Kasi Mariya wa ku Magadala Wakaŵa Njani?

Ivyo Baibolo likuyowoya

Mariya wa ku Magadala wakaŵa mulondezgi wakugomezgeka wa Yesu Khristu. Zina lake lakuti wa ku Magadala likwenera kuti likafuma ku zina la tawuni ya Magadala iyo yikaŵa pafupi na Nyanja ya Galileya. Mariya wakwenera kuti wakhalako ku tawuni iyi.

Mariya wa ku Magadala wakaŵa yumoza wa ŵanakazi awo ŵakendanga lumoza na Yesu na ŵasambiri ŵake ndipo ŵakaŵawovwiranga mwakuthupi. (Luka 8:1-3) Iyo wakaŵapo apo Yesu wakakomekanga, ndipo wakaŵa yumoza mwaŵanthu awo ŵakamba kuwona Yesu wati wawuskika.—Mariko 15:40; Yohane 20:11-18.

• Kasi Mariya wa ku Magadala wakaŵa muhule?

• Kasi Mariya wa ku Magadala wakaŵa “yumoza wa ŵapositole”?

• Kasi Mariya wa ku Magadala wakaŵa muwoli wa Yesu Khristu?

• Kasi mu Baibolo mukuzunulika ŵene Mariya ŵalinga?

Kasi Mariya wa ku Magadala wakaŵa muhule?

Baibolo lindayowoyepo kuti Mariya wa ku Magadala wakaŵa muhule. Kweni likuyowoya waka ivyo vikamuchitikirapo kumanyuma kuti Yesu wakafumiska viŵanda 7 kufuma mwa iyo.—Luka 8:2.

Chifukwa wuli ŵanthu ŵanandi ŵakugomezga kuti Mariya wakaŵa muhule pambere wandaŵe msambiri wa Yesu? Pamanyuma pa vyaka vinandi Mariya wati wafwa, ŵanthu ŵanyake ŵakamba kuyowoya kuti Mariya wa ku Magadala ndiyo wakaŵa mwanakazi uyo wakuzunulika yayi zina lake (uyo panji wakaŵa muhule) ndipo wakanyeweska malundi gha Yesu na masozi na kughapuputa na sisi la ku mutu wake. (Luka 7:36-38) Kweni mu Baibolo mulije fundo iyi.

Kasi Mariya wa ku Magadala wakaŵa “yumoza wa ŵapositole”?

Yayi. Tchalitchi la Katolika likuchema Mariya kuti “Mariya wa ku Magadala Mutuŵa” kweniso “yumoza wa ŵapositole” chifukwa ndiyo wakaŵa wakwamba kuphalira ŵapositole kuti Yesu wawuskika. (Yohane 20:18) Kweni fundo iyi ndiyo yingapangiska kuti Mariya wachemekenge yumoza wa ŵapositole yayi. Nakuti mu Baibolo palije apo tikuŵazga kuti wakaŵa mpositole.—Luka 6:12-16.

Baibolo likamara kulembeka cha kuumaliro kwa vyaka vya 100 lakwamba. Kweni pakajumpha vyaka mahandiredi ghanandi kuti ŵalara ŵa visopa ŵambe kuwona Mariya wa ku Magadala kuti ni mutuŵa. Mu vyaka vyapakati pa 100 mpaka 300 ŵanthu ŵanyake ŵakalemba kuti pakaŵa ŵapositole ŵa Yesu ŵanyake awo ŵakachitiranga sanji Mariya wa ku Magadala. Kweni nkhani iyi njautesi ndipo mulije mu Baibolo.

Kasi Mariya wa ku Magadala wakaŵa muwoli Yesu Khristu?

Yayi. Baibolo likuyowoya mwakupulikikwa makora kuti Yesu wakatorapo yayi.a