IVYO ŴACHINYAMATA ŴAKUFUMBA

Kasi Nibatizike?—Chigaŵa 1: Ng’anamuro la Ubatizo

Chaka chilichose, ŵachinyamata ŵanandi awo ŵakulelekera mu mbumba za Ŵakaboni ŵa Yehova ŵakubatizika. Kasi ndivyo namwe mukukhumba kuchita? Para ni nthena, chakwamba mukwenera kumanya dankha makora ng’anamuro la kujipeleka na ubatizo.

Kasi ubatizo ni vichi?

Ubatizo uwo ukuyowoyeka mu Baibolo ukung’anamura kubizga mu maji thupi lose—kuchita kumijirana waka maji yayi—ndipo uli na ng’anamuro lapadera chomene.

Para munthu wabira mu maji thupi lose pa kubatizika wakulongora pakweru kuti sono wakhalengeso umoyo wakujikondweska waka yekha yayi.
Para wakuzuwuka mu maji wakulongora kuti wayamba umoyo uphya ndipo waŵikengepo mtima kuchita vinthu ivyo vikukondweska Chiuta.

Para mwabatizika, mukuzomera pakweru kuti sono Yehova ndiyo wali na mazaza gha kumulongozgani pa nkhani ya icho ntchiwemi na chiheni, ndipo mukuzomeraso pakweru kuti mukalayizga kuti nyengo zose muchitenge ivyo Yehova wakukhumba kuti muchitenge.

Ghanaghanirani fundo iyi: Chifukwa wuli mukwenera kuzomera pakweru kuti nyengo zose mupulikirenge Yehova? Wonani lemba la 1 Yohane 4:19 na Chivumbuzi 4:11.

Kasi kujipeleka ni vichi?

Pambere mundabatizike, mukwenera kujipeleka dankha kwa Yehova kwamwekha. Mu nthowa wuli?

Kwizira mu lurombo, mukumuphalira Yehova kuti mumuteŵeterenge umoyo winu wose, kweniso kuti muchitenge ivyo iyo wakukhumba vilije kanthu kuti kwali vinthu vili wuli panji ŵanthu ŵanyake ŵasankha kuchita vichi.

Ubatizo ukulongora pakweru kuti mukajipeleka kwa Yehova kwamwekha. Ubatizo ukuphalira ŵanji fundo yakuti mwaleka kujikhalira mwekha ndipo sono ndimwe ŵa Yehova.—Mateyu 16:24.

Fundo yakuti mughanaghanirepo: Chifukwa wuli vinthu vikwenda makora para mwajipeleka kwa Yehova? Wonani Yesaya 48:17, 18 na Ŵahebere 11:6.

Chifukwa wuli ubatizo ngwakuzirwa?

Yesu wakati ubatizo ntchinthu chakuzirwa chomene kuti munthu waŵe msambiri wake. (Mateyu 28:19, 20) Ntheura ubatizo ntchinthu chakuzirwa chomene ku Ŵakhristu mazuŵa ghano. Nakuti Baibolo likuti ubatizo ngwakukhumbikwa kuti tizakaponoskeke.—1 Petrosi 3:21.

Ndipouli, mukwenera kubatizika chifukwa chakuti mukutemwa Yehova kweniso mukuzirwiska ubwezi uwo muli nawo na iyo. Mukwenera kuŵa na maghanoghano gha nga ni agho wakaŵa nagho wamasalimo uyo wakalemba kuti: “Kasi ningamuwezgera vichi Yehova pa viwemi vyose ivyo wanichitira? . . . Nichemenge pa zina la Yehova. Nifiskenge vilapo vyane kwa Yehova.”—Salimo 116:12-14.

Ghanaghanirani fundo iyi: Kasi ni vinthu wuli viwemi ivyo Yehova wamuchitirani ndipo kasi mungamuwezgera vichi? Wonani Dotoronome 10:12, 13 na Ŵaroma 12:1.

Ivyo ŵanyinu ŵakuyowoya

“Nkhani ya kujipeleka yikusazgapo phangano ilo wamunthu ukuchita na Yehova, ndipo njamaseŵera yayi. Kweni para wajipeleka kwa Yehova ukusanga vitumbiko vinandi chomene. Nakuti iyo ndiyo wangatipwelelera makora chomene kuluskaso umo ise tingajipwelelelera.”—Mijin.

“Yehova walongora kale kuti wakumutemwani. Para mwabatizika, mukulongora kuti mukumutemwa chomene. Kubatizika ni mwaŵi ukuru ndipo wamunthu ukutumbikika chomene!”—Ember.

“Kusankha kujipeleka kwa Chiuta na kubatizika ntchinthu chakuzirwa chomene icho munthu wangachita. Kweni ivi vingamofyaninge yayi. Para mwanozgeka makora ndipo mukuchita nthena pa vifukwa vyakwenelera, kusankha kujipeleka na kubatizika ntchinthu chapadera chomene icho mungasankha pa umoyo winu.”—Julian.

Mautesi na unenesko pakuyowoya vya ubatizo

UTESI— Ŵalara pera ndiwo ŵakwenera kubatizika chifukwa ŵali na mahara.

UNENESKO— Mahara ghakuwoneka chifukwa chakuti munthu ni mulara mu vyaka yayi, kweni kwizira mu ivyo munthu wakuchita, umo wakutemwera Yehova kweniso kumupulikira. Apo Yosefe, Samuyeli, na Yosiya ŵakaŵa ŵachali ŵachoko ŵakalongora kuti ŵali na mahara. Nakuti sono napo ŵachinyamata ŵanandi ŵakulongora kuti ŵali na mahara.

Baibolo likuti: “Mwana wakumanyikwa na milimo yake, usange nkharo yake njiwemi na yakwenelera.”—Zintharika 20:11.

UTESI— Para ŵanyako ŵakubatizika nawe ukwenera kubatizika.

UNENESKO— Kusankha kujipeleka kweniso kubatizika ni nkhani ya waliyose payekha, ndipo munthu wakwenera kusankha kuchita nthena kufumira pasi pa mtima. Ni mutheto waka yayi panji kaluso kakuti munthu wakwenera kuchita para wafika msinkhu unyake, panji chinthu chakuti munthu wachite chifukwa cha kuwona waka kuti ŵanji ndivyo ŵakuchita kweniso kuti ndivyo ŵakukhazga.

Baibolo likuti: “Ŵanthu ŵa [Chiuta] ŵajipelekenge na mtima wose.”—Salimo 110:3.

UTESI— Para munthu wandabatizike nanga wangananga palije suzgo.

UNENESKO— Munthu ukuŵa na mulandu wa kwananga kwa Yehova para wabatizika pera yayi, kweni para wamba waka kumanya pakati pa chiwemi na chiheni mu maso gha Yehova.

Baibolo likuti: “Usange munthu wakumanya umo wangachitira icho ntchakwenelera kweni wakuchichita yayi, wakwananga.”—Yakobe 4:17.

Fundo yakuti mughanaghanirepo: Para mukuwona kuti kujipeleka kweniso kubatizika ni udindo ukuru chomene wakuti mungawufiska yayi, mukwenera kuchitapo kanthu kuti muleke kuŵa na wofi wanthena. Mungachita nthena mwa kuŵerenga chaputara 37 cha buku la Mayankho a Zimene Achinyamata Amafunsa, Buku Lachiwiri.