira ŵanthu mwakudunjika yayi, kweni ŵangalongozgera mupharazgi kwa munthu uyo wakukhumba kusambira vya Yehova. Kweni tingayowoya mwakusimikizga yayi kuti nyengo yiliyose iyo tasanga munthu wakunweka ndikuti ŵangelo ndiwo ŵatilongozgerako. Nakuti Yehova wangagwiliskiraso ntchito nthowa zinyake kuti wawovwire ŵanthu, nga ni mzimu utuŵa kovwira ŵanthu panji kulongozga ŵateŵeti ŵake. (Mil. 16:​6, 7) Kweni nipera Yehova wakugwiliskiraso ntchito chomene ŵangelo. Ntheura para tikupharazga makani ghawemi, tingaŵa na chigomezgo chose kuti ŵangelo ŵaŵenge nase kuti ŵatovwire.—Wonani bokosi lakuti “Malurombo Ghawo Ghakazgoleka.”b

9. Kasi tingaŵayezga wuli ŵangelo pa nkhani ya kutemwa ŵanthu?

⁹ Kasi tingaŵayezga wuli ŵangelo pa nkhani ya kutemwa ŵanthu? Para tapulika chipharazgo chakuti munyake wawezgekeramo, tikwenera kukondwa nga umo ŵangelo ŵakuchitira. Tikwenera kumupokelera na mawoko ghaŵiri mubali withu kulongora kuti nase takondwa. (Luka 15:​4-7; 2 Kor. 2:​6-8) Tingaŵayezgaso ŵangelo para tikuchita vyose ivyo tingafiska pa mulimo wakupharazga. (Muph. 11:6) Ndipo nga umo ŵangelo ŵakutovwilira pakupharazga makani ghawemi, naseso tikwenera kupenjerezga nthowa za umo tingawovwilira ŵabali na ŵadumbu pa uteŵeti wawo. Mwachiyelezgero, tingapharazgira lumoza na mupharazgi muphya. Panji tingawovwira ŵabali na ŵadumbu ŵachekuru panji ŵakunyotwa kuti nawo ŵapharazgenge.

10. Kasi tingasambirako vichi kwa Sara?

¹⁰ Wuli usange tikutondeka kuchita vinandi chifukwa cha umo vinthu viliri pa umoyo withu? Tingasangaso nthowa zinyake za umo tingagwilira lumoza na ŵangelo pa mulimo wakupharazga. Wonani ivyo vikachitikira Sara,c mudumbu wa ku India. Pamanyuma pa kuchita upayiniya kwa vyaka 20, Sara wakalwara chomene ndipo wakatondekanga na kwenda wuwo. Ntchakupulikikwa kuti wakasuzgika chomene maghanoghano. Kweni na wovwiri wa ŵabali na ŵadumbu kweniso chifukwa cha kuŵazga Baibolo nyengo zose, pachoko na pachoko Sara wakambaso kukondwa. Ndipouli wakeneranga kusanga nthowa ziphya za umo wangapharazgira kuyana na umo vinthu vikaŵira pa umoyo wake. Pakuti wakatondekanga na kuwuka wuwo kuti walembe makalata, wakachitanga waka upharazgi wa pa foni. Ntheura wakayimbira maulendo ghake ghakuwelerako, kweni ŵanthu aŵa ŵakamuphalira kuti paliso ŵanthu ŵanyake ŵakunweka. Kasi chikachitika ntchivichi? Mu myezi yichoko waka, Sara wakaŵa na masambiro gha Baibolo 70, ndipo masambiro agha ghakaŵa ghakuti wangaghakwaniska yayi pa iyoyekha. Ntheura wakapeleka ghanyake ku ŵanyake mu mpingo. Ndipo pasono ghanandi mwa masambiro agha ghakwiza pa maungano. Ŵangelo ŵakwenera kuti ŵakukondwa chomene kuteŵetera lumoza na ŵabali na ŵadumbu ŵa nga ni Sara, awo ŵakuchita vyose ivyo ŵangafiska pa mulimo wakupharazga.

ŴANGELO ŴAKUZIZIPIZGA

11. Kasi ŵangelo ŵakugomezgeka ŵalongora wuli kuzizipizga munthowa yapadera?

¹¹ Ŵangelo ŵakugomezgeka ni viyelezgero viwemi chomene pa nkhani ya kuzizipizga. Ŵazizipizga vinthu vyambura urunji kweniso uheni kwa vyaka masauzandi ghanandi. Ŵakawona Satana kweniso ŵangelo ŵanyake ŵanandi, awo pakwamba ŵakateŵeteranga lumoza, ŵakumugalukira Yehova. (Gen. 3:1; 6:​1, 2; Yuda 6) Baibolo likuyowoya za mungelo munyake wakugomezgeka uyo wakalimbana na chiŵanda chankhongono kwa mazuŵa ghanandi. (Dan. 10:13) Kweniso kufumira waka apo ŵanthu ŵakalengekera, ŵangelo ŵawonapo ŵanthu ŵachoko waka awo ŵakuyezgayezga kusopa mwaunenesko. Nangauli vili nthena, ŵangelo ŵakugomezgeka aŵa ŵakulutilira kuteŵetera Yehova mwakukondwa kweniso mwamwamphu. Ŵakumanya kuti pa nyengo yakwenelera, Chiuta wazamuwuskapo vinthu vyose vyambura urunji.

12. Kasi ntchivichi chingatovwira kuzizipizga?

¹² Kasi tingaŵayezga wuli ŵangelo pa nkhani ya kuzizipizga? Nga mbangelo, nase tingasangana na vinthu vyambura urunji panji tingasuskika. Kweni nga ndiwo, nase tili na chigomezgo chose kuti pa nyengo yakwenelera, Chiuta wazamuwuskapo uheni wose. Ntheura nga mbangelo ŵakugomezgeka, tikuvuka yayi “pakuchita icho ntchiwemi.” (Gal. 6:9) Ndipo Chiuta watilayizga kuti watovwirenge kuzizipizga. (1 Kor. 10:13) Tingalomba kwa Yehova kuti watipe mzimu wake, uwo utovwirenge kuŵa ŵakuzizipizga kweniso ŵachimwemwe. (Gal. 5:22; Kol. 1:11) Kweni wuli usange mukususkika? Thembani Yehova, ndipo mungawopanga yayi. Nyengo zose Yehova wamovwiraninge na kumupani nkhongono.—Heb. 13:6.

ŴANGELO ŴAKOVWIRA KUTI MPINGO ULUTILIRE KUŴA WAKUTOWA

13. Kasi ŵangelo ŵali na mulimo wuli wapadera mazuŵa ghano? (Mateyu 13:​47-49)

¹³ Mu mazuŵa ghaumaliro agha, Yehova waŵapa ŵangelo mulimo wapadera. (Ŵazgani Mateyu 13:​47-49.) Mulimo wakupharazga ukukopa ŵanthu mamiliyoni ghanandi ŵakufuma mu mitundu yose. Ŵanyake ŵakuchitapo kanthu na kuŵa Ŵakhristu ŵaunenesko, apo ŵanyake ŵakuchitapo kanthu yayi. Ŵangelo ŵali kupika mulimo wa “kupatura ŵaheni kufuma pa ŵarunji.” Ichi chikung’anamura kuti iwo ŵali kupika mulimo wakovwira kuti mpingo ulutilire kuŵa wakutowa. Ndipouli, ichi chikung’anamura kuti waliyose uyo waleka kuwungana nase kwali pa chifukwa wuli ndikuti walekenge kuweleraso yayi mu mpingo; panji chikung’anamuraso kuti mu mpingo mulekenge kuŵa masuzgo yayi. Kweni tingaŵa na chigomezgo chose kuti ŵangelo ŵakufwilirapo chomene kuti mpingo ulutilire kuŵa wakutowa.

14-15. Kasi tingaŵayezga wuli ŵangelo pa nkhani ya kufipira mtima mpingo kuti ulutilire kuŵa wakutowa? (Wonaniso vithuzi.)

¹⁴ Kasi tingaŵayezga wuli ŵangelo pa nkhani ya kufipira mtima mpingo kuti ulutilire kuŵa wakutowa? Tingaŵayezga para tikuchitapo kanthu kuti mpingo ulutilire kuŵa wakutowa. Ntheura tikwenera kuyezgayezga kuvikilira mtima withu pakusankha ŵabwezi ŵawemi, kweniso kukana chilichose icho chingananga ubwezi withu na Yehova. (Sal. 101:3) Tikweneraso kovwira Ŵakhristu ŵanyithu kuti ŵalutilire kuŵa ŵakugomezgeka kwa Yehova. Mwachiyelezgero, kasi tikwenera kuchita wuli para tamanya kuti Mkhristu munyithu wachita kwananga kukuru? Chifukwa chakuti tikumutemwa, tikwenera kumuchiska kuti wakaphalire ŵalara. Usange watondeka, ise ndise tilute kukaŵaphalira. Tikuchita nthena chifukwa chakuti tikukhumba Mkhristu munyithu wawovwirike mwaluŵiro.—Yak. 5:​14, 15.

¹⁵ Chachitima ntchakuti, ŵanyake awo ŵachita kwananga kukuru ŵakufumiskika mu mpingo. Para vyanthena vyachitika, tikwenera ‘kuleka kwenderana’ nawo.d (1 Kor. 5:​9-13) Ndondomeko iyi yikovwira kuti mpingo ulutilire kuŵa wakutowa. Kweniso para taleka kwenderana na awo ŵafumiskika mu mpingo, tikulongora kuti tikuŵatemwa. Kuchita nthena kukovwira kuti ŵajinyumwe. Para ŵajinyumwa na kuwelera, tikukondwa pamoza na Yehova na ŵangelo.—Luka 15:7.

16. Kasi imwe muŵayezgenge ŵangelo munthowa wuli?

¹⁶ Ntheura ni mwaŵi wapadera chomene uwo tili nawo wakugwilira ntchito lumoza na ŵangelo. Tiyeni tiyezge mikhaliro yawo yiwemi, iyo nkhujiyuyura, kutemwa ŵanthu, kuzizipizga, kweniso kufipira mtima mpingo kuti ulutilire kuŵa wakutowa. Usange tiŵayezgenge ŵangelo ŵakugomezgeka, nase tiŵenge mu mbumba ya Yehova kwamuyirayira.