Tikusanga Chandulo na Sembe ya Yesu
Pa chaka chilichose kamoza, Ŵakaboni ŵa Yehova pamoza na ŵabwezi ŵawo mamiliyoni ghanandi pa charu chose ŵakuwungana kuti ŵakumbukire nyifwa ya Yesu, nga umo mweneko wakayowoyera. (Luka 22:19) Ungano uwu ukutovwira kumanya kuti sembe iyo Yesu wakapeleka njakovwira chomene ku mtundu wa ŵanthu. Kweniso sembe ya Yesu yikutovwira kuti tiŵe na umoyo uwemi sono kweniso munthazi.—Yohane 3:16.
Kwali mwamusangikapo pa ungano wa Chikumbusko wa chaka chino panji yayi, kweni kasi mungasanga wuli chandulo na sembe ya Yesu? Yesu wakasambizga kuti tikwenera kuchita vinthu viŵiri vyakuzirwa chomene:
1. Sambirani vyakukhwaskana na Chiuta na Yesu. Mu lurombo ulo wakalomba kwa Adada ŵake kuchanya, Yesu wakati: “Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha, ndiposo Yesu Khristu, uyo mukamutuma.”—Yohane 17:3.
2. Mulondezgenge ivyo mukusambira. Yesu wakadidimizgapo kuti tikwenera kulondezga ivyo wakusambizga mu umoyo withu. Mwachiyelezgero, pa Upharazgi wake wa pa Phiri wakalumba waliyose uyo ‘wakupulika mazgu ghake na kughachita.’ (Luka 6:46-48) Mwakuyana waka, pa nyengo yinyake wakati: “Usange mukumanya vinthu ivi, ŵakukondwa ndimwe usange mukuvichita.”—Yohane 13:17.
Kasi mungatemwa kuti musambire vinandi vya Chiuta na Yesu? Kasi mungatemwa kuti munthu wamovwirani kulondezga ivyo mukusambira? Pasi apa pali vinthu vyakovwira.
Kosi yakusambira Baibolo
Kosi yakusambira Baibolo kwaulere yawovwira ŵanthu ŵanandi kumanya Baibolo na kulondezga fundo zake pa umoyo wawo.
Wonani Kosi Yakusambira Baibolo kuti mumanye vinandi.
Wonelerani vidiyo yakuti Tamupokelerani ku Sambiro la Baibolo kuti muwone umo Ŵakaboni ŵa Yehova ŵakusambilira Baibolo na ŵanthu.
Maungano gha Ŵakaboni ŵa Yehova
Ŵakaboni ŵa Yehova ŵakuwungana kaŵiri pa sabata mu malo ghawo ghakusoperako agho ghakumanyikwa kuti Nyumba ya Ufumu. Pa maungano agha, tikudumbiskana vya Baibolo kweniso umo tingalondezgera fundo zake pa umoyo withu.
Waliyose ngwakupokelereka pa maungano agha, vilije kanthu kuti ndimwe Kaboni wa Yehova yayi. Kuyana na umo vinthu liliri kukwinu, mungasankha kuchita maungano agha maso na maso panji kwizira pa videoconference.
Kuti mumanye ivyo vikuchitika pa maungano agha, wonelerani vidiyo yakuti, Kasi pa Nyumba ya Ufumu Pakuchitika Vichi?
Kuti mumanye uko maungano ghakuchitikira kufupi na kukwinu lutani pa jw.org apo ŵalemba kuti MANYANI VYA ISE, Maungano, Maungano gha Mpingo gha Ŵakaboni ŵa Yehova.
Nkhani za pa intaneti na mavidiyo
Nkhani zinandi na mavidiyo ivyo vikusangika pa webusayiti iyi vingamovwirani kuti mumanye vinandi vyakukhwaskana na ivyo Yesu wakasambizga kweniso kuzirwa kwa sembe yake.
Mwachiyelezgero, kuti mumanye umo viliri kuti nyifwa ya munthu yumoza yingawombolera ŵanthu mamiliyoni ghanandi, ŵazgani nkhani yakuti “Kasi Yesu Wakuponoska Wuli Ŵanthu?” kweniso yakuti “Chifukwa Wuli Yesu Wakasuzgika na Kufwa?” panji muwonelere vidiyo yakuti Chifukwa wuli Yesu Wakafwa?