IVYO ŴACHINYAMATA ŴAKUFUMBA

Kasi Nibatizike?—Chigaŵa 2: Kunozgekera Ubatizo

Para mukulondezga fundo za mu Baibolo pa umoyo winu ndipo muli pa ubwezi uwemi na Chiuta, ntchakawiro kuti mwambe kughanaghanira chomene vya nkhani ya ubatizo. Kasi mungamanya wuli usange ndimwe ŵakunozgeka nadi kuchita chinthu chakuzirwa ichi?a

Mu nkhani iyi

Kasi nkhwenera kumanya vichi pambere nindabatizike?

Kunozgekera kubatizika chikung’anamura waka kusunga vinthu pamtima nga ni para mwamulemba mayeso ku sukulu yayi. Kweni mukwenera kugwiliskira ntchito “nkhongono yinu ya kughanaghana” kuti musimikizge nadi kuti ivyo Baibolo likusambizga mbunenesko. (Ŵaroma 12:1) Mwachiyelezgero:

Kasi mukukhorwa kuti Chiuta waliko nadi ndipo ndiyo mukwenera kumusopa?

Baibolo likuti: “Uyo wakusendelera kwa Chiuta wakwenera kugomezga kuti waliko ndipo wakuŵapa njombe awo ŵakumupenja na mtima wose.”—Ŵahebere 11:6.

Jifumbani kuti: ‘Chifukwa wuli nkhugomezga kuti Chiuta waliko?’ (Ŵahebere 3:4) ‘Chifukwa wuli nkhwenera kumusopa?’—Chivumbuzi 4:11.

Kasi mukukhumba wovwiri? Wonani nkhani yakuti “Kodi Zinthu Zinachita Kulengedwa?—Gawo 1: N’chifukwa Chiyani Ndimakhulupirira Kuti Kuli Mulungu?”
Kasi mukukhorwa kuti uthenga wa mu Baibolo ngwakufuma nadi kwa Chiuta?

Baibolo likuti: “Malemba ghose ngakupelekeka na Chiuta kwizira mwa mzimu ndipo ngachandulo pa kusambizga, kuchenya, kunyoloska vinthu, na kulanga mu urunji.”—2 Timote 3:16.

Jifumbani kuti: ‘Chifukwa wuli nkhugomezga kuti Baibolo ni maghanoghano gha ŵanthu yayi?’—Yesaya 46:10; 1 Ŵatesalonika 2:13.

Kasi mukukhumba wovwiri? Wonani nkhani yakuti, “Kasi Baibolo Linganovwira Wuli?—Chigaŵa 1: Limanya Makora Baibolo Lako”
Kasi mukukhorwa kuti Yehova wakugwiliskira ntchito mpingo Wachikhristu kuti wafiske khumbo lake?

Baibolo likuti: “[Chiuta] wapike ntchindi kwizira mu mpingo ndiposo kwizira mwa Khristu Yesu mu miwiro yose muyirayira swii.”—Ŵaefeso 3:21.

Jifumbani kuti: ‘Kasi nkhuwona kuti ivyo tikusambira kufuma mu Baibolo pa maungano gha Chikhristu, ni vyakufuma ku ŵanthu panji kwa Yehova?’ (Mateyu 24:45) ‘Kasi nkhuluta ku maungano nanga vingaŵa kuti ŵapapi ŵane ŵandalute (usange ŵakumuzomerezgani kuchita nthena)?’—Ŵahebere 10:24, 25.

Kasi mukukhumba wovwiri? Wonani nkhani yakuti, “Chifukwa Wuli Nkhwenera Kusangikapo pa Maungano ku Nyumba ya Ufumu?”

Kasi nkhwenera kuchita vichi?

Mukwenera kuŵa ŵakufikapo yayi kuti mubatizike. Kweni mukwenera kulongora kuti mukukhumba nadi ‘kupatukako ku uheni na kuchita uwemi.’ (Salimo 34:14) Mwachiyelezgero:

Kasi mukulondezga fundo za Yehova pa umoyo winu?

Baibolo likuti: “Lutilirani kuŵa na njuŵi yiwemi.”—1 Petrosi 3:16.

Jifumbani kuti: ‘Kasi ivyo nkhuchita vikulongora kuti ‘nkhongono zane zakamanyiro’ zikunovwira “kupambaniska pakati pa chiwemi na chiheni”?’ (Ŵahebere 5:14) ‘Kasi yilipo nyengo iyo nkhakana kuchichizgika na ŵanyane kuchita vinthu viheni? Kasi ŵabwezi ŵane ŵakunichiska kuti nichitenge icho ntchiwemi?’—Zintharika 13:20.

Kasi mukukhumba wovwiri? Wonani nkhani yakuti, “Kasi Ningasambizga Wuli Njuŵi Yane?”
Kasi mukumanya fundo yakuti muzamupatawura kwa Yehova pa ivyo mukuchita?

Baibolo likuti: “Chiuta wazamweruzga waliyose wa ise kuyana na ntchito zake.”—Ŵaroma 14:12.

Jifumbani kuti: ‘Kasi nkhuchita vinthu mwaunenesko na ŵanji kweniso kwa namwene?’ (Ŵahebere 13:18) ‘Kasi nkhuzomera para nabudiska, panji nkhutemwa kubisa kweniso kuyowoya kuti ŵanyake ndiwo ŵapangiska?’—Zintharika 28:13.

Kasi mukukhumba wovwiri? Wonani nkhani yakuti, “Ningachita Wuli Para Nabudiska?”
Kasi mukulutilira kuŵa paubwezi uwemi na Yehova?

Baibolo likuti: “Sendelerani kwa Chiuta, ndipo iyo wasendelerenge kwa imwe.”—Yakobe 4:8.

Jifumbani kuti: ‘Kasi nkhuchita vichi ivyo vikunovwira kuti nisendelere kwa Yehova?’ Mwachiyelezgero, ‘Kasi nkhutemwa kuŵerenga Baibolo?’ (Salimo 1:1, 2) ‘Kasi nkhutemwa kulomba nyengo zose?’ (1 Ŵatesalonika 5:17) ‘Kasi malurombo ghane ghakuŵa ghakudunjika? Kasi ŵabwezi ŵane nawo mbabwezi ŵa Yehova?’—Salimo 15:1, 4.

Kasi mukukhumba wovwiri? Wonani nkhani yakuti, “Kasi Baibolo Linganovwira Wuli?—Chigaŵa 2: Ivyo Ungachita Kuti Ukondwenge Para Ukuŵazga Baibolo” na “Chifukwa Wuli Nkhwenera Kupemphera?”

FUNDO YAKUTI MUGHANAGHANIREPO: Kuti munozgekere ubatizo, ŵerengani chaputara 37 cha buku la Mayankho a Zimene Achinyamata Amafunsa, Buku Lachiwiri. Chomene wonani vyakuti muchite ivyo vili pa peji 308 na 309.

a Ŵerengani nkhani yakuti, “Kasi Nibatizike—Chigaŵa 1,” iyo yikulongosora ng’anamuro na kuzirwa kwa kujipeleka kwa Chiuta na kubatizika.

Ivyo ŵanyinu ŵakuyowoya

“Chigaŵa cha vyakuti muchite icho chili mu buku la Zimene Achinyamata Amafunsa, chikanovwira kumanya vigaŵa ivyo nkheneranga kusintha pambere nindabatizike. Chikanovwiraso kujiŵikira vilato ivyo nkhatenge nizamufiska para nabatizika. Kujipeleka kwa Yehova ni nkhani yikuru, kweni ni mwaŵi wapadera chomene uwo munthu wangaŵa nawo.”—Gabriella.

“Mu Baibolo, Timote wakaphalirika kuti: ‘Lutilira kulondezga vinthu ivyo ukasambira ndipo ukakhorwa na kuvigomezga.’” (2 Timote 3:14) “Patulani nyengo yakuti muŵerenge mazgu gha Chiuta mwakuti mukhorwe mu mtima winu kuti ivyo mukusambira mbunenesko nadi. Mukujipeleka kwa Yehova—kwa ŵanthu yayi—ntheura mukwenera kuŵika pakwamba maghanoghano gha Yehova para mukukhumba kubatizika.”—Caleb.