Kasi Ningachita Wuli Usange Nkhuwerapo Waka mu Kilasi?

“Nkhuwonanga ŵanyane ŵanyake mu kilasi ŵakhala waka kwambura mabuku kweniso ŵaŵika mahedifoni mu makutu mwawo, ŵakutegherezga sumu uku asambizgi ŵakuyowoya. Paumaliro mbwe ŵakuzizwa kuti ŵatondeka kuchita makora! Kweniso pali ŵanyake awo nga ndine, ŵakuyezgayezga kuchita ivyo ŵangafiska, kuŵerenga chomene, kweni mbwe paumaliro ŵakufelura mayeso. Nkhumanya yayi chifukwa icho vinthu vikuŵira nthena. Vikuniŵinya chomene para natondeka mayeso, apo sabata yose nkhaŵikapo mtima kuŵerenga m’paka usiku chomene.”—Yolanda.

Kasi namwe mukujipulika nga ni Yolanda? Kuyowoya unenesko, wamunthu ukugongowa chomene para watondeka mayeso, panji para wamunthu ukuwerapo waka mu kilasi.

Ŵachinyamata ŵanyake awo vikuŵasuzga mu kilasi ŵangachita mphwayi na kuleka kulimbikira. Ŵanyake ŵakusankha kuleka waka sukulu. Nangauli ntchipusu kuti munthu wasankhe nthowa ziŵiri izi, kweni pali nthowa yinyake iyo njakovwira chomene. Wonani vinthu 6 ivyo mungachita kuti muchitenge makora mu kilasi.

• Ivyo mungachita

• Ivyo ŵanyinu ŵakuyowoya

Ivyo mungachita

• Kukhala yayi ku sukulu. Mungawona nga kuti ndivyo mukwenera kuchita kale, kweni usange mukutemwa kukhala ku sukulu, vingamusuzgani kuti muchite makora mu kilasi.

  “Ku sukulu kwithu, ŵana awo ŵakaŵavya navyo ntchito vya magiredi ghawo ni awo kanandi ŵakutemwa kukhala ku sukulu, ivyo vikuŵachemera masuzgo.”—Matthew.

  Fundo ya mu Baibolo: “Icho munthu wakuseŵa, ndicho wazamuvuna.”—Ŵagalatiya 6:7.

• Ŵikanipo mtima kuti mupindurenge na vyose ivyo mukusambira. Kusangika mu kilasi nkhuwemi, kweni para mwanjira mu kilasi, mukwenera kuŵikapo mtima kuti mupulikiskenge vyose ivyo musambirenge. Lembani manosi. Londezgani na kupulikiska ivyo asambizgi ŵakusambizga. Para m’pata ulipo, fumbani ivyo mundapulikiske nyengo yeneyiyo apo muchali mu kilasi.

  “Nkhutemwa kufumba mafumbo ghanandi para nili mu kilasi chifukwa nkhuwona kuti ndipo asambizgi ŵakulongosora makora chifukwa ŵakumanya kuti mwana munyake wandapulikiske.”—Olivia.

  Fundo ya mu Baibolo: “Pwelelerani umo mukupulikira.”—Luka 8:18.

• Kubekera yayi. Para munthu wakubekera ndikuti ngwambura kugomezgeka. Pali nthowa zinandi izo ŵanthu ŵakuchita kuti ŵabekere mayeso ku sukulu. Nthowa yimoza ndiyo kukopera ivyo ŵanyawo ŵalemba. Para munthu wakuchita nthena ndikuti ngwambura kugomezgeka pera yayi kweniso wakujipusika waka yekha.

  “Para undapulikiske chinthu chinyake, ungachitanga kukopera mazgoro kufuma ku ŵanyako yayi. Para ukubekera, ndikuti ukujipusika waka wekha. M’malo mwakuti usambire kumarana na masuzgo pawekha, ukujisambizga kuti nyengo zose ugomezgenge ŵanyako kuti ŵakovwire.”—Jonathan.

  Fundo ya mu Baibolo: “Waliyose wapime mulimo wake, apo ndipo waŵenge na chifukwa chakukondwera pa iyo yekha.”—Ŵagalatiya 6:4.

• Muchitenge dankha homuweki. Para mungafiska, mulembenge homuweki yinu pambere mundambe kuchita vinthu vinyake—chomenechomene vyakusanguluska.a Para mwachita nthena, muŵenge na m’pata unandi wakuchitiraso vinthu vinyake!

  “Nkhalembanga homuweki yane pambere nindambe kuchita vinyake, ivi vikanovwira kuti nambe kuchita makora mu kilasi. Para nafika kunyumba kanandi nkhayezgekanga kuti nigonepo dankha pachoko waka panji kutegherezga sumu. Kweni nkhawoneseskanga kuti namba dankha kulemba homuweki, kufuma apo ndipo nkhapumuranga.”—Calvin.

  Fundo ya mu Baibolo: “Musande ivyo ni vinthu vyakuzirwa chomene.”—Ŵafilipi 1:10.

• Pemphani wovwiri. Lekani kuchita soni kupempha wovwiri ku ŵanji. Pemphani wovwiri ku ŵapapi ŵinu. Pemphani wovwiri kwa asambizgi ŵinu kuti magiredi ghinu ghaŵe ghawemi. Nyengo zinyake mungapempha wovwiri kufuma kwa asambizgi awo ŵakusambizganga ŵanthu para nyengo ya makilasi yamara.

  “Lutani kwa asambizgi ŵinu. Pemphani wovwiri kuti mupulikiske chisambizgo chinyake mwakuti muzakachite makora pa mayeso. Asambizgi ŵinu ŵamukondwa kuwona kuti mukukhumbisiska kuchita makora ndipo ŵamumovwirani.”—David.

  Fundo ya mu Baibolo: “Vinthu vikwenda makora para pali ŵakupeleka fundo ŵanandi.”—Zintharika 15:22.

• Gwiliskirani ntchito mwaŵi uliwose uwo ulipo. Mu vyaru vinyake, mayeso ghakuŵa na mafumbo ghanyake ghapadera agho ghangamovwirani kuŵa na magiredi ghawemi. Nyengo zinyake mungapempha kuti asambizgi ŵinu ŵamupani ntchito zinyake zakusazgikira za mu kilasi izo mungapokerapo magiredi. Para mwatondeka mayeso, mungawerezga kulemba usange mungapempha kuchita nthena.

  

  “Para nkhukhumba kuti magiredi ghane ghaŵe ghawemi, ine ndine nkhwenera kuŵa wakwamba kuchitapo kanthu. Nkhufumbanga asambizgi ŵane usange pali ntchito zinyake izo ningalemba panji para ningawerezga kulemba mayeso kuti nichite makora.”—Mackenzie.

  Fundo ya mu Baibolo: “Ntchito yiliyose iyo munthu wakulimbikira kuyichita yili na chandulo.”—Zintharika 14:23.