Nkhondo Iyo Yikuchitika ku Ukraine Yapangiska Kuti Suzgo la Kusoŵa kwa Chakurya Liye Munthazi pa Charu Chose

Pa May 19, 2022, United Nations Security Council yikapokera lipoti kufuma ku ŵanthu 75 awo ŵali na maudindo ghakurughakuru kuti “suzgo la kusoŵa kwa chakurya pa charu chose ilo likaŵa kale likuru chifukwa cha muliri wa COVID-19 na kusintha kwa nyengo, pasono ndipo layira munthazi chomene chifukwa cha nkhondo iyi yikuchitika ku Ukraine.” Kufuma apo, uyo wakuwona vya umo chuma chikwendera wakati,“nkhondo iyi yikusazgirako waka masuzgo ghanandi agho ghali mu charu ichi ndipo ŵanthu ŵatamburenge na njara.” Baibolo likayowoyerathu kuti mu nyengo zaumaliro kuzamuŵa suzgo la kusoŵa kwa chakurya, kweniso likutipa wovwiri pa nkhani ya umo tingazizipizgira suzgo ili.

Baibolo likayowoyerathu kuti kuzamuŵa suzgo la kusoŵa kwa chakurya

•  Yesu wakachima kuti: “Mtundu uzamuwukirana na mtundu unyake, ufumu na ufumu unyake. Kweniso kuzamuŵa njara.”—Mateyu 24:7.

•  Buku la mu Baibolo la Chivumbuzi likuyowoya vya ŵakukwera pa mahachi ŵanayi. Yumoza wa ŵakukwera pa mahachi agha wakwimira nkhondo. Wakulondezgana na munyake uyo wakwimira njara, panji kuti nyengo iyo chakurya chizamusoŵanga ndipo ŵanthu ŵazamuguranga mwakudura chomene. Pa lemba ili tikuŵazga kuti, “Nkhalaŵiska na kuwona hachi lifipa. Uyo wakakhalapo wakaŵa na sikelo mu woko lake. Nkhapulika mazgu . . . ghakati: “Kilo limoza la tirigu mtengo wake ni dinari limoza, ndipo makilo ghatatu gha balere mtengo wake ni dinari limoza.”—Chivumbuzi 6:5, 6.

Mauchimi gha mu Baibolo ghakuyowoya vya kusoŵa kwa chakurya agha ghakufiskika sono mu nyengo iyo Baibolo likuti ni “mazuŵa ghaumaliro.” (2 Timote 3:1) Kuti mumanye vinandi vyakukhwaskana na “mazuŵa ghaumaliro” kweniso vya ŵanalume ŵanayi awo ŵakwera pa mahachi awo ŵakuzunulika mu buku la Chivumbuzi, wonelerani vidiyo ya mutu wakuti Charu Chasintha Chomene Kufuma mu 1914 na kuŵazga nkhani yakuti, “Kasi Ŵanalume Ŵanayi Awo Ŵakwera pa Mahachi Mbanjani?”

Umo Baibolo lingamovwilirani

•  Baibolo lili na ulongozgi wakovwira uwo ungamovwirani kuti muzizipizge nyengo zakusuzga, nga nkhukwera kwa chakurya panji kusoŵa kwa chakurya. Wonani viyelezgero vinyake mu nkhani yakuti, “Ivyo Mungachita Kuti Mukhalenge Umoyo Wambura Kukhumba Vinandi.”

•  Baibolo likutipaso chigomezgo chakuti kunthazi vinthu vizamuŵa makora. Likulayizga kuti kuzamuŵa nyengo iyo “muzamuŵa vyakurya vinandi mu charu” ndipo waliyose wazamuŵa na chakurya chakukwana. (Salimo 72:16) Kuti mumanye vinandi vyakukhwaskana na ivyo Baibolo likulayizga munthazi kweniso chifukwa icho mungaligomezgera, ŵazgani nkhani yakuti, “Chigomezgo Chakuti Kunthazi Vinthu Vizamusintha.”