Viwawa vya Ndyali—Kasi Baibolo Likuti Wuli?

Kuchitira nkhaza ŵalaraŵalara ŵa boma kwazara chomene mazuŵa ghano.

Chifukwa wuli ŵandyali ŵakuchitirana nkhaza nthena? Kasi nkhaza izi zizamumara? Kasi Baibolo Likuti Wuli?

Kugaŵikana Chifukwa cha Ndyali Kukayowoyekerathu

Baibolo likayowoyerathu kuti mu nyengo yithu iyi, iyo yikumanyikwa kuti “mazuŵa ghaumaliro,” ŵanthu ŵanandi ŵazamuŵa ŵa nkhaza kweniso ŵakwambiska mphindano.

• “Mu mazuŵa ghaumaliro kuzamuŵa nyengo zinonono na zakusuzga. Pakuti ŵanthu ŵazamuŵa . . . ŵambura kuwonga, ŵambura kugomezgeka, . . . ŵanonono, . . . ŵakofya, . . . ŵakwendera mphiska, ŵakajilangi, ŵakujitukumura.—2 Timote 3:1-4.

Kweniso Baibolo likayowoyerathu kuti mu nyengo yithu iyi kuzamuŵa mautimbanizgi nga nkhuwukira boma kweniso viwawa vya ndyali. (Luka 21:9, mazgu ghamusi) Kweni nkhaza izo zikuchitika chifukwa cha ndyali kweniso kugaŵikana vilutilirenge yayi.

Umo nkhaza izo zikuchitika chifukwa cha ndyali zizamumalira

Baibolo likuyowoya kuti Chiuta wazamuwuskapo maboma ghose gha ŵanthu na kwimika boma lake lakuchanya.

• “Chiuta wakuchanya wazamwimika ufumu . . . uwo uzamuteketa na kumazga maufumu ghose agha, ndipo iwo wekha ndiwo uzamuŵako kwamuyirayira.”—Daniyeli 2:44.

Ufumu wa Chiuta uzamupangiska kuti ŵanthu ŵaŵe ŵakukolerana zanadi na kukhazikiska mtende pa charu chose chapasi.

• Muwusi wa Ufumu uwu Yesu Khristu, wakuchemeka kuti “Karonga wa Mtende,” ndipo wazamuwoneseska kuti ‘mtende uzaleke kumara.’—Yesaya 9:6, 7.

• Nanga ni sono nthena awo ŵali pasi pa muwuso wake ŵakusambira umo ŵangakhalira mwamutende. Lekani Baibolo likuyowoya kuti: “Ŵazamuskana malupanga ghawo kuŵa vyakulimira, mikondo yawo kuŵa vyakuphatilira makuni. Mtundu uzamuwuskira mtundu unyake lupanga chara, ndipo ŵazamusambiraso nkhondo chara.”—Yesaya 2:3, 4.

Kuti mumanye vinandi, ŵazgani nkhani ya mutu wakuti, “Kasi Ufumu wa Chiuta Uzamuchita Vichi?” na kuwonelera vidiyo ya mutu wakuti Kasi Ufumu wa Chiuta Ni Vichi?