Fundo za mu Baibolo Izo Zingamovwirani Para Ntchito Yamumalirani

Para ntchito yamumalirani vingamba kumusuzgani pa nkhani ya kasangiro ka ndalama, kweniso vingakhwaska chomene umoyo winu na wa mbumba yinu. Fundo zakulondezgapo izi, izo ni zakufuma mu Baibolo zingamovwirani kuti muzizipizge.

• Phaliraniko ŵanyinu umo mukujipulikira.

  Ivyo Baibolo likuyowoya: “Mubwezi wanadi wakutemwa nyengo zose.”—Zintharika 17:17.

  Para ntchito yamumalirani, chitima chingamukorani, mungakwiya, kutimbanizgika maghanoghano, panji mungamba kujiwona kuti ndimwe ŵakutondeka. Para mukuphalirako ŵamumbumba yinu na ŵabwezi umo mukujipulikira, ŵangamovwirani kuti mujipulikeko makora. Ŵangamuphaliranikoso fundo zakuzirwa izo zingamovwirani kuti musange ntchito yinyake.

• Lekani kwenjerwa mwakujumphizga.

  Ivyo Baibolo likuyowoya: “Kwenjerwa napachoko chara vya zuŵa lakulondezgapo, chifukwa zuŵa lakulondezgapo liŵenge na vyenjezgo vyake.”—Mateyu 6:34.

  Baibolo likutichiska kuti tinozgekerenge vyamunthazi. (Zintharika 21:5) Ndipouli, likutichiskaso kuti tileke kwenjerwa mwakujumphizga na vinthu ivyo vingazakachitika munthazi. Kanandi tikufipa mtima na vinthu ivyo panji vikuzakachitikaso yayi. Ntchiwemi chomene kuchita vinthu vya zuŵa lililose palekha.

  Baibolo likutiphalira ulongozgi unyake wakuzirwa wa umo tingachitira para tikusuzgika maghanoghano pasono. Ŵazgani nkhani yakuti, “Ivyo Mungachita Para Mukusuzgika Maghanoghano” kuti mumanye vinandi.

• Sinthani vinyake na vinyake pa nkhani ya bajeti yinu.

  Ivyo Baibolo likuyowoya: “Nkhumanya umo ningakhalira na tuchoko waka ndiposo umo ningakhalira para nili na vinandi.”—Ŵafilipi 4:12.

  Sinthani umoyo winu kuti uyane na umo vinthu viliri pasono. Ivi vikusazgapo kusintha unandi wa vinthu ivyo mukugura mwakuti viyane na ndalama izo mukusanga pasono. Ŵani maso kuti muleke kutora waka ngongoli bwekabweka.—Zintharika 22:7.

  Kuti musange fundo zakusazgikira za umo mungachitira kuti musinthe vinthu kuyana na ndalama izo mukusanga, wonani nkhani yakuti, “Ivyo Mungachita Kuti Mukhalenge Umoyo Wambura Kukhumba Vinandi.”

• Mugwiliskirenge ntchito nyengo yinu mwamahara.

  Ivyo Baibolo likuyowoya: “Lutilirani kwenda mwavinjeru . . . , na kugwiliskira ntchito makora nyengo yinu.”—Ŵakolose 4:5.

  Nangauli pasono mulije ndondomeko yakuluta ku ntchito, kweni lutilirani kugwiliskira ntchito makora nyengo yinu. Kuchita nthena kumovwiraninge kuti muchitenge vinthu mundondomeko kweniso kuti mujipulikenge makora.

• Muŵenge ŵakunozgeka kusintha.

  Ivyo Baibolo likuyowoya: “Ntchito yiliyose iyo munthu wakulimbikira kuyichita yili na chandulo.”—Zintharika 14:23.

  Muŵe ŵakunozgeka kugwira ntchito iyo yingapambanako na iyo mukagwiranga pakwamba. Zingaŵa ntchito izo zikuwoneka zapasi panji izo zili na malipiro ghachoko.

• Muŵe ŵachitatata.

  Ivyo Baibolo likuyowoya: “Seŵa mbuto yako mulenji, ndipo ungapumuzganga chara woko lako m’paka mise, pakuti ukumanya yayi iyo yichitenge makora.”—Mupharazgi 11:6.

  Lutilirani kupenja ntchito. Phalirani ŵanji kuti mukupenja ntchito. Mungaphalira ŵachibali ŵinu, awo mukumanyana nawo, awo mukagwiranga nawo ntchito, na ŵazengezgani ŵinu. Mungafumba ntchito ku makampani agho ghakuwona vya ntchito, kuwona vikhwangwani vya ntchito panji nyuzipepara, na kupenja nanga ni mu mawebusayiti gha makampani ghakupambanapambana. Muŵe ŵakunozgeka kuchita maintavyu ku malo gha ntchito ghakupambanapambana, na kulemba makalata ghanandi ghakupenja ntchito.