Kasi Kutchova Njuga Nkhwananga?

Ivyo Baibolo likuyowoya

Nangauli Baibolo likulongosora vinandi yayi pa nkhani ya kutchova njuga, kweni usange tingaghanaghanirapo chomene fundo zinyake za mu Baibolo zingatovwira kumanya maghanoghano gha Chiuta pa nkhani ya kutchova njuga.​—Ŵaefeso 5:17.a

• Kutchova njuga kukupangiska munthu kuŵa muryezi, nakuti Chiuta wakutinkha uryezi. (1 Ŵakorinte 6:9, 10; Ŵaefeso 5:3, 5) Awo ŵakutchova njuga ŵakukhazga kuti ŵasangenge ndalama para ŵanyawo ŵaluza, kweni Baibolo likukana kudokera vinthu ivyo ni vyako yayi.​—Ekisodo 20:17; Ŵaroma 7:7; 13:9, 10.

• Kutchova njuga, nanga nkhuyikapo ndalama yichoko waka, kungapangiska munthu kwamba kutemwa chomene ndalama.​—1 Timote 6:9, 10.

• Awo ŵakutchova njuga kanandi ŵakugomezga vyamizimu panji kuti ŵachitenge mwaŵi. Kweni Chiuta wakuwona kuti kuchita nthena vikuyana waka na kusopa vikozgo, ivyo vikukolerana yayi na kusopa kutuŵa.​—Yesaya 65:11.

• Baibolo likutichiska kuti tilimbikirenge ntchito m’malo mwa kwamba nkharo ziheni na chilato chakuti tisange vinthu vinyake mwambura kusuzga. (Mupharazgi 2:24; Ŵaefeso 4:28) Awo ŵakulondezga ulongozgi wa mu Baibolo ŵakurya “chakurya icho ŵachigwilira ntchito.”—2 Ŵatesalonika 3:10, 12.

• Kutchova njuga kungambiska mzimu uheni wakuphalizgana, uwo Baibolo likukanizga.​—Ŵagalatiya 5:26.