Kasi Kukhweŵa Hona Nkhwananga?

Ivyo Baibolo likuyowoya

Baibolo likuyowoyapo yayi vya kukhweŵa honaa panji umo tingachitira na hona. Ndipouli, lili na fundo izo zingatovwira kumanya vizgoŵi viheni kweniso vyaukazuzi ivyo Chiuta wakutinkha. Ivi vikutovwira kumanya kuti kukhweŵa hona nkhwananga.

Kuchindika umoyo. “Chiuta . . . wakupeleka ku ŵanthu wose umoyo na mvuchi.” (Milimo 17:24, 25) Pakuti Chiuta ndiyo wali kutipa umoyo, ntchiwemi yayi kuchita chilichose icho chingaŵika umoyo withu pa ngozi, nga nkhukhweŵa hona. Ŵanthu ŵanandi pa charu chapasi ŵakufwa chifukwa chakukhweŵa hona.
Kutemwa mzengezgani. “Utemwenge mzengezgani wako nga umo ukujitemwera wamwene.” (Mateyu 22:39) Usange munthu wakhweŵera pa ŵanthu wakulongora kuti wakuŵatemwa yayi. Ŵanthu awo ŵakuthutako josi la hona nawo ŵali pa ngozi yikuru chomene chifukwa ŵangasangika na matenda agho ghakwamba chifukwa cha kukhweŵa hona.
Kuŵa ŵatuŵa. “Mupeleke mathupi ghinu kuŵa sembe yamoyo, yituŵa, na yakuzomerezgeka kwa Chiuta.” (Ŵaroma 12:1) “Tiyeni tijitozge ku ukazuzi wose wa thupi na wauzimu, mwakuti tilutilire kuŵa ŵatuŵa apo tikopa Chiuta.” (2 Ŵakorinte 7:1) Ŵanthu awo ŵakukhweŵa hona ŵakuŵa ŵatuŵa yayi. Ŵanthu awo ŵakhweŵa ŵakuŵa ŵakufipirwa chifukwa ŵakunjizgira dala poyizoni mu mathupi ghawo.

Kasi Baibolo likuyowoyapo vichi pa nkhani yakugwiliskira ntchito chamba na vinyake?

Baibolo likuyowoyapo yayi za chamba panji munkhwala unyake wakuzweteska wongo. Kweni lili na fundo izo zingawovwira ŵanthu awo ŵali kuzgoŵera kugwiliskira ntchito munkhwala wakuzweteska wongo. Fundo izo zalongosoleka pachanya apa na izo zili musi umu nizakovwira:

Kughanaghana makora. “Utemwenge Yehova Chiuta wako . . . na maghanoghano ghako ghose.” (Mateyu 22:37, 38) “Sungilirani chomene maghanoghano ghinu.” (1 Petrosi 1:13) Munthu uyo wakugwiliskira ntchito munkhwala wakuzweteska wongo wakutondeka kughanaghana makora. Nakuti ŵanandi para ŵamba kuwugwiliskira chikuzgoka chizgoŵi. Maghanoghano ghawo ghose ghakuŵa pa umo ŵangasangira munkhwala unyake, m’malo mwakuŵa na maghanoghano ghawemi na ghakukhozga.—Ŵafilipi 4:8.
Kupulikira malango gha boma. “Ŵajilambikenge na kupulikira maboma na ŵamazaza.” (Tito 3:1) Mu vyaru vinandi, boma lili na malango agho ŵanthu ŵa mu charu icho ŵakwenera kulondezga pa nkhani ya munkhwala. Usange tikukhumba kukondweska Chiuta, tikwenera kupulikira ŵamazaza.—Ŵaroma 13:1.

Hona na Umoyo Winu

Wupu wa World Health Organization ukusachizga kuti chaka chilichose, ŵanthu pafupifupi 6 miliyoni ŵakufwa na matenda agho ghakwamba chifukwa cha hona. Paliso ŵanthu ŵakujumpha 600,000 awo ŵakukhweŵa yayi hona, kweni ŵakufwa chifukwa cha kuthutako waka josi la hona. Hona wakunanga umoyo wa ŵanthu awo ŵakukhweŵa na awo ŵakuthutako josi lake.

Kansa. Josi la hona lili na poyizoni wakofya chomene. Buku la Encyclopædia Britannica likuti “90 peresenti ya ŵanthu awo ŵakulwara kansa ya mu maphapu, ŵakalwara chifukwa cha josi la hona.” Josi la hona lingapangiska kansa mu viŵaro vinyake vya thupi nga mu mulomo, pasingo, chiwindi, kapamba, chithuziro na viŵaro vinyake.

Matenda ghakusuzgika kuthuta. Josi la hona likupangiska matenda ghakusuzgika kuthuta nga vilaso na chikhoso chakusulura mamphina. Ŵana awo kanandi ŵakuthutako josi la hona ŵangalwara chikhoso cha asima, chikhoso chambura kukonda munkhwala, na suzgo la maphapu.

Nthenda ya mtima. Ŵanthu awo ŵakukhweŵa hona ŵangalwara nthenda ya kufwa viŵaro kweniso ŵangaŵa na nthenda ya mtima. Para munthu wathuta josi la hona, mphepo ya poyizoni iyo yikuŵa mu hona yikunjira mu maphapu na mu ndopa ndipo yikukatimbanizga mphepo yiwemi ya okusijini. Para mphepo ya okusijini yachepa mu ndopa, mtima ukutondeka kugwira makora ntchito.

Mwana uyo wali munthumbo wakupwetekeka. Usange mama uyo wali na nthumbo wakukhweŵa wakupangiska kuti mwana wazakababike na myezi yambura kukwana, wambura nkhongono, panji wakupendera nga nkhupendera mulomo (cleft lip). Mwana uyo wababika wangaŵa na suzgo la kuthuta panji wangafwa.

a Para tikuyowoya vyakukhweŵa mu nkhani iyi tikung’anamura kukhweŵa kwa mtundu uliwose, kwali ni ndudu, phinya panji kuti folo. Kweni fundo izo zikuyowoyeka zikovwiraso awo ŵakuchita kusumba hona, kuwira, kubema, na vinthu vinyake.