Kasi Viŵanda Viliko Nadi?

Ivyo Baibolo likuyowoya

Enya viliko. Viŵanda mbangelo “awo ŵakananga” na kugalukira Chiuta. (2 Petrosi 2:4) Satana Dyabulosi ndiyo wakaŵa mungelo wakwamba kujizgora kuŵa chiŵanda. Baibolo likuti Satana ni “fumu ya viŵanda.”—Mateyu 12:24, 26.

Ŵangelo awo ŵakagaluka mu nyengo ya Nowa

Baibolo likuyowoya vya ŵangelo awo ŵakagaluka pambere Chigumura cha mu nyengo ya Nowa chindachitike. Likuti: “Ŵana ŵa Chiuta waunenesko ŵakawona ŵana ŵanakazi ŵa ŵanthu kuti mbakutowa. Ntheura ŵakamba kutora ŵanakazi wose awo iwo ŵakhumba, kuŵa ŵawoli ŵawo.” (Genizesi 6:2) Ŵangelo ŵaheni aŵa “ŵakaleka malo ghawo ghakwenelera kukhalako” kuchanya, ndipo ŵakavwara mathupi gha ŵanthu kuti ŵagone na ŵanakazi.—Yuda 6.

Pa Chigumura, ŵangelo ŵakugaluka aŵa ŵakavura mathupi gha ŵanthu na kuwelera kuchanya. Kweni Chiuta wakaŵazomerezga yayi kuti ŵalutilire kuŵa mu banja lake la ŵangelo ŵakugomezgeka. Pakuŵalanga, Chiuta wali kuŵapoka nkhongono kuti ŵaleke kujizgoraso kuŵa ŵanthu.—Ŵaefeso 6:11, 12.