Vinyake Ivyo Vikachitika Chaka Chajumpha

APO masuzgo ghakulutilira mu charu cha Satana ichi, ŵanthu ŵa Yehova nawo ŵakulutilira kuchita “vinandi mu mulimo wa Fumu.” (1 Kor. 15:58) Malipoti ghakulondezgapo ghakulongora kuti Ŵakaboni ŵa Yehova pa charu chose ‘ŵakugomezga Yehova . . . ŵakuchita uwemi . . . na kuchita mwakugomezgeka.’—Sal. 37:3.

Kusamuska Ofesi Yikuru na Munthavi

Mulimo wakusazgirako ofesi ya Wallkill ku New York, ukamara pa Febuluwale 1, 2016, ndipo ichi chachitiska kuti Komiti ya Munthavi ya ku United States, Dipatimenti Yakulaŵilira Uteŵeti, na madipatimenti ghanyake gha ofesi ya munthavi ya ku United States ghasamukire ku Wallkill. Pakuti sono mulimo wakuzenga ofesi yikuru ku Warwick ukumara, ŵabali pa Beteli ya ku Brooklyn ŵali pa kalikiliki kusama mu New York City na kuluta ku ofesi yiphya iyi.

Ŵanthu ŵazamwamba kuzomerezgeka kuwona malo pa ofesi yikuru ku Warwick pa Mande, Epulero 3, 2017. Pazamuŵa nthowa ziŵiri zakuwonera malo. Ŵalendo ŵazamuŵa na mwaŵi wa kwenda ŵekha na kuwona vinthu vyakupambanapambana mu vithuzithuzi panji pa sikirini. Nthowa yinyake njakuti ŵalendo ŵazamulongozgeka na munthu. Vigaŵa ivyo ŵalendo ŵazamuwona ŵekha kwambura kulongozgeka na munthu ni ivi:

1. “The Bible and the Divine Name” Pa chigaŵa ichi, ŵalendo ŵazamuwona Mabaibolo ghanyake agho panji ŵandaghawonepo kweniso ŵazamuwona ukaboni wakuti zina la Chiuta likwenera nadi kusangika mu Baibolo.

2. “A People for Jehovah’s Name” Pa chigaŵa ichi, ŵalendo ŵazamumanya mdauko wa Ŵakaboni ŵa Yehova, kweniso ŵazamuwona umo Yehova wasinthira vinthu pachokopachoko pa nkhani ya kulongozga, kusambizga, na kuwunganya ŵanthu ŵake kuti ŵachitenge khumbo lake.

3. “World Headquarters—Faith in Action” Pa chigaŵa ichi, ŵalendo ŵazamupulika ivyo makomiti gha Wupu Wakulongozga ghakuchita pakovwira ŵanthu ŵa Yehova kuti ŵawunganenge, ŵapharazgenge, ŵaryenge chakurya chauzimu kweniso kuti ŵatemwanenge.

Nyengo yakwambira kuwona vinthu vyakupambanapambana ni 8:00 mulenji m’paka 4:00 mise, kwamba pa Mande m’paka pa Chinkhondi. Ŵalendo ŵazamuŵaso na mwaŵi wa kuwona malo kwa maminiti 20 pakulongozgeka na munthu, ndipo ŵazamuwona maofesi ghanyake na kuwaro. Nyengo yakuwonera malo ni 8:00 mulenji m’paka 11:00, kweniso kwambira 1:00 mise m’paka 4:00, kwamba pa Mande m’paka pa Chinkhondi.

Pambere mundalute kukawona malo, lutani dankha pa jw.org na kuwona pa MANYANI VYA ISE > MAOFESI NA KUWONA MALO > United States.