Kasi Kwananga Ni Vichi?
Ivyo Baibolo likuyowoya
Kwananga nkhuchita panji kughanaghana vinthu ivyo vikususkana na fundo za Chiuta. Ivi vingasazgapo kuswa malango gha Chiuta mwakuchita icho ntchiheni panji chambura kwenelera mu maso gha Chiuta. (1 Yohane 3:4; 5:17) Baibolo likulongora kuti kwananga nkhuchita chinthu chambura kwenelera.—Yakobe 4:17.
Mu viyowoyero vyakwambilira ivyo ŵakagwiliskira ntchito pakulemba Baibolo, kwananga kukung’anamura “kuwinda.” Mwachiyelezgero, magulu gha ŵasilikari Ŵachiisrayeli mu nyengo yakale ghakaŵa ghaluso chomene pakugwiliskira ntchito chakuponyera malibwe ndipo para ŵaponya libwe ‘ŵakawindanga yayi.’ Mazgu agha para ŵaghang’anamura waka umo ghaliri nadi ndikuti ghangalembeka kuti “ŵakabudanga yayi.” (Ŵeruzgi 20:16) Ivi vikung’anamura waka kuti kwananga nkhuwinda fundo za urunji za Chiuta.
Pakuŵa Mlengi, Chiuta wali na wanangwa wakusankhira ŵanthu fundo izo ŵakwenera kwendera. (Chivumbuzi 4:11) Ntheura tizamupatawura kwa iyo.—Ŵaroma 14:12.
Kasi vingachitika kuti munthu walekerethu kwananga?
Yayi. Baibolo likuti “wose ŵali kwananga ndipo ŵakupeleŵera pa uchindami wa Chiuta.” (Ŵaroma 3:23; 1 Mathemba 8:46; Mupharazgi 7:20; 1 Yohane 1:8) Chifukwa wuli vili nthena?
Pakwambilira, ŵanthu ŵakwamba, Adamu na Eva, ŵakaŵa ŵambura zakwananga. Chifukwa ntchakuti ŵakalengeka mu chikozgo cha Chiuta. (Genizesi 1:27) Ndipouli, ŵakataya mwaŵi uwo ŵakaŵa nawo chifukwa cha kuleka kupulikira Chiuta. (Genizesi 3:5, 6, 17-19) Ntheura ŵanthu aŵa ŵakaŵapirako zakwananga ŵana ŵawo. (Ŵaroma 5:12) Lekani Themba la Israyeli Davide likati: “Ine nkhababika wakubuda.”—Salimo 51:5.
Kasi zakwananga zinyake ni ziheni chomene kuluska zinyake?
Enya. Mwachiyelezgero, Baibolo likuti ŵanthu ŵa mu Sodomu “ŵakaŵa ŵaheni na ŵakwananga chomene” ndipo zakwananga zawo zikaŵa ‘zikuru.’ (Genizesi 13:13; 18:20) Tiyeni tiwone vinthu vitatu ivyo vingapangiska kuti zakwananga ziŵe zikuru panji yayi.
Ukuru wa ubudi. Baibolo likutichenjezga kuti tigegenge zakwananga zikuru nga mbuzaghali, kusopa vikozgo, kwiba, uloŵevu, kuphanga, kukoma, na vyamizimu. (1 Ŵakorinte 6:9-11; Chivumbuzi 21:8) Baibolo likulongora kuti kwananga uku kukupambanako na kwananga uko munthu wakuchita kwambura kumanya, nga nkhuyowoya panji kuchita vyakukhuŵazga ŵanji. (Zintharika 12:18; Ŵaefeso 4:31, 32) Ndipouli Baibolo likutichiska kuti tikwenera kugega kuchita kwananga kwa mtundu uliwose uko kungatipangiska kuti tiswe malango gha Chiuta.—Mateyu 5:27, 28.
Chilato. Ubudi unyake ukuchitika chifukwa chakuleka kumanya ivyo Chiuta wakukhumba. (Milimo 17:30; 1 Timote 1:13) Kuchita nthena mbubudi nipera, ndipouli Baibolo likulongora kuti ubudi wanthena ukupambanako na ubudi uwo munthu wakukhumbira dala kuswa malango gha Chiuta. (Maŵazgo 15:30, 31) Vili nthena chifukwa chakuti ubudi wanthena ukufuma mu ‘mtima uheni.’—Yeremiya 16:12.
Kuwerezgawerezga. Baibolo likupambaniska pakati pa ubudi umoza na kuchita ubudi mwakuwerezgawerezga kwa nyengo yitali. (1 Yohane 3:4-8) Awo ‘ŵakuchitira dala kwananga’ pamanyuma pakumanya makora icho ntchiwemi, ŵazamupokera cheruzgo cha Chiuta.—Ŵahebere 10:26, 27.
Awo ŵachita zakwananga zikuru ŵangamba kujiyimba mulandu pa ivyo ŵachita. Mwachiyelezgero, Themba Davide likalemba kuti: “Mphuvya zane zabizga mutu wane. Zikunitonda kunyamura nga ni katundu muzito.” (Salimo 38:4) Ndipouli Baibolo likutiphalira kuti : “Wakwananga waleke nthowa yake, muheni maghanoghano ghake. Wawelere kwa Yehova, ndipo wamuchitirenge lusungu, kwa Chiuta withu, chifukwa wamugowokerenge chomene.”—Yesaya 55:7.