IVYO ŴACHINYAMATA ŴAKUFUMBA
Kasi Ningachita Wuli Usange Nkhukhumba Yayi Kuluta ku Sukulu?
Vingaŵa kuti ukukhumba yayi kuluta ku sukulu chifukwa chakuti ŵasambizgi mbakusuzga, ukuchichizgika na ŵanyako, mayeso ghakukusuzga panjiso ukuŵa na homuweki yinandi. Ntheura ntchakupulikikwa usange ukuti ukukhumbaso yayi kuluta ku sukulu.a Rachel uyo wali na vyaka 19 b wakuti:
“Ningatemwa kuluta kulikose kweni ku sukulu pera ndiko yayi. Chingaŵa chiwemi kuluta waka ku nyanja panji kuchezga waka na ŵanyane panjiso kovwira ŵapapi ŵane kuphika panji kutozga malo.”
Usange nawe ukujipulika nga ni umo wakujipulikira Rachel, mbwe ungawona sukulu nga kuti wajalirika mu jele ilo uzamufumiskika para wamalizga masambiro ghako. Kasi ungachita wuli kuti uwonenge mwakwenelera nyengo iyo ukumalira ku sukulu?
Kasi ukumanya? Usange ukuyiwona mwakwenelera sukulu, ukufipaso mtima yayi panji kuluta mwakuchichizgika waka. M’malo mwake, ukwamba kuyiwona kuti ntchinthu icho chingakovwira kuŵa na luso ulo uzamukhumbikwira kunthazi para wakura.
Kuti uyiwonenge mwakwenelera sukulu yezga kuŵika mtima pa vinthu vyakulondezgapo ivi:
Masambiro ghako. Para ukusambira vinthu vinandi, vizamukovwira kuti kunthazi uzakaleke kuthemba waka ŵanji kweni uzamumarananga nagho wekha masuzgo. Jifumba kuti, ‘Nanga pangaŵa vinyake vyakukhwaskana na sukulu ivyo nkhuvitemwa yayi, kweni kasi vilipo vinyake ivyo nkhusambira ivyo nkhuwona kuti ni vyakukhumbikwa?’
Fundo ya mu Baibolo: “Sungilira vinjeru na kaghanaghaniro kawemi.”—Zintharika 3:21.
Kuti umanye vinandi wona nkhani yakuti, “Kasi Ningachita Wuli Usange Nkhuwerapo Waka mu Kilasi?”
Ivyo ukuchita. Sukulu yingakovwira umo ungachitira kuti ugaŵenge makora nyengo, ujikorenge, kweniso kuti ulimbikirenge chomene ntchito. Ivi ni vinyake mwa ivyo uzamukhumbikwira para wazakakura. Jifumba kuti: ‘Kasi sukulu yikunovwira wuli kuti nijikorenge na kulimbikira ntchito? Kasi ningachita wuli kuti nambe kuchita makora pa vigaŵa ivi?’
Fundo ya mu Baibolo: “Ntchito yiliyose iyo munthu wakulimbikira kuyichita yili na chandulo.”—Zintharika 14:23.
Kuti umanye vinandi, wona nkhani yakuti “Kasi Ningachita Wuli Kuti Nigaŵenge Makora Nyengo?”
Ubwezi wako na ŵanji. Kuchezga na ŵanyako ku sukulu kungakovwira kuti uŵe ŵalusungu na kuchindika ŵanji. Munyamata munyake zina lake Joshua wakati: “Kusambira umo ungayowoyera na ŵanthu ntchakuzirwa, vingayana waka na kusambira chisambizgo cha history panji science. Nakuti kungakovwira umoyo wako wose.” Jifumba kuti ‘Kasi ku sukulu nili kusambirako vichi ivyo vinganovwira kuti nikhalenge makora na ŵanji nanga ni awo tikupambana kwakufumira panji ivyo tikugomezga?’
Fundo ya mu Baibolo: “Limbikirani kuŵa pamtende na ŵanthu wose.”—Ŵahebere 12:14.
Kuti umanye vinandi wona nkhani yakuti “Ivyo Mungachita Kuti Mudumbiskane Makora na Ŵanji”
Munthazi mwako. Sukulu yingakovwira kumanya luso ulo uli nalo na kujipangira vilato vyakuyana na luso lwako. Msungwana munyake zina lake Brooke, wakuti: “Pa sukulu wamunthu ungasambira ntchito yinyake mwakuti para wamalizga uzakasange ntchito yakuyana na ivyo uli kusambira, ndimo ine nkhachitira.” Jifumba kuti: ‘Kasi nizamuchita wuli kuti nisange vyakukhumbikwa pa umoyo wane? Kasi ningachita wuli kuti nisambire vinthu vyakukolerana na ntchito iyo nkhukhumba?’
Fundo ya mu Baibolo: “Skesketezga nthowa ya malundi ghako.”—Zintharika 4:26.
a Fundo zinandi izo zili mu nkhani iyi ni zakovwiraso ku ŵana awo ŵakusambilira sukulu pa nyumba.
b Mazina ghanyake ghasinthika.