Luso lwa Bulawura Mutuŵa Lwakuyimika Mapapindo Ghake Kuŵa Nga Ni V

Bulawura waliyose wakuthemba zuŵa kuti lithukizge mapapindo yake kuti waduke. Kweni para kuli matutu, mapapindo gha bulawura mutuŵa ghakuthukira luŵiro chomene ndipo wakuduka luŵiro kuluska ŵabulawura ŵanyake. Kasi ntchivichi chikovwira kuti mapapindo ghake ghathukirenge luŵiro nthena?

Ghanaghanirani fundo iyi: Kuti bulawura waliyose waduke, wakukhala pa zuŵa na kutandawura mapapindo ghake kuti ghathukire. Kweni bulawura mutuŵa wakwimika mapapindo ghake nga V. Awo ŵakufufuza vya bulawura, ŵakuti bulawura wakwenera kutambasura mapapindo ghake madigirizi 17 kuti ghathukire makora. Ivi vikovwira kuti nkhongono ya zuŵa yinjirenge mwakukwana na kuthukizga mapapindo gha bulawura kuti wambe kuduka.

Nkhwantha zinyake pa University of Exeter, England, ŵakukhumba kupanga sola kutolera umo bulawura uyu wakuŵikira mapapindo ghake. Iwo ŵakuti sola izi zingapanga nkhongono zinandi, panji pafupifupi 50 peresenti na nkhongono izo ŵakusanga kale.

Ŵakuchita kafukufuku ŵasanga kuti umo bulawura uyu wakutandawulira mapapindo ghake vikovwira kuti wapokerenge nkhongono yinandi ya zuŵa. Ŵakaswiri ŵalikutolera umo bulawura uyu wakutandawulira mapapindo yake ndipo ŵali kupanga sola iyo yikupoka nkhongono yinandi chomene ya zuŵa. Ivi vyapangiska kuti Professor Richard ffrench-Constant, yumoza ŵa ŵakaswiri aŵa wacheme bulawura uyu kuti “nkhwantha pakuguza nkhongono ya zuŵa.”

Imwe mukuti wuli? Kasi bulawura mutuŵa uyo wakwimika mapapindo ghake kuŵa nga ni V wakaŵako yekha? Panji walipo uyo wakamulenga?