Kasi Ŵakaboni ŵa Yehova Ŵakuwona Wuli Kupatana?
Tikulondezga ivyo Baibolo likuyowoya pa nkhani ya nthengwa kweniso kupatana. Chiuta ndiyo wakambiska nthengwa ndipo wakukhumba kuti yingamaranga yayi. Baibolo likuti nthengwa yingamara pekha usange munyake wachita uleŵi.—Mateyu 19:5, 6, 9.
Kasi Ŵakaboni ŵa Yehova Ŵakovwira Nthengwa Izo Zili na Masuzgo?
Enya. Iwo ŵakovwira munthowa zinandi:
Mabuku. Mu mabuku agha mukusangika nkhani zinandi izo zingawovwira kukhozga nthengwa, nanga ni izo zili pafupi kumalirathu. Mwachiyelezgero, wonani nkhani izi: “Uleŵi,” “Kasi Mungaphepiska Wuli?,” na Kwambaso Kugomezgana.”
Maungano. Tikuŵa na maungano gha mpingo, kweniso maungano ghanyake ghakurughakuru, ndipo tikupokera ulongozgi wa mu Baibolo pa nkhani ya nthengwa.
Ŵalara. Ŵalara ŵa mpingo ŵakovwira ŵakutorana kulondezga ulongozgi wa mu Baibolo nga wa pa Ŵaefeso 5:22-25.
Kasi ŵalara ŵa mpingo ndiwo ŵakwenera kuzomerezga kuti nthengwa za Ŵakaboni ŵa Yehova zimare?
Yayi. Para ŵalara ŵa mpingo ŵakovwira ŵakutorana, nanga ni awo ŵali na masuzgo ghakuru, ŵakuzomerezgeka yayi kuŵasankhira vyakuchita. (Ŵagalatiya 6:5) Ndipouli, usange ŵanyake ŵasankha kumazga nthengwa yawo kwambura chifukwa cha mu Baibolo, ŵangapika yayi udindo uliwose mu mpingo. Kweniso Baibolo likuti ŵakwenera yayi kutora panji kutengwaso kunyake.—1 Timote 3:1, 5, 12.
Kasi Ŵakaboni ŵa Yehova ŵakuwona wuli kupatukana?
Baibolo likuti ŵakutorana ŵakwenera yayi kupatukana nanga ni para ŵakusangana na masuzgo. (1 Ŵakorinte 7:10-16) Masuzgo ghanandi ghangamara usange ŵakutorana ŵakulomba kufumira pasi pa mtima, ŵakulondezga fundo za mu Baibolo, kweniso ŵakutemwana.—1 Ŵakorinte 13:4-8; Ŵagalatiya 5:22.
Ndipouli, Ŵakhristu ŵanyake ŵasankha kupatukana pa vifukwa vyakwenelera ivi:
Kulekera dala kupeleka vyakukhumbikwa pa banja.—1 Timote 5:8.
Kuchitirana nkhaza izo zingaŵika umoyo pa ngozi.—Salimo 11:5.
Usange umoyo wauzimu wa munyake uli pa ngozi. Mwachiyelezgero, mfumu panji muwoli wangachichizga munyake kuswa malango gha Chiuta. So para vyaŵa nthena, munyake wangasankha kupatukana kuti walutilire “kupulikira Chiuta nga muwusi m’malo mwa ŵanthu.”—Milimo 5:29.