Kasi Lilipo Boma Lakugomezgeka Ilo Lingendeska Makora Vinthu pa Charu Chapasi?—Kasi Baibolo Likuti Wuli?

Maboma gha ŵanthu pacharu chose chapasi ghali pa masuzgo ghakuru. Nanga mungaŵa mu vyaru ivyo vikuwoneka kuti vinthu vikwenda makora, maboma ghatimbanizgika chifukwa cha vinthu viheni iyo vikuchitika mu charu, ŵanthu mbakugaŵikana chifukwa cha ndyali, visola kweniso viwoneskero ivyo ŵanthu ŵakuchita chifukwa cha kukwiya na umo vinthu vikwendera.

Kweni Baibolo likuyowoya kuti pali boma limoza ilo ndakugomezgeka. Panyake muli kupulikapo kale vya boma ili. Ni ilo Yesu Khristu wakalizunura mu lurombo ulo wakasambizganga ŵasambiri wake.

• “Ntheura, pakulomba mutenge: ‘Adada ŵithu imwe muli kuchanya, zina linu lituŵiskike. Ufumu winu wize. Khumbo linu lichitike pano pasi nga nkhuchanya.”—Mateyu 6:9, 10.

Kasi Baibolo likuyowoya vichi vyakukhwaskana na Ufumu uwu?

Ufumu uwu ni boma lakugomezgeka

Ufumu uwu ukuwusa kuchanya.

• Yesu wakayowoya kuti boma ili ni “Ufumu wakuchanya.” (Mateyu 4:17; 5:3, 10, 19, 20) Lekani ntchakupulikikwa kuti wakayowoyaso kuti: “Ufumu wane ngwa charu chino chara.”—Yohane 18:36.

Ufumu uwu uzamunjira m’malo mwa maboma ghose gha ŵanthu.

• Baibolo likuti: “Ufumu uwu . . . uzamuteketa na kumazga maufumu ghose agha (gha ŵanthu), ndipo iwo wekha ndiwo uzamuŵako kwamuyirayira.”—Daniyeli 2:44.

Ufumu wakuchanya uwo Fumu yake ni Yesu Khristu uzamuparanyikapo yayi.

• Baibolo likuyowoya kuti: “Muwuso wake ngwamuyirayira ndipo uzamumara chara. Ufumu wake uzamuparanyika chara.”—Daniyeli 7:13, 14.

Ufumu uwu uzamwiziska mtende na chivikiliro pa charu chapasi.

• Baibolo likuti: “Waliyose wazamukhala musi mwa khuni lake la mpheska na musi mwa khuni lake la mkuyu, ndipo palije na yumoza uyo wazamuŵawofya.”—Mika 4:4.

Manyani vinandi vyakukhwaskana na Ufumu uwu

Apo Yesu wakaŵa pa charu chapasi, wakamaliranga nyengo yake pa “kupharazga makani ghawemi gha Ufumu.” (Mateyu 9:35) Ndipo wakayowoyerathu kuti:

• “Makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.”—Mateyu 24:14.

Mazuŵa ghano, makani ghawemi gha Ufumu ghakupharazgika mu vyaru vyakujumpha 240. Tikumupemphani kuti musambirenge Baibolo kuti mumanye vinandi vyakukhwaskana na boma ili kweniso umo mungasangira chandulo na muwuso wake.

Wonelerani vidiyo yakuti Kasi Ufumu wa Chiuta Ni Vichi?