Kasi Baibolo Likukanizga Kumwa Moŵa?
Ivyo Baibolo likuyowoya
Baibolo likuIongora kuti nkhwananga yayi kumwapo moŵa pachoko waka. Likuti vinyo ntchawanangwa chakufuma kwa Chiuta ndipo likukondweska mtima. (Salimo 104:14, 15; Mupharazgi 3:13; 9:7) Baibolo likuyowoyaso kuti moŵa ungagwira ntchito nga ni munkhwara.—1 Timote 5:23.
Yesu nayo wakamwapo vinyo apo wakaŵa pa charu chapasi. (Mateyu 26:29; Luka 7:34) Umoza mwa minthondwe iyo wakachita, wakazgora maji kuŵa vinyo pa chiphikiro cha ukwati.—Yohane 2:1-10.
Uheni wakumwa chomene moŵa
Nangauli Baibolo likukanizga yayi kumwa moŵa, kweni likuti kumwa chomene panji kuloŵera nkhwananga. So para Mkhristu wasankha kumwapo moŵa, wakwenera kumwa mwakwenelera. (1 Timote 3:8; Tito 2:2, 3) Baibolo likuyowoya za kofya kwa kumwa chomene moŵa.
Moŵa ungapangiska munthu kutondeka kughanaghana makora. (Zintharika 23:29-35) Munthu uyo waloŵera wangalondezga yayi fundo ya mu Baibolo yakuti “mupeleke mathupi ghinu kuŵa sembe yamoyo, yituŵa, na yakuzomerezgeka kwa Chiuta, uwo mbuteŵeti wakupatulika pamoza na nkhongono yinu ya kughanaghana.”—Ŵaroma 12:1.
Kumwa chomene moŵa kungapangiska munthu kuchita vinthu mwambura mahara na kutondeka kuchita “icho ntchakunyoloka.”—Hoseya 4:11; Ŵaefeso 5:18.
Moŵa ungakavuska munthu kweniso ungapangiska matenda.—Zintharika 23:21, 31, 32.
Chiuta wakukondwa nawo yayi ŵaloŵevu.—Zintharika 23:20; Ŵagalatiya 5:19-21.
Kasi mungamanya wuli kuti munthu wamwa chomene?
Munthu uyo wamwa chomene mowa wangaŵika umoyo wake kweniso wa ŵanji pangozi. Kuyana na ivyo Baibolo likuyowoya tingati munthu wakumanyikwa kuti waloŵera para wafenta pera yayi. Munthu wakumanyikwaso kuti waloŵera para wakwenda mwakupenthyapenthya, wakutimbanizga ŵanyake kweniso wakuyowoya vyambura kupulikikwa. (Yobu 12:25; Salimo 107:27; Zintharika 23:29, 30, 33) Ŵanyake ŵakumwa chomene moŵa, kweni ŵakuloŵera yayi, ndipouli nawoso ŵakusangana na masuzgo ghakofya.—Luka 21:34, 35.
Kasi ni mpha apo tikwenera yayi kumwa moŵa?
Baibolo likuyowoyaso apo Ŵakhristu ŵakwenera yayi kumwa moŵa:
Usange ŵanji ŵangakhuŵara.—Ŵaroma 14:21.
Usange dango la boma likukanizga.—Ŵaroma 13:1.
Usange munthu wakutondeka kujikora. Ŵanthu awo ŵakutondeka kujikora pa nkhani ya moŵa, ŵakwenera kuchitapo kanthu mwaluŵiro na kusintha.—Mateyu 5:29, 30.