Kasi Baibolo Likuti Wuli pa Nkhani ya Kupa?
Ivyo Baibolo likuyowoya
Baibolo likuti tipengeko ŵanyithu kufumira pasi pa mtima kweniso pa vifukwa viwemi. Likuti uyo wakupeleka na mtima wose kweniso uyo wakupokera, wose ŵakuŵaso ŵakukondwa. (Zintharika 11:25; Luka 6:38) Yesu wakati: “Uyo wakupeleka wakukondwa chomene kuluska uyo wakupokera.”—Milimo 20:35.
Kupeleka uko Chiuta wakukondwa nako
Chiuta wakukondwa para munthu wakupeleka kufumira pasi pa mtima. Lemba la 2 Ŵakorinte 9:7 likuti: “Waliyose wachite umo wadumulira mu mtima wake, mwakukwenyelera yayi panji mwakuchichizgika, chifukwa Chiuta wakutemwa uyo wakupeleka mwakukondwa.”
Kupeleka mwakufumira pasi pamtima ntchigaŵa cha “kusopa” uko Chiuta wakukondwa nako. (Yakobe 1:27) Yehova wakukondwa chomene para munthu wakovwira na mtima wose ŵakusuzgika, ndipo wakuwona kuti tabwerekeska iyo. (Zintharika 19:17) Baibolo likuti Yehova wazamuwezga yekha ngongoli iyi.—Luka 14:12-14.
Kupeleka uko Chiuta wakukondwa nako yayi
Para munthu wakupeleka na ghanoghano ghaheni. Mwachiyelezgero:
Kuti wajilongore waka.—Mateyu 6:2.
Kuti nayo ŵazakamupe kanthu kanyake.—Luka 14:12-14.
Kuti wazakaponoske.—Salimo 49:6, 7.
Para wakupeleka kuti munthu wakachite vinthu ivyo Chiuta wakutinkha. Mwachiyelezgero, ntchiwemi yayi kupeleka ndalama kwa munthu kuti watchovere njuga panji kuti wakagulire munkhwala wakuloŵezga panji moŵa. (1 Ŵakorinte 6:9, 10; 2 Ŵakorinte 7:1) Kweniso ntchiwemi yayi kupeleka ndalama kwa munthu mukata uyo wakukana kugwira ntchito.—2 Ŵatesalonika 3:10.
Para vingapangiska munthu kuleka kupwelelera banja lake. Baibolo likuti mfumu wakwenera kupwelelera makora banja lake. (1 Timote 5:8) Ntchiwemi yayi kuti mfumu wapelekenge chomene ku ŵanthu ŵanyake na kuleka kupwelelera banja lake. Yesu wakasuska awo ŵakatondekanga kupwelelera ŵapapi ŵawo ŵachekuru na kuyowoya kuti vinthu vyawo vikaŵa ‘vyawanangwa vyakupeleka kwa Chiuta.’—Mariko 7:9-13.