Kasi Ningatonda Wuli Chiyezgo?

Mpositole Paulosi wakalemba kuti: “Para nkhukhumba kuchita chiwemi, icho ntchiheni chikuŵa nane.” (Ŵaroma 7:21) Kasi namwe muli kujipulikapo nthena? Usange namwe vili kumuchitikiranipo, nkhani iyi yimovwiraninge kuti mutonde makhumbiro ghaheni.

• Ivyo mukwenera kumanya

• Ivyo mungachita

• Ivyo ŵanyinu ŵakuyowoya

Ivyo mukwenera kumanya

Kanandi munthu wakuchita viheni chifukwa cha kuchichizgika na ŵanji. Nakuti Baibolo likuyowoya kuti “mendezgano ghaheni ghakunanga nkharo yiwemi.” (1 Ŵakorinte 15:33, mazgu ghamusi) Nyengo zinyake ŵanyinu ŵangamuchichizgani kweniso vyakusanguluska ivyo mukuwonelera vingamupangiskani kuti muyezgeke kuchita viheni na kwamba kulondezga “unandi wa ŵanthu.”—Ekisodo 23:2.

Jeremy wakuti: “Munthu wangachita chilichose icho ŵanthu ŵakukhumba na chilato chakuti ŵamutemwe kweniso kuti waleke kuwoneka kuti ngwakukhalira.”

Fundo yakuti mughanaghanirepo: Chifukwa wuli chiyezgo chingaŵa chikuru usange mukughanaghanira chomene pa umo ŵanthu ŵakumuwonerani?—Zintharika 29:25.

Fundo yikuru: Lekani kuzomerezga kuti ŵanyinu ŵamuchichizgani kuswa fundo izo mukwendera.

Ivyo mungachita

Manyani fundo izo mukwendera. Usange mukumanya makora yayi ivyo mukugomezga, mbwe ŵanyinu ŵamuseŵereskaninge nga ntchidoli. Ntheura ntchakuzirwa kulondezga ulongozgi wa mu Baibolo uwo ukuti: “Musande vinthu vyose. Koleskani icho ntchiwemi.” (1 Ŵatesalonika 5:21) Para mwazimanya makora fundo izo mukugomezga, mbwenu chimuŵiraninge chipusu kuzilondezga ndipo ivi vimovwiraninge kuti mutonde chiyezgo icho mungakumana nacho.

Fundo yakuti mughanaghanirepo: Chifukwa wuli mukugomezga kuti fundo za Chiuta za makhaliro ghawemi ni ziwemi kwa imwe?

Kimberly wakuti: “Nkhuwona kuti ŵanji ŵakunichindika chomene para nyengo zose nkhulondezga ivyo nkhugomezga kwambura kuthera ku chiyezgo.”

Chiyelezgero chiwemi cha mu Baibolo ni Daniyeli. Iyo “wakasimikizga mu mtima wake” apo wakaŵa wachali muchoko kuti walondezgenge malango gha Chiuta.—Daniyeli 1:8.

Manyani ivyo vikumusuzgani. Baibolo likuyowoya za “makhumbiro ghauwukirano” panji kuti vinthu ivyo vikusuzga chomene pawukirano. (2 Timote 2:22) Vinyake mwa vinthu ivi nkhuŵa na khumbo la kugonana, kuleka kuŵa wakukhalira, kweniso kuŵa na wanangwa wakuti muchitenge vinthu pamwekha uku muchali ŵachoko.

Fundo yakuti mughanaghanirepo: Baibolo likuti “waliyose wakuyezgeka para wakopeka na kunyengeka na khumbiro lake.” (Yakobe 1:14) Kasi imwe mukuyezgeka chomene na vichi?

Sylvia wakuti: “Wamunthu wekha ukwenera kujimanya makora za viyezgo ivyo chingaŵa chipusu kuthera. Ndipo ukwenera kufufuza ivyo vingakovwira kutonda viyezgo ivi, na kulemba fundo izo ungalondezga. Ivi vingawovwira kuti uleke kuthera para wazakasangana na chiyezgo ichi.”

Chiyelezgero chiwemi cha mu Baibolo ni Davide. Nyengo zinyake wakachitanga vinthu mwakuchichizgika na ŵanji kweniso kuyeyeka na makhumbiro ghake. Kweni Davide wakasambirapo kanthu pa ivyo wakabudiska ndipo wakaŵikapo mtima kuchita makora. Iyo wakalomba kwa Chiuta kuti: “Lengani mwa ine mtima wakutowa, na kuŵika mwa ine mzimu uphya, wakukhazikika.”—Salimo 51:10.

Chitanipo kanthu. Baibolo likuti: “Mungazomeranga yayi kuti uheni umuthereskani.” (Ŵaroma 12:21) Fundo iyi yikung’anamura kuti mukwenera kuthera dankha yayi ku chiyezgo. Mungasankha kuchita icho ntchiwemi para mwasangana na chiyezgo.

Fundo yakuti mughanaghanirepo: Kasi mungachita wuli kuti muleke kuthera para mukuyezgeka?

Sophia wakuti: “Nkhughanaghanira umo paumaliro ningajipulikira usange ningathera ku chiyezgo icho nakumana nacho. Kasi nizamuŵa wakukondwa? Panyake, kweni kwa kanyengo kachoko waka. Kasi nizamulutilira kuŵa wakukondwa kwa nyengo yitali? Yayi, m’malo mwake nizamuŵa na chitima chomene. Kasi ntchakwenelera kuti nithere? Yayi.”

Chiyelezgero chiwemi cha mu Baibolo ni Paulosi. Nangauli wakaŵa na khumbo kuchita viheni kweni wakajikora. Iyo wakalemba kuti: “Nkhulanga thupi lane ndipo nkhulilongozga nga ni muzga.”—1 Ŵakorinte 9:27, mazgu ghamusi.

Fundo yikuru: Ni udindo winu kuchitapo kanthu para mukuyezgeka.

Kuluwa yayi kuti chiyezgo chikuŵa cha kanyengo kachoko waka. Melissa uyo wali na vyaka 20 wakuti: “Vinthu vinandi ivyo nkhayezgekanga navyo chomene apo nkhaŵa ku sekondare, pasono nkhuviwonaso kuti ni vyakuzirwa yayi. Para nkhughanaghanira fundo iyi vikunovwira kumanya kuti viyezgo ivyo nkhukumana navyo pasono navyo para pajumpha nyengo vizamuŵaso vyambura kuzirwa, ndipo panyengo iyo nizamuwona kuti nkhachita makora kuleka kuthera.”