Kasi Chiuta Wangazgora Malurombo Ghane?

Ivyo Baibolo likuyowoya

Enya, wazgorenge. Baibolo likuyowoya kuti Chiuta wakuzgora malurombo. Kweniso ivyo vikachitikira ŵanthu ŵanyake, vikulongora kuti Chiuta wakuzgora. Baibolo likuti: “[Chiuta] wakukhorweska khumbo la awo ŵakumopa. Wakupulika para ŵakulira kuti waŵavwire, ndipo wakuŵathaska.” (Salimo 145:19) Kweni kuti Chiuta wazgore malurombo ghinu vikuthemba pa umo imwe mukuchitira.

Ivyo mungachita kuti Chiuta wapulike malurombo ghinu

• Mukwenera yayi kulomba kwa Yesu, Mariya, ŵatuŵa, ŵangelo, panji vikozgo, kweni kwa Chiuta pera. Baibolo likuti ni Yehova Chiuta pera uyo ‘wakupulika malurombo.’—Salimo 65:2.

• Mukwenera kulomba mwakuyana na khumbo la Chiuta.—1 Yohane 5:14.

• Mukwenera kulomba kwizira mu zina la Yesu chifukwa mukulongora kuti mukumuchindika. Lekani Yesu wakati: “Palije uyo wakwiza kwa Adada kwambura kwizira mwa ine.”—Yohane 14:6.

• Mukwenera kugomezga kuti Chiuta wamupaninge ivyo mukupempha. Mungalombaso kuti Chiuta wamusazgiraniko chipulikano.—Mateyu 21:22; Luka 17:5.

• Mukwenera kujiyuyura. Baibolo likuti: “Yehova ngwapachanya, kweni wakuwona ŵakujiyuyura.”—Salimo 138:6.

• Mukwenera kulutilira kulomba. Yesu wakati: “Lutilirani kupenja, ndipo musangenge.”—Luka 11:9.

Ivyo Chiuta wakuwona yayi kuti wamuzgorani para mwalomba

• Mtundu panji uko mukufuma. Baibolo likuti: “Chiuta wakutemwera yayi, kweni wakupokelera munthu wa mtundu uliwose uyo wakumopa na kuchita urunji.”—Milimo 10:34, 35.

• Umo mwakhalira. Pakulomba, mungakhala pasi, mungajikama, mungasindama, panji mungayimilira.—1 Midauko 17:16; Nehemiya 8:6; Daniyeli 6:10; Mariko 11:25.

• Kwali mukulomba mwakukwezga panji cha mu mtima, Chiuta wakupulika.—Nehemiya 2:1-6.

• Kwali suzgo ndikuru panji ndichoko, Chiuta wakuti ‘timuthulire vyose ivyo tikwenjerwa navyo chifukwa wakutipwelelera.’—1 Petrosi 5:7.