IVYO ŴACHINYAMATA ŴAKUFUMBA
Chifukwa Wuli Nkhwenera Kuŵa pa Mtende na Ŵana Ŵakwithu?
“Ŵanyane awo nkhuŵatemwa chomene”
Ŵanthu ŵanandi ŵakuti ŵana ŵakwawo “ndiwo mbanyawo awo ŵakuŵatemwa chomene.” Mukuŵatemwa ndipo nawo ŵakumutemwani chomene, kweni nyengo zinyake mukukwiyiskana. Msungwana munyake wa vyaka 18, zina lake Helena wakati: “Nyengo zinyake mubali wane wakunikwiyiska chomene. Iyo wakumanya makora ivyo wangayowoya panji kuchita kuti wanikwiyiske!”
Nyengo zinyake para ŵanthu paubali ŵapambana maghanoghano ŵangakaŵa yayi kudumbiskana na kuwezgerapo mtende. Mwachiyelezgero:
Ŵanthu awo ŵakugona chipinda chimoza ŵangapambana maghanoghano pa nkhani yakusunga chisisi. Kasi ŵangachita wuli? Yezgani kuchita ivyo munyinu wakukhumba. Londezgani ulongozgi wa mu Baibolo uwo uli pa Luka 6:31.
Nyengo zinyake munyake wangavwara laya la mubali wake kwambura kupempha. Kasi ŵangachita wuli? Ŵakwenera kudumbiskana na kuŵikirana mphaka. Londezgani ulongozgi wa mu Baibolo uwo uli pa 2 Timote 2:24.
Nyengo zinyake ŵanthu awo ŵali paubali ŵangapambana maghanoghano pa nkhani zikuruzikuru, ndipo panji pangaŵa masuzgo ghakuru. Wonani viyelezgero viŵiri ivi vya mu Baibolo:
Miriyamu na Aroni ŵakachitiranga sanji mubali wawo Mozesi ndipo vinthu vikamara makora yayi. Ŵerengani nkhani iyi pa Maŵazgo 12:1-15. Kufuma apo jifumbani kuti: ‘Kasi ningachita wuli kuti nileke kuchitira sanji mubali wane?’
Kayini wakakwiya chomene ndipo wakakoma mubali wake Abelu. Ŵerengani nkhani iyi pa Genizesi 4:1-12. Kufuma apo jifumbani kuti: ‘Kasi ningachepeskako wuli ukali para nayambana na mubali wane?’
Vifukwa viŵiri ivyo ukwenera kuŵira pa mtende
Nanga ungakwiyiskana wuli na ŵabali ŵako, kweni pali vifukwa viŵiri ivyo ukwenera kuŵikirapo mtima chomene kuti uŵe pa mtende.
Vikulongora kuti ndiwe wakukhwima. Munyamata munyake zina lake Alex wakati: “Nkhakaŵanga yayi kuŵakwiyira ŵadumbu ŵane, kweni pasono nkhuzikira chomene pakuchita nawo vinthu nanga ŵanganikwiyiska chomene. Nkhuwona kuti nakura.”
Baibolo likuti: “Uyo wakuleka kukalipa luŵiro wali na umanyi ukuru, kweni wakaŵefu wakulongora uchindere wake.”—Zintharika 14:29.
Kunozgekera vinthu vyamunthazi. Para sono vikukusuzga kuŵa pa mtende na ŵabali ŵako, mbwenu ndikuti vyamukusuzga kuŵa pa mtende na mfumu panji muwoli wako, ŵanyako ku ntchito, abwana ŵako panji munthu waliyose uyo ungachita nayo vinthu.
Fundo yakuzirwa chomene: Umo ukuchitira vinthu para mwapambana maghanoghano na ŵa mu banja lako ndivyo vizamukovwira umo uzamuchitira na ŵanji kunthazi.
Baibolo likuti: “Muŵe pamtende na ŵanthu wose, kuyana na umo mungafiskira.”—Ŵaroma 12:18.
Kasi ungakhumbikwira wovwiri wa umo ungamazgira masuzgo na ŵabali ŵako? Wona “Ivyo ŵanyako ŵakuyowoya,” yaniska na ivyo vili pa chigaŵa cha, “Kukolerana na Ŵanyako pa Nyumba.”