GEORGIA
Nkhawonanga Kuti Vinthu Vikunendera Makora
Madona Kankia
WAKABABIKA MU 1962
WAKABATIZIKA MU 1990
MBIRI YAKE Pakwamba wakaŵa mu chipani cha Communist ku Georgia, kweni sono wawovwira ŵanthu ŵanandi kumanya unenesko. Mu 2015, wakaŵa yumoza wa awo ŵakaŵa mu kilasi lakwamba la Sukulu ya Ŵapharazgi ŵa Ufumu ku Tbilisi.
NKHAMBA kupulika vya unenesko wa mu Baibolo mu 1989. Pa nyengo iyi, nkhaŵa na udindo mu chipani cha Communist kukwithu ku Senaki ndipo nkhamanyikwanga chomene. Nyengo zose nkhasangikanga pakati pa ŵanthu ŵa mu Supreme Soviet of Georgia, iyo yikuyanako na mphara ya malango. Nkhaŵaso na munyamata uyo tikapangana kuti titoranenge, ntheura nkhawonanga kuti vinthu vikunendera makora.
Ŵapapi ŵane ŵakanisambizga kutemwa Chiuta nichali muchoko. Ntheura nkhagomezganga kuti Chiuta waliko, nangauli nkhaŵa na maghanoghano gha chi Communist. Nkhati namba kusambira Baibolo, nkhasanga mazgoro ghakukhorweska pa mafumbo agho nkhaŵa nagho. Ichi chikanipangiska kuti nijipeleke kwa Yehova. Kweni ŵabali ŵane, ŵabwezi ŵane, ŵanyane ŵa chipani, na chibwezi chane ŵakakolerana navyo yayi.
Ŵabali ŵane ŵakanikana chifukwa cha ivyo nkhamba kugomezga, kweniso vikakolerananga yayi na ndyali izo nkhachitanga. Ntheura nkhawona kuti ntchiwemi nifumepo waka pa nyumba, nimazge chibwezi, na kuleka ntchito kweniso kufuma mu chipani cha Communist na gulu la Supreme Soviet. Nkhati nabatizika, ŵabwezi kweniso ŵabali ŵane ŵakanitinkhaso chomene. Pakuti nkhaŵa munthu wakumanyikwa mu msumba wakwithu, nkhasamukira ku msumba wa Kutaisi. Nkhati nafika waka, nkhamba kuchita upayiniya.
Para ŵanthu ŵakunifumba usange chikaŵa chakwenelera nadi kusuzgika nthena chifukwa cha chipulikano chane, nkhuŵaphalira waka kuti nili wakukondwa chomene chifukwa cha ivyo nili kusankha. Nangauli ŵapapi ŵane ŵakanipulikiska yayi pa ivyo nkhasankha, kweni nkhuŵawonga chomene kuti ŵakanisambizga kutemwa Chiuta na ŵazengezgani. Ivi vyanovwira chomene pa umoyo wane.