Kasi Kuŵa “Musamariya Muwemi” Chikung’anamurachi?
Ivyo Baibolo likuyowoya
Mazgu ghakuti “Musamariya Muwemi” kanandi ghakuyowoya za munthu uyo wakutemwa kovwira ŵanji awo ŵakukhumbikwira wovwiri. Ndipo mazgu agha ghali kufuma ku nkhani, panji kuti ntharika, iyo Yesu wakayowoya kuti walongosore ivyo mzengezgani muwemi wakuchita. Iyo wakati mzengezgani muwemi wakulengera lusungu ŵanyake na kuŵawovwira kwambura kupwelelerako za mtundu panji uko ŵali kukulira.a
Mu nkhani iyi:
Kasi ntharika ya “Musamariya Muwemi” ni vichi?
Wonani mwakudumura nkhani iyo Yesu wakalongosora, wakati: Mwanalume munyake Muyuda wakaŵa paulendo wakufuma ku Yerusalemu kuya ku Yeriko. Kweni pa nthowa, wakasangana na vigeŵenga, ivyo vikamupoka ivyo wakaŵa navyo, kumutimba, na kumuleka kuti wakhala pasingo pera.
Pati pajumpha kanyengo, mu msewu wenewuwu mukajumphanga wasembe wa Chiyuda, ndipo pamanyuma kukizaso mulara wa chisopa cha Chiyuda, kweni wose ŵakamujumpha waka munthu wakupwetekeka uyu. Nangauli ŵanthu aŵa ŵakaŵa ŵa mtundu umoza, kweni ŵakima yayi kuti ŵamovwire munthu wakapwetekeka na vigeŵenga.
Paumaliro, kukiza munthu wa mtundu unyake uyo nayo wakajumphanga mu msewu wenewuwu. Wakaŵa Musamariya. (Luka 10:33; 17:16-18) Chitima chikati chamukora, wakamba kukaka vilonda vyake. Pamanyuma wakamutora munthu wakupwetekeka yura na kuluta nayo kunyumba ya ŵalendo. Wati wafika nayo uku wakamupwelelera mpaka mulenji. Zuŵa lakulondezgapo, wakalipira uyo wakalaŵiliranga nyumba ya ŵalendo kuti wapwelelere munthu uyu, ndipo wakati ndalama zose izo wangananga pakupwelelera munthu uyu wazamuwezgerapo.—Luka 10:30-35.
Chifukwa wuli Yesu wakayowoya ntharika iyi?
Yesu wakaphalira nkhani iyi munthu uyo wakagomezganga kuti ŵanthu ŵa mtundu wake pera ndiwo ŵakaŵa ŵazengezgani ŵake. Yesu wakakhumbanga kusambizga mwanalume uyu fundo yakuzirwa yakuti “ŵazengezgani” ŵake ŵakaŵa Ŵayuda ŵanyake pera yayi kweniso ŵanthu ŵa mitundu unyake. (Luka 10:36, 37) Nkhani iyi yili kulembeka mu Baibolo na chilato chakuti waliyose uyo wakukhumba kukondweska Chiuta, wasambirepo kanthu.—2 Timote 3:16, 17.
Kasi ntharika iyi yikutisambizga vichi?
Ntharika iyi yikutisambizga kuti mzengezgani muwemi wakulongora kuti ngwa lusungu kwizira mu vyakuchita. Wakuchitapo kanthu kuti wawovwire munthu uyo wakusuzgika kwambura kupwelelerako za uko wali kukulira, mtundu, panji charu chake. Mzengezgani wanadi wakuchita nawe vinthu nga umo iyo wangakhumbira kuti uchitirenge nayo.—Mateyu 7:12.
Kasi Ŵasamariya ŵakaŵa anjani?
Ŵasamariya ŵakakhalanga kumpoto kwa Yudeya. Ndipo ŵanthu aŵa ŵakaŵa ŵakusazgikana, Ŵayuda na ŵanthu ŵa mitundu yinyake.
Cha m’ma 100 C.E , Ŵasamariya ŵakapanga kagulu kawo ka chisopa. Iwo ŵakagwiliskiranga ntchito mabuku 5 pera gha mu Malemba Ghachihebere ndipo ghanyake ghose ŵakakananga kughagwiliskira ntchito.
Mu nyengo ya Yesu, Ŵayuda ŵakaŵatinkhanga chomene Ŵasamariya ndipo ŵakageganga kuchitira nawo lumoza vinthu. (Yohane 4:9) Nakuti Ŵayuda ŵanyake ŵakagwiliskiranga ntchito mazgu ghakuti “Musamariya” pakuyowoyera msinjiro ŵanyawo.—Yohane 8:48.
Kasi nkhani ya “Musamariya Muwemi” yikachitika nadi?
Palije mu Malemba apo pakulongora kuti ntharika ya Musamariya Muwemi, ni nkhani yakuti yikachitika nadi. Ndipouli, pakuyowoya ntharika iyi, Yesu wakagwiliskira ntchito vinthu ivyo vikachitikanga nadi kweniso wakazunuranga malo agho ghakaŵako nadi na chilato chakuti awo ŵakategherezganga ŵapulikiskenge makora fundo yikuru.
Vinthu ivyo vikulongosoreka mu nkhani za ivyo vikachitika kale vikuŵa vyaunenesko. Mwachiyelezgero:
Msewu uwo ukakhiranga kufuma ku Yerusalemu kuya Yeriko, uwo ukaŵa utali makilomita ghakujumpha 20. Nkhani iyi pakuyowoya za umo msewu uwu ukaŵira yikuneneska, chifukwa yikuti ŵanthu ‘ŵakakhiranga kufuma ku Yerusalemu’ kuya ku Yeriko—Luka 10:30.
Ŵasembe na Ŵalevi awo ŵakakhalanga ku Yeriko kanandi ŵakendanga mu msewu wenewuwu.
Kanandi vigeŵenga vikabisamanga mu msewu kuti viwukire ŵanthu awo ŵakajumphanga, chomene uyo wali yekha.
a Ntharika ya “Musamariya Muwemi” yikuchemekaso kuti ntharika ya “Mzengezgani Muwemi.”