Kasi Ŵakaboni ŵa Yehova Ŵakupeleka Chakhumi?

Yayi. Ŵakaboni ŵa Yehova ŵakupeleka ndalama zakovwira pa ntchito yawo kwambura kujiwoneskera. Kasi chakhumi ni vichi, ndipo chifukwa wuli Ŵakaboni ŵa Yehova ŵakupeleka yayi chakhumi?

Ŵaisrayeli ndiwo ŵakapika dango lakuti ŵapelekenge chakhumi. Dango likati pa vinthu 10 ivyo munthu wasanga, chimoza wapelekenge kwa Chiuta. Kweni Baibolo likuti Dango ili likugwira ntchito yayi ku Ŵakhristu. ‘Languro la kupoka chakhumi ku ŵanthu,’ naloso likugwira ntchito yayi ku Ŵakhristu.—Ŵahebere 7:5, 18; Ŵakolose 2:13, 14.

Ŵakaboni ŵa Yehova ŵakupeleka chakhumi yayi. Kweni ŵakulondezga ivyo ŵakachitanga Ŵakhristu ŵakale. Ŵakupharazga kwambura kulipirika, kweniso ŵakupeleka ndalama zawo kwambura kuchichizgika.

Ŵakaboni ŵa Yehova ŵakupulikira ulongozgi wa mu Baibolo wakuti: ‘Waliyose wachite umo wadumulira mu mtima wake, mwakukwenyelera yayi panji mwakuchichizgika, chifukwa Chiuta wakutemwa uyo wakupeleka mwakukondwa.’—2 Ŵakorinte 9:7.