Kasi Ubatizo Ni Vichi?
Ivyo Baibolo likuyowoya
Ubatizo ukung’anamura kubizga mu maji thupi lose na kuzuwukamo.a Mu Baibolo muli kulembeka maubatizo ghanandi agho ghakachitika. (Milimo 2:41) Umoza mwa maubatizo agha, ngubatizo wa Yesu uwo ukachitikira mu mlonga wa Yorodani. (Mateyu 3:13, 16) Pati pajumpha vyaka vinandi mwanalume wa ku Etiyopiya wakabatizika pa “maji ghanandi” agho ghakaŵa mumphepete mwa msewu uwo wakendanga.—Milimo 8:36-40.
Yesu wakayowoya kuti awo ŵakumulondezga ŵakwenera kubatizika. (Mateyu 28:19, 20) Mpositole Petrosi nayo wakayilongosoraso makora fundo iyi.—1 Petrosi 3:21.
Ivyo vili mu nkhani iyi
Ng’anamuro la ubatizo
Ubatizo ntchilongolero chakuti uyo wabatizika ndikuti wali kulapa zakwananga zake ndipo wali kulayizga Chiuta kuti wamuteŵerenge kwa umoyo wake wose na kuchita khumbo lake. Ivi vikusazgapo kupulikira Chiuta na Yesu Nyengo zose. Ŵanthu awo ŵabatizika ŵakuŵa kuti ŵamba kwenda panthowa yakuya ku umoyo wamuyirayira.
Para munthu wabizgika mu maji ntchimanyikwiro chakuti wasintha umoyo wake. Kasi vikwenda wuli? Baibolo likuyelezgera ubatizo na kusunga munthu mu malaro (mawono). (Ŵaroma 6:4; Ŵakolose 2:12) Ntheura para munthu wabatizika mu maji wakuŵa nga wafwa ku milimo yake yakale. Para wakuzuwuka mu maji, wakuŵa kuti wamba umoyo uphya nga Mkhristu wakujipeleka.
Kasi Baibolo likuti wuli pa nkhani ya ubatizo wa ŵabonda?
Baibolo likuyowoyapo yayi mazgu ghakuti “Ubatizo wa ŵabonda”b Ndipo likusambizgapo yayi kuti bonda wakwenera kubatizika.
Ubatizo wa ŵabonda ukukolerana yayi na ivyo Baibolo likusambizga. Baibolo likusambizga kuti munthu uyo wakukhumba kubatizika wakwenera kufiska vinthu vinyake. Mwachiyelezgero, wakwenera kupulikiska makora fundo za mazgu gha Chiuta na kuzilondezga pa umoyo wake. Wakweneraso kulapa zakwananga zake, kweniso wakwenera kujipatulira kwa Yehova kwizira mulurombo. (Milimo 2:38, 41; 8:12) Bonda wangachita yayi vinthu vyose ivi.
Kasi kubatizika mu zina la Adada, la Mwana na la mzimu utuŵa kukung’anamurachi?
Yesu wakaphalira ŵalondezgi ŵake kuti mukazgore ŵanthu “kuŵa ŵasambiri . . . , mukaŵabatize mu zina la Adada na la Mwana, na la mzimu utuŵa. mukaŵasambizge kusungilira vinthu vyose ivyo namuphalirani.” (Mateyu 28:19, 20) Mazgu ghakuti “mu zina la ” ghakung’anamura kuti munthu uyo wakubatizika ndikuti wakumanya makora udindo wa Dada na Mwana (Yehova na Yesu), kweniso ntchito ya mzimu utuŵa wa Chiuta. Mwachiyelezgero: Mpositole Petrosi wakaphalira mwanalume uyo wakababika wakupendera kuti: “Mu zina la Yesu Khristu Munazarete, yamba kwenda!” (Milimo 3:6) Apa ng’anamuro la mazgu agha ndakupulikikwa makora chomene. Petrosi wakamanya kuti Khristu ndiyo wali na nkhongono zakuchizgira ŵanthu mwamunthodwe.
Mazgu ghakuti “Adada” ghakwimira Yehovac Chiuta. Pakuŵa Mlengi, Mupi wa Umoyo, kweniso Chiuta Wankhongono zose, Yehova wali na nkhongono zamburak chigoti.—Genizesi 17:1; Chivumbuzi 4:11.
“Mwana ” ni Yesu Khristu, uyo wakapeleka umoyo wake chifukwa cha ise. (Ŵaroma 6:23) Tingazakapona pekha para tikumanya makora udindo uwo Yesu wali nawo pa pa chilato icho Chiuta wali nacho ku ŵanthu.—Yohane 14:6; 20:31; Milimo 4:8-12.
“Mzimu utuŵa” ni nkhongono iyo Chiuta wakugwiliskira ntchito.d wagwiliskirapo ntchito mzimu utuŵa pakulenga vinthu, kupeleka umoyo, kutumizga uthenga ku ntchimi zake kweniso kovwira ŵanthu kuti ŵafiske khumbo lake. (Genizesi 1:2; Yobu 33:4; Ŵaroma 15:18, 19) Chiuta wakagwiliskiraso ntchito mzimu wake utuŵa kovwira awo ŵalembi ŵa Baibolo kuti ŵalembe maghanoghano ghakes.—2 Petrosi 1:21.
Kasi kubatizikaso nkhwananga?
Ntchinthu chachilendo yayi kuwona kuti ŵanthu ŵakusintha chisopa. Ntheura kasi para ŵakabatizika mu chisopa chawo chakale, nkhwananga kubatizikaso? Ŵanyake ŵakuwona kuti nkhwananga pakutolera ivyo likuyowoya lemba la Ŵaefeso 4:5, ilo likuti: “Fumu yimoza, chipulikano chimoza, ubatizo umoza.” Ndipouli lemba ili likung’anamura kuti munthu wangaleka kubatizikaso yayi. Chifukwa wuli tikuyowoya nthena?
Nkhani yose. Nkhani yose ya pa Ŵaefeso 4:5 yikulongora kuti mpositole Paulosi wakadidimizganga fundo yakuti Ŵakhristu ŵakwenera kuŵa ŵakukolerana pa ivyo ŵakugomezga. (Ŵaefeso 4:1-3, 16) Kuti ivi vichitike ŵakwenera kulondezga Fumu yimoza, Yesu Khristu, kuŵa na chipulikano chimoza, panji kuŵa na kapulikiskiro kamoza ka ivyo Baibolo likusambizga, na kulondezga ivyo malemba ghakuyowoya pa nkhani ya ubatizo.
Mpositole Paulosi wakachiska awo ŵakabatizika kale kuti ŵabatizikeso. Vikaŵa nthena chifukwa chakuti ŵakabatizika kwambura kupulikiska makora visambizgo vya Chikhristu.—Milimo 19:1-5.
Chifukwa chakwenelera chakubatizikira. Kuti ubatizo uŵe wakuzomerezgeka na Chiuta, munthu wakwenera kumanya makora unenesko wa mu Baibolo. (1 Timote 2:3, 4) Usange munthu wabatizika pa vifukwa ivyo vikususkana na malemba, ubatizo uwu ukuŵa wambura kuzomerezgeka pamaso pa Chiuta (Yohane 4:23, 24) Vingachitika kuti munthu uyu wangaŵa na vilato viwemi pakuchita nthena, kweni suzgo lingaŵa lakuti “ŵakumumanya makora yayi.” Chiuta (Ŵaroma 10:2) Ntheura kuti ubatizo wake uŵe wakuzomerezgeka naChiuta, wakwenera kusambira unenesko wa mu Baibolo, kuwulondezga pa umoyo wake, kujipatulira kwa Chiuta, na kubatizikaso. Munthu uyo wabatizikaso pa vifukwa ivi, wangaŵa kuti wananga yayi. Kweni wachita icho ntchakwenelera.
Maubatizo ghanyake agho ghakuzunulika mu Baibolo
Baibolo likuzunura maubatizo ghanyake agho ghali na ng’anamuro la kupambanako na ubatizo wa mu maji, uwo Ŵakhristu ŵakuchita. Wonani viyelezgero vyakulondezgapo ivi.
Ubatizo uwo wakachitanga Yohane Mubatizi.e Ŵayuda kweniso awo ŵakang’anamukira ku Chiyuda ŵakabatizikanga na Yohane kulongora kuti ŵapera kuswa malango agho Chiuta wakapeleka ku Ŵaisrayeli kwizira mwa Mozesi. Ubatizo wa Yohane uwu ndiwo ukawovwiranga ŵanthu kumanya na kuzomerezga kuti Yesu wa ku Nazarete ni Mesiya.—Luka 1:13-17; 3:2,3; Milimo 19:4.
Ubatizo wa Yesu Pera. Ubatizo uwo Yohane wakabatiza Yesu ukaŵa wakupambana na maubatizo ghanyake ghose. Yesu wakaŵa wakufikapo ndipo wakachitapo kwananga kulikose yayi. (1 Petrosi 2:21, 22) Ntheura iyo wakakhumbikwiranga kulapa zakwananga zake panjí ‘kulomba Chiuta kuti wamupe njuŵi yituŵa yayi’(1 Petrosi 3:21) Kweni ubatizo uwu ukaŵa waka chimanyikwiro chakuti wajipeleka kwa Chiuta pakumuteŵetera nga Khristu uyo wakalayizgika. Ivi vikasazgangapo kupeleka umoyo wake kuŵa chiwombolero.—Ŵahebere 10:7-10.
Kubatizika na mzimu utuŵa. Yohane Mubatizi kweniso Yesu ŵakayowoyapo vya kubatizika na mzimu utuŵa. (Mateyu 3:11; Luka 3:16; Milimo 1:1-5) Pali mphambano pakati pa kubatizika na mzimu utuŵa na kubatizika mu zina la mzimu utuŵa. (Mateyu 28:19) Kasi mphambano iyi njakuti wuli?
Ŵalondezgi ŵa Khristu ŵachoko waka ndiwo ŵakubatizika na mzimu utuŵa. Ŵakhristu aŵa ŵakuphakazgika na mzimu utuŵa chifukwa ŵakusoleka kuti ŵakateŵetere lumoza na Khristu kuchanya pakuŵa mafumu na ŵasembe.f (1 Petrosi 1:3, 4; Chivumbuzi 5:9,10) Iwo ŵazamuwusa ŵalondezgi ŵa Yesu ma miliyoni yanandi awo ŵali na chilindizga chakuzakakhala pano pa charu chapasi kwamuyirayira.—Mateyu 5:5; Luka 23:43.
Kubatizika mwa Khristu Yesu kweniso mu yifwa yake. Ŵanthu awo ŵakubatizika na mzimu utuŵa ŵakubatizikaso ‘mwa Khristu Yesu.’ (Ŵaroma 6:3) Ntheura ubatizo uwu ŵakubatizika nawo mbalondezgi ŵa Yesu awo mbakuphakazika awo wamuwusa nawo kuchanya. Para ŵabatizika mwa Yesu ŵakuŵa mugulu la ŵakuphakazgika ŵake. Yesu ndiyo ni mutu wa gulu ili ndipo awo ŵaphakazgika ŵakuzgoka thupi la gulu ili.—1 Ŵakorinte 12:12, 13, 27; Ŵakolose 1:18.
Ŵakhristu ŵakuphakazgika ŵakubatizikaso mu “nyifwa yake” [ya Yesu].” (Ŵaroma 6:3, 4) Nga Yesu, ŵakuphakazgika aŵa ŵakuŵikapo mtima kupulikira Chiuta pa umoyo wawo ndipo ŵakukhala umoyo wakujikondweska waka ŵekha yayi chifukwa ŵakumanya kuti chilindizga chawo cha umoyo wamuyirayira ntcha pa charu chapasi yayi. Para ŵafwa, ŵakuŵa kuti ŵamara kubatizika mu yifwa ya Yesu kufuma apo ŵakupokera umoyo kuchanya nga vilengiwa vyauzimu.—Ŵaroma 6:5; 1 Ŵakorinte 15:42-44.
Kubatizika na moto. Yohane Mubatizi wakaphalira awo ŵakamutegherezganga kuti: “Iyo [Yesu] wazamumubatizani na mzimu utuŵa ndiposo na moto. Chakuwuluskira chake chili mu woko lake, ndipo wazamuphyera tetete luŵaza lwake lwakupwanthirapo. Wazamulonga tirigu wake mu nthamba, kweni mwelero wazamuwuwotcha na moto wambura kuzimwika.” (Mateyu 3:11, 12) Mungawona kuti pali mphambano pakati pa kubatizika na moto kweniso kubatizika na mzimu utuŵa. Kasi apa Yohane wakang’anamuranga vichi pakuyowoya mazgu agha?
Tiligu wakwimira ŵanthu awo ŵakutegherezga mazgu gha Yesu. Ŵanthu aŵa ŵakuŵa na chilindizga chakubatizika na mzimu utuŵa. Mwelero ukwimira ŵanthu awo ŵakupulikira yayi Yesu. Ŵanthu aŵa ŵazamubatizika na moto, icho chikung’anamura kuti ŵazamuparanyikirathu.—Mateyu 3:7-12; Luka 3:16, 17.
a Mazgu ghachigiriki agho ghali kung’anamurika kuti “ubatizo” ghakuyowoya za “kubizga thupi lose mu maji,” kuyana na Vine’s Complete Expository Dictionary of Old and New Testament Words.
b “Ubatizo wa ŵabonda” ni ubatizo uwo ukuchitika mu matchalichi ghanyake uko ŵabonda ŵakupika mazina na kubatizika pakuŵanyafira panji kuŵathira maji kumutu.
c Yehova ni zina lenecho la Chiuta. (Salimo 83:18) Wonani nkhani yakuti “Kasi Yehova Ninjani?”
d Wonani nkhani yakuti “Kasi Mzimu Utuŵa Ni Vichi?”
e Wonani nkhani yakuti “Kasi Yohane Mubatizi Wakaŵa Njani?”
f Wonani nkhani yakuti “Kasi Mbanjani Ŵakuluta Kuchanya?”
g Baibolo likugwiliskira ntchito mazgu ghakuti “maubatizo” pakulongosora maluso ghanyake ghautozgi, nga kuthira maji pa viŵiya. (Mariko 7:4; Ŵahebere 9:10) Kweni ivi vikumbana na ubatizo wa Yesu na ŵalondezgi wake.