Kasi Baibolo Likuti Wuli pa Nkhani ya Kupokera Ndopa?

Ivyo Baibolo likuyowoya

Baibolo likukana kurya ndopa. Ntheura tikwenera yayi kuzomera kupokera ndopa panji vigaŵa vikuruvikuru vya ndopa, nesi kurya ndopa munthowa yiliyose. Wonani ivyo malemba agha ghakuyowoya:

• Genizesi 9:4. Pamanyuma pa Chigumula, Chiuta wakazomerezga Nowa na banja lake kurya nyama, kweni wakaŵakanizga kurya ndopa. Chiuta wakaphalira Nowa kuti: “Mungaryanga nyama lumoza na umoyo wake yayi, uwo ni ndopa zake.” Dango ili lichali kugwira ntchito mazuŵa ghano chifukwa tose ndise ŵazukuru ŵa Nowa.

• Levitiko 17:14. “Mungaryanga yayi ndopa za chamoyo cha mtundu uliwose, chifukwa umoyo wa chamoyo chilichose ni ndopa zake. Waliyose uyo wakurya ndopa wadumulike.” Chiuta wakuwona kuti umoyo wa chamoyo chilichose uli mu ndopa, ndipo ndiyo wakupeleka umoyo. Nangauli dango ili likapelekeka ku mtundu wa Ŵaisrayeli pera, kweni likulongora kuti Chiuta wakuyiwona mwakupepuka yayi nkhani ya kurya ndopa.

• Milimo 15:20. ‘Ziŵizgani ndopa.’ Dango lakukanizga kurya ndopa ilo Chiuta wakapeleka kwa Nowa, wakalipelekaso ku Ŵakhristu. Mbiri yikulongora kuti Ŵakhristu ŵakwambilira ŵakaryanga yayi ndopa, panji kuzigwiliskira ntchito nga munkhwala.

Chifukwa wuli Chiuta wakuti tiziŵizgenge ndopa?

Pali maukaboni gha chipatala agho ghakulongora kuti kupokera ndopa nkhuheni. Kweni chifukwa chikuru icho Chiuta wakuti tiziŵizgenge ndopa ntchakuti ndopa ni zakupatulika kwa iyo.—Levitiko 17:11; Ŵakolose 1:20.