Kasi Ningachita Wuli Para Munthu Wakunichichizga Kuti Tigonane?

“Apo nkhaŵa ku sukulu, para munyake wakuti wagonana na munthu, waliyose wakadokeranga kuti nayo ndivyo wakachite. Ndipo kuyowoya unenesko palije uyo wakukhumba kuwoneka wakukhalira pamaso pa ŵanyake.”—Elaine.

Kasi uli kuyezgekapo kuti nawe ugonane na munthu chifukwa chakuti ndivyo ŵanandi ŵakuchita?

Kasi uli kuchichizgikapo na munthu uyo ukumutemwa kuti mugonane?

Usange ni nthena, nkhani iyi yikovwirenge kuchita mwamahara para munthu wakukuchichizga panji para khumbo la kugonana lakwizira.

• Mautesi na unenesko

• Ivyo ungachita para munthu wakukuchichizga kuti mugonane

• Ivyo ŵanyinu ŵakuyowoya

Mautesi na unenesko

UTESI: Ŵanyane wose ŵakugonana (nakhala nekha).

UNENESKO: Kafukufuku munyake wakulongora kuti, ŵachinyamata ŵaŵiri pa ŵatatu ŵaliwose ŵa vyaka 18, ŵali kugonanapo na munthu. Kweni vikulongora kuti ŵachinyamata ŵanandi, ŵakujumpha 30 peresenti ŵandagonanepo na munthu. Ntheura unenesko ngwakuti ni “waliyose” yayi wakuchita vyakugonana.

UTESI: Kugonana kovwirenge kuti titemwanenge chomene.

UNENESKO: Nangauli ŵanyamata ŵanyake ŵakutemwa kuyowoya nthena kuti ŵanyengelere msungwana kuti ŵagone nayo, kweni fundo iyi njautesi. Nakuti kanandi para munyamata wagona nayo msungwana, wakumazga chibwezi. Ndipo ivi vikuŵa vyakukhuŵazga kwa msungwana chifukwa iyo waghanaghananga kuti panji munyake wamutemwanga zanadi.a

UTESI: Baibolo likukanizga kugonana.

UNENESKO: Baibolo likukanizga yayi kugonana, kweni likuti mwanalume na mwanakazi awo mbakutorana ndiwo ŵakwenera kugonana.—Genizesi 1:28; 1 Ŵakorinte 7:3.

UTESI: Kulondezga ivyo vili mu Baibolo kukupangiska kuti wamunthu uleke kukondwa na umoyo.

UNENESKO: Usange walindilira kwambura kugonana na munthu m’paka uzakanjire mu nthengwa, uzamuŵa wakukondwa chomene, ndipo pasono nthena ufipenge mtima yayi, panji kudandawura kuti undasankhe makora, kweniso ugegenge masuzgo agho ghakwiza chifukwa chakwamba vya kugonana pambere undanjire mu nthengwa.

Fundo yikuru: Ntchiwemi chomene kulindizga dankha m’paka uzakanjire mu nthengwa. Kweni usange wamba vyakugonana pambere undanjire mu nthengwa ungasangana na masuzgo ghanandi.

Ivyo ungachita para munthu wakukuchichizga kuti mugonane

• Uwonenge kuti ivyo ukugomezga ni vyaunenesko. Baibolo likulongosora kuti “ŵanthu ŵakukhwima, ŵali kuzgoŵezga nkhongono zawo zakamanyiro kupambaniska pakati pa chiwemi na chiheni.” (Ŵahebere 5:14) Ndipo chifukwa chakuti ŵakugomezga kuti ivyo Baibolo likuyowoya ni vyaunenesko, ŵakuzomera yayi kusintha fundo izo ŵakwendera chifukwa chakuti waka ŵanthu ŵanyake ŵakuŵachichizga kuchita nthena.

  “Nkhuŵikapo mtima chomene kuchita icho ntchiwemi na kuŵa na mbiri yiwemi, kweniso nkhukana kuŵa pa malo agho nkhuwona kuti ningayezgeka kuchita icho ntchiheni.”—Alicia.

  Fundo yakuti ughanaghanirepo: Kasi ukukhumba kuŵa na mbiri wuli? Kasi chakuzirwa ntchivichi, kuŵa na mbiri yiwemi panji kukondweska waka munthu munyake?

• Ghanaghanira vyakufumapo vyake. Baibolo likuti: “Icho munthu wakuseŵa, ndicho wazamuvuna.” (Ŵagalatiya 6:7) Ghanaghanira umo umoyo wako na wa uyo wagona nayo ungakhwaskikira usange ungazomera kugona nayo.b

  “Para wamba vya kugonana pambere undanjire mu nthengwa, ukwamba kujiyimba mulandu, ukudandaura, kweniso ukuwona kuti ukutemweka yayi. Ndipo chiheni chomene ntchakuti nyengo zinyake ungatora matenda ghakupirana pakugonana.”—Sienna.

  Fundo yakuti ughanaghanirepo: Buku lakuti Sex Smart likuti: “Usange ŵabwezi ŵako ŵakukuchichizga kuchita vinthu ivyo vingakwiziskira masuzgo, kasi ghangaŵa mahara kulutilira kuchezga na ŵabwezi ŵanthena aŵa?”

• Uwonenge vinthu mwakwenelera. Kugonana nkhuheni yayi. Ndipo Baibolo likulongosora kuti, mwanalume na mwanakazi awo mbakutorana ndiwo ŵakwenera kukondwa na chawanangwa ichi mu nthengwa yawo.—Zintharika 5:18, 19.

  “Kugonana nkhuwemi waka. Chiuta wakukhumba kuti tikondwenge na chawanangwa ichi kweni mu ndondomeko iyo mwenecho wali kuzomerezga, ndipo ni mu nthengwa.”—Jeremy.

  Fundo yakuti ughanaghanirepo: Usange wazakanjira mu nthengwa, uzamuŵa mwanangwa kugonana na munyako wa mu nthengwa. Ndipo uzamukondwa na chawangwa ichi, kwambura kufipa mtima na masuzgo agho tazunura kukwamba.