Kasi Kayini Wakatora Njani?

Ivyo Baibolo likuyowoya

Kayini wakaŵa mwana wakwamba wa Adamu na Eva, banja lakwamba ilo Chiuta wakambiska. Kayini wakatora yumoza wa ŵadumbu ŵake panji mubali wake wapafupi. Chifukwa wuli tikuyowoya nthena? Tiyeni tiwone ivyo Baibolo likuyowoya pa nkhani ya Kayini na banja lakwake.

Unenesko wakuyowoya za Kayini na banja lakwake

• Ŵanthu Wose Ŵali Kufuma kwa Adamu na Eva. Chiuta “wakalenga mitundu yose ya ŵanthu kufuma mwa munthu yumoza [Adamu] kuti yikhale pa charu chose chapasi.” (Milimo 17:26) Mwanakazi wa Adamu, Eva, wakaŵa “nyinawo wa ŵamoyo wose.” (Genizesi 3:20) Ntheura, Kayini wakwenera kuti wakatora yumoza wa ŵadumbu ŵake panji mubali wake wapafupi.

• Kayini na Abelu ndiwo ŵakaŵa ŵana ŵakwamba ŵa Eva. (Genizesi 4:1, 2) Kayini wati wachimbizgika chifukwa cha kukoma munung’una wake, Abelu, wakayowoya kuti: “Waliyose uyo wanisanga wanikomenge nadi.” (Genizesi 4:14) Kasi Kayini wakawopanga njani kuti wamukomenge? Baibolo likuyowoya kuti Adamu “wakababaso ŵana ŵanyake ŵanalume na ŵanakazi.” (Genizesi 5:4) Apa vikulongora kuti ŵana ŵanyake ŵa Adamu na Eva ndiwo ŵakate ŵamukomenge Kayini.

• Kale, ŵanthu ŵakatorananga paubali. Mwachiyelezgero, Abrahamu, uyo wakaŵa mwanalume wakugomezgeka, wakatora mudumbu wake uyo ŵakapambananga amama. (Genizesi 20:12) Dango la Mozesi ndilo likakanizga kutorana paubali. Dango ili likapelekeka pati pajumpha vyaka vinandi kufuma apo Kayini wakafwira. (Levitiko 18:9, 12, 13) Vikuwoneka kuti kale ŵana ŵakababikanga makora waka kwambura chilema nanga ŵanthu ŵangatorana paubali. Kweni vikupambanako na mazuŵa ghano.

• Baibolo likuyowoya kuti Adamu, Eva, na ŵana ŵawo ŵakaŵako nadi. Mbiri ya Adamu yikusangika mu buku la Genizesi, ilo likalembeka na Mozesi. Ezira na Luka nawo ŵakalembako mbiri iyi. (Genizesi 5:3-5; 1 Midauko 1:1-4; Luka 3:38) Awo ŵakalemba Baibolo ŵakulongosora kuti nkhani ya Kayini yikachitika nadi.—Ŵahebere 11:4; 1 Yohane 3:12; Yuda 11.