NKHANI YAKUSAMBIRA 34
SUMU 3 Nkhongono na Chigomezgo Chithu
Gomezgani Kuti Yehova Wakugowokera
“Mukanigowokera mphuvya zane na zakwananga zane.”—SAL. 32:5.
FUNDO YIKURU
Mu nkhani iyi tiwonenge chifukwa icho tikwenera kugomezgera kuti Yehova wakugowoka kweniso umo Baibolo likutisimikizgilira kuti Yehova wakugowokera ŵakwananga awo ŵang’anamuka mtima.
1-2. Kasi ŵakwananga awo ŵang’anamuka mtima ŵangajipulika wuli para Yehova waŵagowokera? (Wonaniso chithuzi.)
THEMBA Davide likamanyanga umo munthu wakujipulikira para wakujiyimba mulandu chifukwa cha zakwananga izo wakachita kumasinda. (Sal. 40:12; 51:3; mazgu ghapachanya) Iyo wakachita zakwananga zinyake zikuru pa umoyo wake. Kweni wakang’anamuka mtima, ndipo Yehova wakamugowokera. (2 Sam. 12:13) Ntheura Davide wakamanyanga umo munthu wakujipulikira para Yehova wamugowokera.—Sal. 32:1.
2 Nga ni Davide, nase tingajipulika makora para tamanya kuti Yehova watigowokera. Ntchakukhozga chomene kumanya kuti Yehova ngwakukhumbisiska kutigowokera zakwananga zithu nanga zingaŵa zikuru wuli, chikuru ise tang’anamuka mtima, kuphara zakwananga zithu, na kuchita vyose ivyo tingafiska kuti tileke kuchitaso zakwananga izo. (Zinth. 28:13; Mil. 26:20; 1 Yoh. 1:9) Kweniso ntchakukhozga chomene kumanya kuti para watigowokera wakusisitirathu, ndipo vikuŵa nga tikachitaso yayi kwananga uko.—Ezek. 33:16.
Themba Davide likata masalimo ghanandi ghakulongosora umo Yehova wakugowokelera (Wonani ndime 1-2)
3-4. Kasi mudumbu munyake wakajipulikanga wuli pamanyuma pa kubatizika, ndipo tidumbiskanenge vichi mu nkhani iyi?
3 Ndipouli, ŵanyake nyengo zinyake vingaŵasuzga kugomezga kuti Yehova waŵagowokera. Wonani chiyelezgero cha Jennifer, uyo wakakulira mu unenesko. Apo wakaŵa muwukirano, wakamba kuchita nkharo zawakawaka ndipo wakaŵa na umoyo wapaŵiri. Kweni vyaka vyati vyajumphapo, wakasintha na kuwelera kwa Yehova ndipo pamanyuma wakabatizika. Iyo wakuti: “Kale nkhatemwanga chomene ndalama, kuchita uzaghali, kuloŵera, kweniso nkhaŵa mukali chomene. Mu mtima nkhamanyanga kuti nati nang’anamuka mtima na kupempha chigowokero, nkhatozgeka na sembe ya Khristu. Kweni nkhakhorwa yayi kuti wanigowokera nadi.”
4 Kasi namwe nyengo zinyake vikumusuzgani kugomezga kuti Yehova wali kumugowokerani zakwananga izo mukachita kumasinda? Yehova wakukhumba kuti tikhorwenge para watilongora lusungu nga umo wakachitira Davide. Mu nkhani iyi tidumbiskanenge chifukwa icho tikwenera kugomezgera kuti Yehova watigowokera, kweniso ivyo vingatovwira kuti tikhorwe kuti watigowokera nadi.
CHIFUKWA WULI NTCHAKUZIRWA KUGOMEZGA KUTI YEHOVA WATIGOWOKERA?
5. Kasi Satana wakukhumba kuti tigomezge vichi? Yowoyani chiyelezgero.
5 Para tikugomezga kuti Yehova watigowokera, tigegenge kuwira mu chipingo cha Satana. Kumbukani kuti Satana wachitenge chilichose kuti watilekeske kuteŵetera Yehova. Kuti wafiske chilato chake, Satana wangatipangiska kugomezga kuti zakwananga zithu zingagowokereka yayi. Ghanaghanirani vya nkhani ya mwanalume wa ku Korinte uyo wakafumiskika mu mpingo chifukwa cha uzaghali. (1 Kor. 5:1, 5, 13) Wati wang’anamuka mtima, Satana wakakhumbanga ŵanthu ŵa mu mpingo ŵaleke kumugowokera na kukana kumupokeleraso mu mpingo. Pa nyengo yimozamoza, Satana wakakhumbangaso kuti munthu wakung’anamuka mtima uyu wajiwonenge kuti wangagowokereka yayi, mwakuti ‘waŵe na chitima chakujumphizga’ icho chikatenge chimutondeskenge kuteŵetera Yehova. Satana wandasinthe chilato chake panji njomba zake. Kweni ise “tili ŵalemwa chara na njomba zake.”—2 Kor. 2:5-11, bi7.
6. Kasi tingachita wuli kuti tileke kujiyimba mulandu na zakwananga izo tikachita kumasinda?
6 Para tagomezga kuti Yehova watigowokera, tingaleka kujiyimba mulandu. Mwakawiro, para tananga tikujiyimba mulandu. (Sal. 51:17) Kuchita nthena nkhuwemi waka. Njuŵi yithu yingatichiska kuti tichitepo kanthu kuti tinozge ivyo tikabudiska. (2 Kor. 7:10, 11) Ndipouli, para tikujiyimba mulandu kwanyengo yitali nanga mphamanyuma pakuti tang’anamuka mtima, mbwenu tingawelelerathu nyuma. Kweni para tagomezga kuti Yehova watigowokera, tingaleka kujiyimba mulandu. Ndipo para tachita nthena, titeŵeterenge Yehova na njuŵi yiwemi kweniso ŵachimwemwe nga umo iyo wakukhumbira. (Kol. 1:10, 11; 2 Tim. 1:3) Kweni kasi tingachita wuli kuti tikhorwe kuti Chiuta watigowokera?
KASI NTCHIVICHI CHINGATOVWIRA KUTI TIGOMEZGE KUTI YEHOVA WATIGOWOKERA?
7-8. Kasi Yehova wakajilongosora wuli kwa Mozesi, ndipo ivi vikutovwira kuti tileke kukayikira vichi? (Ekisodo 34:6, 7)
7 Mughanaghanirenge umo Yehova wali kujilongosolera. Mwachiyelezgero, wonani ivyo Yehova wakayowoya kwa Mozesi pa Phiri la Sinayi.a (Ŵazgani Ekisodo 34:6, 7.) Nangauli Yehova wali na mikhaliro yinandi yiwemi, kweni wakasankha kuphalira Mozesi kuti iyo ni “Chiuta walusungu na wachiwuravi.” Kasi Chiuta wanthena wangaleka kugowokera muteŵeti wake uyo wang’anamuka nadi mtima? Vingachitika yayi! Kuchita nthena zingaŵa nkhaza zikuru chomene kweniso vingalongora nga kuti Yehova ni munonono mtima, kweni tikumanya kuti ndimo waliri yayi.
8 Tikugomezga kuti umo Yehova wali kujilongosolera mbunenesko, wangateta yayi chifukwa iyo ni Chiuta waunenesko. (Sal. 31:5) Ntheura tikukayikira yayi ivyo wakuyowoya. Usange muchali kujiyimba mulandu chifukwa cha zakwananga izo mukachita kumasinda, jifumbani kuti: ‘Kasi nkhugomezga kuti Yehova ngwalusungu nadi kweniso wachiwuravi, ndipo wangaleka yayi kumugowokera munthu waliyose uyo wang’anamuka mtima? Usange ni nthena, kasi nkhwenera kugomezga yayi kuti naneso wanigowokera?’
9. Kasi lemba la Salimo 32:5 likutisambizga vichi pa nkhani ya umo Yehova wakugowokelera zakwananga zithu?
9 Mughanaghanirenge ivyo awo ŵakalemba Baibolo ŵakayowoya vya umo Yehova wakugowokelera. Mwachiyelezgero, ghanaghanirani umo Davide wakamulongosolera Yehova pa umo wakugowokelera. (Ŵazgani Salimo 32:5.) Davide wakati: “Mukanigowokera mphuvya zane na zakwananga zane.” Lizgu la Chihebere ilo likang’anamurika kuti “kugowokera” lingang’anamura “kunyamura,” “kuwuskapo,” panji “kuyegha.” Ntheura apo Yehova wakagowokera Davide, vikaŵa nga kuti wakanyamura zakwananga zake na kuzitaya kutali. Davide sono wakamba kujipulika makora, wakaleka kujiyimbaso mulandu. (Sal. 32:2-4) Nase tingajipulika mwakuyana waka. Para tang’anamuka nadi mtima, tikweneraso yayi kujiyimba mulandu chifukwa cha zakwananga izo Yehova wanyamura kale na kuzitaya kutali na ise.
10-11. Kasi mazgu ghakuti ‘ngwakunozgeka kugowokera’ ghakutiphalira vichi vya Yehova? (Salimo 86:5)
10 Ŵazgani Salimo 86:5. Apa Davide wakamulongosora Yehova kuti ‘ngwakunozgeka kugowokera.’ Pakulongosorapo pa mazgu agha, buku linyake lakulongosora Baibolo likati Yehova, “Ngwakugowoka, ndipo ‘ndimo waliri.’” Chifukwa wuli Yehova ngwakugowoka? Chigaŵa chachiŵiri cha vesi ili na mazgu ghamusi chikuti: “Ndimwe wakuzura na chitemwa chakugomezgeka ku wose awo ŵakuchema pa imwe.” Nga umo tikasambilira mu nkhani iyo yajumpha, chitemwa chakugomezgeka chikumutuma Yehova kuti waŵatemwenge chomene ŵateŵeti ŵake ŵakugomezgeka, ndipo chitemwa ichi ntchamuyirayira. Ntheura chitemwa chakugomezgeka ichi, chikumutuma kuti ‘wagowokerenge na mtima wose’ ŵanthu wose awo ŵang’anamuka mtima. (Yes. 55:7, mazgu ghamusi) Usange vikumusuzgani kugomezga kuti Chiuta wamugowokerani, jifumbani kuti: ‘Kasi nkhukhorwa kuti Yehova ngwakugowoka, ndipo ngwakunozgeka kugowokera wose awo ŵang’anamuka mtima ndipo ŵakumupempha kuti waŵalongore lusungu? Ntheura kasi nkhwenera kuzomerezga yayi kuti wali kunigowokera nkhati namulomba kuti wanilongore lusungu?’
11 Tikupembuzgikaso kumanya kuti Yehova wakumanya makora kuti ndise ŵambura kufikapo. (Sal. 139:1, 2) Fundo iyi yikuwoneka makora chomene mu salimo linyake la Davide, ndipo nalo lingatovwira kugomezga kuti Yehova wakutigowokera.
KULUWA YAYI IVYO YEHOVA WAKUKUMBUKA
12-13. Kuyana na Salimo 103:14, kasi Yehova wakukumbuka vichi vya ise, ndipo ivi vikumuchiska kuchitachi?
12 Ŵazgani Salimo 103:14. Davide wakayowoya kuti Yehova “wakukumbuka kuti tili fuvu.” Pakuyowoya mazgu agha, Davide wakalongosoranga chifukwa icho Yehova waliri wakunozgeka kugowokera ŵateŵeti ŵake awo ŵang’anamuka mtima: Wakumanya kuti ndise ŵambura kufikapo. Kuti tipulikiske makora fundo iyi, tiyeni tidumbiskane mazgu gha Davide agha.
13 Davide wakayowoya kuti Yehova “wakumanya makora umo tili kupangikira.” Iyo wakapanga Adamu “kufuma ku dongo la pasi” ndipo wakumanya makora kuti nanga ŵangaŵa ŵanthu ŵakufikapo, nawo ŵakukhumbikwira vinthu vinyake kuti ŵalutilire kuŵa na umoyo. Mwachiyelezgero, ŵakukhumbikwira kurya, kugona, na kuthuta. (Gen. 2:7) Kweni Adamu na Eva ŵati ŵananga, ŵakasazgirako masuzgo ghanyake. Pakuŵa ŵana ŵawo, tili kuhara kwananga uko kukutipangiska kuti nyengo zinyake tichitenge vinthu viheni. Yehova wakumanya waka kuti tili ŵakwananga yayi; Davide wakatiso Yehova “wakukumbuka.” Lizgu la Chihebere ilo lili kugwiliskirika ntchito apa lingang’anamuraso kuchitapo kanthu munthowa yiwemi. Mwakudumura tingati mazgu gha Davide ghakung’anamura kuti: Yehova wakumanya kuti nyengo zinyake tinangenge; ndipo para tachita nthena, iyo ngwakunozgeka kutilongora lusungu na kutigowokera usange tang’anamuka nadi mtima.—Sal. 78:38, 39.
14. (a) Kasi Davide wakalongosora vichi vya umo Yehova wakugowokelera? (Salimo 103:12) (b) Kasi umo Yehova wakagowokelera Davide vikulongora wuli kuti para wagowoka wakuwuskirapothu zakwananga? (Wonani bokosi lakuti “Umo Yehova Wakugowokelera na Kuluwako.”)
14 Kufuma pa salimo ili, kasi ntchivichi chingatovwiraso kugomezga kuti Yehova watigowokera? (Ŵazgani Salimo 103:12.) Davide wakayowoyaso kuti para Yehova watigowokera, wakuŵika zakwananga zithu kutali chomene, nga “umo uliri utali kufuma kumafumiro gha dazi kuya kumanjiliro gha dazi.” Kumafumiro gha dazi kuli kutalikirana chomene na kumanjiliro gha dazi; ndipo kuzamukumanapo yayi. Kasi ivi vikutiphalira vichi vyakukhwaskana na zakwananga izo Yehova wagowoka? Buku linyake likuyelezgera munthowa iyi: “Usange zakwananga zithu Chiuta wazitaya kutali chomene na ise, vikuŵa nga watayirathu chinthu chinyake mwakuti na sungu lake lingapulikikwaso yayi. Ntheura tikwenera kugomezga kuti wazamuzikumbukaso yayi panji kutilangiraposo.” Nyengo zinyake sungu la chinthu chinyake lingatikumbuska vinthu vinyake. Kweni para Yehova watigowokera, vikuŵa nga wawuskapo sungu lililose ilo lingakhalilira, ilo lingapangiska kuti wakumbuke zakwananga izo watigowokera kale ndipo paumaliro na kutilangirapo.—Ezek. 18:21, 22; Mil. 3:19.
15. Kasi tingachita wuli usange tikujiyimba mulandu na zakwananga izo tikachita kumasinda?
15 Kasi mazgu gha Davide gha mu Salimo 103 ghangatovwira wuli kugomezga kuti Yehova watigowokera? Usange tichali kujiyimba mulandu na zakwananga izo tikachita kumasinda, tingajifumba kuti: ‘Kasi ndikuti naluwa ivyo Yehova wakukumbuka, panji kuti naluwa kuti iyo wakukumbuka kuti ndine wambura kufikapo ndipo wakugowokera wakwananga uyo wang’anamuka mtima nga ndine? Kweniso, kasi nkhukumbuka ivyo Yehova wakusankha kuluwako, panji kuti nkhukumbuka zakwananga izo iyo wali kunigowokera kale ndipo ni zakuti wazamunilangiraposo yayi?’ Yehova wakughanaghaniraso yayi zakwananga izo tikachita kumasinda. Ntheura nase tikwenera yayi kuzighanaghanira. (Sal. 130:3) Usange tikugomezga kuti Yehova watigowokera, tilekenge kujiyimba mulandu chifukwa cha zakwananga izo tikachita kumasinda.
16. Yowoyani chiyelezgero icho chikulongora uheni wakujiyimba mulandu chifukwa cha zakwananga izo tikachita kumasinda. (Wonaniso chithuzi.)
16 Wonani chiyelezgero ichi. Kujiyimba mulandu na zakwananga izo mukachita kumasinda, vikuyana waka na kwendeska galimoto uku mukulaŵiska waka pa kagilasi kakovwira kulaŵiska kumasinda. Mbunenesko kuti ntchiwemi kuti nyengo zinyake muwonengepo pa kagilasi aka, chifukwa vingamovwirani kuŵa maso na ivyo vikuchitika kumasinda kwinu. Kweni kuti mugege kuchita ngozi, mukwenera kulaŵiska kunthazi uko mukuluta. Mwakuyana waka, nyengo zinyake chingaŵa chiwemi waka kukumbuka ivyo tikabudiska kumasinda; vingatovwira kuti tisambirepo kanthu na kuŵikapo mtima kuti tileke kuzakazichitaso. Kweni para tikulutilira kughanaghanira waka ivyo tikabudiska kumasinda, tingatondeka kuchita vinandi sono pakuteŵetera Chiuta. M’malo mwake, tikwenera kulutilira kulaŵiska pa nthowa iyo tikwendapo. Tili pa nthowa yakulongozgera ku umoyo mu charu chiphya cha Chiuta, umo vinthu viheni vyakale ‘vizamukumbukikaso yayi.’—Yes. 65:17; Zinth. 4:25.
Nga umo dilayivala wakukhumbikwira kulaŵiska kunthazi para wali pa msewu m’malo mwa kulaŵiska waka pa kagilasi kakovwira kulaŵiska kumasinda, nase tikwenera kuŵika mtima chomene pa vitumbiko ivyo tizamusanga munthazi m’malo mwa zakwananga izo tikachita kumasinda (Wonani ndime 16)
LUTILIRANI KUGOMEZGA KUTI YEHOVA WAKUGOWOKA
17. Chifukwa wuli tikwenera kulutilira kukhorweska mtima withu kuti Yehova wakutitemwa kweniso kutigowokera?
17 Tikwenera kulutilira kukhorweska mtima withu kuti Yehova wakutitemwa na kutigowokera. (1 Yoh. 3:19, mazgu ghamusi) Chifukwa wuli? Chifukwa chakuti Satana walekengepo yayi kuyezgayezga kutipangiska kugomezga kuti Yehova wakutitemwa yayi panji kugowoka. Mulimose umo vingaŵira, chilato chake ntchimoza, kutilekeska kuteŵetera Yehova. Tikwenera kukhazga kuti Satana walutilirenge kuchita ivi chifukwa wakumanya kuti nyengo iyo yamukhalira njichoko. (Chivu. 12:12) Tingamuzomerezganga yayi kuti watithereske.
18. Kasi mungachita vichi kuti mukhorweske mtima winu kuti Yehova wakumutemwani kweniso kumugowokerani?
18 Kuti mulutilire kukhorwa kuti Yehova wakumutemwani, londezgani masachizgo agho tikadumbiskana mu nkhani yajumpha. Kweniso kuti mukhorwe kuti Yehova wamugowokerani, ghanaghanirani umo Yehova wali kujilongosolera. Ghanaghaniraniso ivyo wakachiska awo ŵakalemba Baibolo kulemba vyakukhwaskana na umo wakugowokelera. Kuluwa yayi kuti wakumanya makora kuti ndimwe ŵambura kufikapo ndipo wachitenge namwe vinthu mwalusungu. Ndipo kumbukani kuti para wagowoka, wakugowokelerathu. Para mwachita nthena, muzamuŵa ŵakukondwa chifukwa cha kumanya kuti Yehova wamulongorani lusungu, ndipo nga ni Davide namwe muzamuyowoya kuti, “Nkhumuwongani chomene Yehova, chifukwa mukanigowokera ‘mphuvya zane na zakwananga zane.’”—Sal. 32:5.
SUMU 1 Makhaliro gha Yehova
a Wonani nkhani yakuti “Yandikirani Mulungu—Yehova Anafotokoza Makhalidwe Ake” mu Gongwe la Mulinda la Chichewa la Meyi 1, 2009.