Kasi Ntchamachitiko Kuti Tose Tiŵe Ŵakuyana pa Nkhani ya Vyachuma?
Mu vyaru vinandi, ŵanthu ŵakuchita viwoneskero mu msewu chifukwa ŵakuwona kuti pa nkhani ya vyachuma ŵakuyana yayi na ŵanyawo. Masuzgo agha ghakahenipira chomene kukati kwawa muliri wa COVID-19, uwo ukapangiska ŵanthu kuti ŵaleke kuŵa ŵakukondwa chifukwa cha kukanizgika kuchita vinthu vinyake, kusoŵa kwa ndalama, chakurya na vinthu vinyake, kweniso kutondeka kupokera wovwiri wakwenelera wa ku chipatala ivyo vikapangiska kuti paŵe mphambano yikuru chomene pakati pa ŵanthu ŵasambazi na ŵakavu.
Kasi masuzgo gha vyachuma agho ghakupangiska kuti ŵanthu ŵasuzgikenge chomene ghazamumara? Enya. Baibolo likulongosora ivyo Chiuta wazamuchita kuti wamazge masuzgo agho tikusangana nagho.
Masuzgo gha vyachuma agho Chiuta wazamumazga
Suzgo: Ŵanthu ŵatondeka kukhazikiska boma ilo waliyose wangaŵa na vyakukhumbikwira pa umoyo.
Umo lizamumalira: Chiuta wazamuwuskapo maboma gha ŵanthu na kuŵikapo boma lake, ilo likuchemeka Ufumu wa Chiuta. Ufumu uwu uzamuwusa charu chapasi kufuma kuchanya.—Daniyeli 2:44; Mateyu 6:10.
Icho chizamuchitika: Chifukwa chakuti Ufumu wa Chiuta uzamuwusa pa charu chose, uzamufiska kupeleka vyakukhumbikwira vya munthu waliyose pa charu chapasi. Ŵanthu ŵazamusuzgikaso yayi na ukavu panji kufipa mtima kuti ŵasoŵenge pakukora. (Salimo 9:7-9, 18) M’malo mwake, ŵazamusangwa na milimo ya mawoko ghawo ndipo iwo pamoza na mabanja ghawo ŵazamuŵa ŵakukhorwa na vyakufumapo vya ntchito iyo ŵagwira. Baibolo likulayizga kuti: “Ŵazamuzenga nyumba na kukhalamo, ndipo ŵazamupanda minda ya mpheska na kurya vipambi vyake. Ŵazamuzenga chara, munyake na kukhalamo, nanga nkhupanda, ŵanyake na kurya.”—Yesaya 65:21, 22.
Suzgo: Ŵanthu ŵangagega yayi vinthu ivyo vingapangiska kuti ŵasangane na masuzgo panji ivyo vingapangiska kuti ŵasoŵe pakukora.
Umo lizamumalira: Kwizira mu Ufumu wake, Chiuta wazamuwuskapo chilichose icho chikupangiska ŵanthu ŵakhalenge mwawofi kweniso mwambura kuvikilirika.
Icho chizamuchitika: Para Ufumu wa Chiuta wazakamba kulamulira, ŵanthu ŵazamusanganaso yayi na suzgo ilo lizamupangiska iwo panji mabanja ghawo ŵasoŵe vinthu vyakukhumbikwira pa umoyo. Mwachiyelezgero, nkhondo, kusoŵa kwa chakurya, na miliri kuzamuŵavya. (Salimo 46:9; 72:16; Yesaya 33:24) Chiuta wakuti: “Ŵanthu ŵane ŵakhalenge mu malo gha mtende, mu malo gha bata na malo gha chimango.”—Yesaya 32:18.
Suzgo: Ŵanthu awo ŵakujighanaghanira ŵekha kweniso ŵaryezi kanandi ŵakulyera ŵanyawo masuku pa mutu.
Umo lizamumalira: Awo ŵazamunjira mu Ufumu wa Chiuta, ŵazamusambira umo ŵangatemwera chomene ŵanyawo kuluska umo ŵakujitemwera ŵekha.—Mateyu 22:37-39.
Icho Chizamuchitika: Para Ufumu wa Chiuta wazakamba kulamulira, waliyose wazamuyezga Chiuta pa nkhani yakulongora chitemwa, icho “chikupenja vyake pera yayi.” (1 Ŵakorinte 13:4, 5) Baibolo likuti: “Vizamupwetekana chara panji kuparanyana mu phiri lane lose lituŵa, chifukwa charu chapasi chizamuzura na kumanya Yehovaa nga umo maji ghakuzuzgira nyanja.”—Yesaya 11:9.
Baibolo likulongosora kuti tikukhala mu mazuŵa ghaumaliro gha charu chiheni ichi, kweniso kuti sonosono apa Chiuta wazamufiska layizgo lake lakuti wazamumazga masuzgo agho ghakwiza chifukwa cha ukavu.b (Salimo 12:5) Kweni pasono, fundo za mu Baibolo zingamovwirani kuti muzizipizge masuzgo agho ghakwiza chifukwa cha ukavu. Mwachiyelezgero, wonani nkhani ya mutu wakuti “Ivyo Mungachita Kuti Mukhalenge Umoyo Wambura Kukhumba Vinandi” kweniso ya mutu wakuti “Tikwenera Kuwona Ndalama Mwakwenelera.”
a Yehova ni zina la Chiuta nga umo Baibolo likuyowoyera.—Salimo 83:18.
b Kuti musambire chifukwa icho mungagomezgera Baibolo, wonani nkhani yakuti “Baibolo Ni Buku Ilo Muli Unenesko.”