Ŵakaboni ŵa Yehova Ŵakakomeka Mwankhaza—Kasi Baibolo Likuti Wuli?

Pa January 27, 2023, ŵanthu ŵanandi ŵazamukumbukira ŵanthu awo ŵakakomeka mwankhaza pa charu chose chapasi. Vinthu vyankhaza ivyo vikachitika vyaka 75 ivyo vyajumpha vikupangiska ŵanji kujifumba kuti, Chifukwa wuli Chiuta wakazomerezga kuti ŵanthu ŵakomeke mwankhaza nthena?

•  Kuti mumanye ivyo Baibolo likuyowoya, ŵazgani nkhani ya mutu wakuti, “Chifukwa Wuli Ŵayuda Ŵakakomeka na Ŵanazi ku Germany? Chifukwa Wuli Chiuta Wakalekelera Waka?”

Ŵanthu wa mtundu wa Chiyuda ŵakasuzgika chomene ndipo ŵakakomeka mwankhaza. Ŵanthu mamiliyoni ŵakakomeka. Kweniso magulu ghanyake gha ŵanthu ghakakomeka pa nyengo iyi. Pa ŵanthu aŵa pakaŵa Ŵakaboni ŵa Yehova awo ŵakakomeka chifukwa cha chipulikano chawo.

•  Kuti mumanye vinandi wonani nkhani ya mutu wakuti, “Kasi Ntchivichi Chikachitikira Ŵakaboni ŵa Yehova mu Nyengo ya Chipani cha Nazi?”

“Munthazi muwemi na chigomezgo”

Ŵanthu ŵanandi ŵakufipa mtima kuti vinthu vyankhaza ivi vingazakachitikaso munthazi. Kweni chakukondweska ntchakuti Baibolo likutiphalira kuti munthazi vinthu vyanthena ivi vizamuŵakoso yayi.

•  “Yehova wakuti: ‘Pakuti nkhumanya maghanoghano agho nkhughanaghanira imwe, maghanoghano gha mtende, gha soka chara, kumupani munthazi muwemi na chigomezgo.’”—Yeremiya 29:11.a

Ivi vizamuchitika para Chiuta wazakamazga viheni vyose na kunozgaso vinthu vyose ivyo vili kunangika. Sonosono apa iyo:

•  Wawuskengepo wose awo ŵakupweteka ŵanyawo.—Zintharika 2:22.

•  Wazamupembuzga wose awo ŵakutambuzgika.—Chivumbuzi 21:4.

•  Wazamuwuska awo ŵali kufwa na kuŵaso ŵamoyo pa charu chapasi.—Yohane 5:28, 29.

Mungagomezga uthenga wakupembuzga uwu, uwo Baibolo likuyowoya. Kuti mumanye vinandi, tikumupemphani kuti mwambe kosi yakusambira Baibolo kwaulere.