Mungasanga Chigomezgo mu 2024—Kasi Baibolo Likuti Wuli?

Ŵanthu ŵanandi ŵakuwona kuti palije nthowa yakumazgira masuzgo agho ŵakukumana nagho mu 2024. Kweni unenesko ngwakuti tingasanga chigomezgo. Kasi tingachisanga nkhu?

Baibolo likutipa chigomezgo

Baibolo likuti Chiuta wamazgenge masuzgo ghose agho ghakutipangiska kuwona nga palije chigomezgo. Sonosono apa, Chiuta “wazamufyura masozi ghose ku maso [ghithu], ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—Chivumbuzi 21:4.

• Kuti mumanye vinandi ivyo Baibolo likulayizga kuti vichitikenge munthazi, ŵazgani nkhani ya mutu wakuti “Chigomezgo Chakuti Kunthazi Vinthu Vizamusintha.”

Kasi Baibolo lingamovwirani wuli pasono?

Baibolo likutipa chigomezgo kuti munthazi vinthu viŵenge makora, ndipo ivi vingamovwirani kuti mutonde maghanoghano ghaheni na kwamba kuŵa na chigomezgo chiwemi cha munthazi. (Ŵaroma 15:13) Kweniso Baibolo lingamovwirani umo mungachitira mwamahara na masuzgo agho mukusangana nagho pasono nga ukavu, vinthu vyambura urunji, kweniso ulwari.

• Wonani umo Baibolo likamovwilira munthu munyake kuti waŵe na mtende kweniso chimwemwe nangauli wakaŵa mukavu. Wonelerani vidiyo ya mutu wakuti Juan Pablo Zermeño: Yehova Wakanipa Umoyo Wakukhorweska.

• Wonani umo Baibolo lingamovwilirani para mukujiyimba mulandu, muli na chitima, mukwenjerwa, panji para mubali winu wafwa. Ŵazgani nkhani ya mutu wakuti “Kasi mu Baibolo Ningasangamo Mazgu Ghakupembuzga?”

• Wonani umo munthu uyo wakaŵa msilikari uyo wakujilongosora kuti “wakaŵa wankhaza kweniso wambura lusungu,” wakasangira chigomezgo chifukwa cha kusambira Baibolo. Wonelerani vidiyo ya mutu wakuti Nkhaleka Usilikari.

Pangani chaka cha 2024 kuŵa chiwemi kwa imwe na banja linu. Sambirani vinandi umo Baibolo lingamovwilirani. Yezgani mwaulere kosi yakusambira Baibolo na msambizgi. Wonani umo Chiuta wangamupirani “maghanoghano gha mtende” sono kweniso “munthazi muwemi na chigomezgo.”—Yeremiya 29:11.