Kasi Kuchita Vyamasalamusi Kuli na Suzgo Lililose?

Kasi mukughanaghana wuli?

• Kasi ntchiheni kugomezga panji kuchita vyamasalamusi kuti munthu wamanye vyamunthazi?

• Kasi nkhani za vyamasalamusi ni vidokoni waka panji ni zaunenesko? Kasi ni zakofya?

Mu nkhani iyi tiwonenge chifukwa icho ŵanthu ŵakutemwera vyamasalamusi kweniso chifukwa icho tikwenera kuvitinkhira.

• Chifukwa wuli ŵanthu ŵakuvitemwa?

• Chifukwa wuli mukwenera kuŵa navyo maso?

• Ivyo mungachita

• Ivyo ŵanyinu ŵakuyowoya

Chifukwa wuli ŵanthu ŵakuvitemwa?

Mazuŵa ghano vyamasalamusi vikusangika mu mapulogiramu gha pa TV, mu mafilimu, mu magemu gha pa kompyuta, mu mabuku, na vinyake. Ivi vyapangiska kuti ŵachinyamata ŵanandi ŵambe kutemwa chomene vyamasalamusi, mavampaya, panji vyaufwiti. Vinyake ivyo vikupangiska kuti ŵanthu ŵatemwenge chomene vyamizimu ni vinthu vyakulondezgapo ivi:

• Kudokera: Ŵakukhumba kumanya usange vyamasalamusi viliko nadi

• Kufipa mtima: Ŵakukhumba kumanya ivyo vichitikenge munthazi

• Kopa ŵakufwa: Ŵakukhumba kuyowoyeskana na ŵabali ŵawo awo ŵali kufwa

Vinthu ivi pa vyekha vilije suzgo. Mwachiyelezgero, mwakawiro tose tikukhumba kumanya vyamunthazi, ndipo tikuŵasoŵa ŵabali ŵithu awo ŵali kufwa. Kweni pali vinthu vinyake ivyo mukwenera kuŵa navyo maso chomene.

Chifukwa wuli mukwenera kuŵa navyo maso?

Baibolo lili na ulongozgi wankhongono chomene pa nkhani ya vyamasalamusi. Mwachiyelezgero, likuti:

“Pakati pinu pangasangikanga yayi . . . wakuwukwa, wakuchita masalamusi, wakupenja vinthumwa, fwiti, wakulowa ŵanyake, uyo wakuluta ku ng’anga panji wakuloska, panji uyo wakufumba ku ŵakufwa. Pakuti waliyose uyo wakuchita ivi mbukazuzi kwa Yehova, ndipo chifukwa cha maukazuzi agha, Yehova Chiuta winu wakuchimbizga ŵamitundu pamaso pinu.”—Dotoronome 18:10-12.

Chifukwa wuli Baibolo likukana kuchita masalamusi?

• Vyamasalamusi vikukolerana chomene na viŵanda. Baibolo likuti ŵangelo ŵanyake ŵakagalukira Chiuta ndipo ŵakazgoka ŵalwani ŵake. (Genizesi 6:2; Yuda 6) Ŵangelo ŵaheni aŵa ŵakuchemeka viŵanda, ndipo ŵakupuluska ŵanthu kuti ŵachitenge vyamasalamusi, kuwukwa, panji kuluta ku ng’anga. Para namwe mungachitako vinthu ivi, mbwenu muŵenge ŵalwani ŵa Chiuta.

• Vyamasalamusi vikupangiska ŵanthu kugomezga kuti ŵangaloskera vinthu ivyo vichitikenge munthazi. Kweni Chiuta pera ndiyo wangamanya vyamunthazi. Iyo wakuti: “Nkhuyowoyerathu kufuma pakwamba ivyo vizamuchitika, kwamba kale chomene nkhuyowoyerathu vinthu ivyo vindachitike.”—Yesaya 46:10; Yakobe 4:13, 14.

• Vyamasalamusi vikupangiska ŵanthu kugomezga kuti ŵangayowoyeskana na ŵabali ŵawo awo ŵali kufwa. Kweni Baibolo likuti: “Ŵakufwa ŵakumanya kalikose chara. . . Ku Dindi . . . kulije mulimo, maghanoghano, kumanya, panji vinjeru.”—Mupharazgi 9:5, 10.

Lekani Ŵakaboni ŵa Yehova ŵakuchitako yayi chilichose icho chikukhwaskana na vyamasalamusi. Ŵakuwonelera yayi panji kuchitako vyakusanguluska ivyo vikulongora vyamasalamusi, mizguka, mavampya na vinyake. Msungwana munyake zina lake Maria wakati: “Para filimu yikulongora vyamasalamusi, nkhuwonelera yayi.”a

Ivyo mungachita

• Lekani kuwonelera panji kuchita vyakusanguluska vyose ivyo vikukhwaskana na vyamasalamusi kuti muŵe na “njuŵi yituŵa” pamaso pa Yehova.—Milimo 24:16.

• Tayani chilichose chakukhwaskana na vyamasalamusi. Ŵazgani Milimo 19:19, 20, na kuwona ivyo Ŵakhristu ŵakwambilira ŵakachita.

Manyani kuti: Para mukuleka kuchitako vyakusanguluska vyose vyakukhwaskana na vyamasalamusi mukuŵa ku chigaŵa cha Yehova, ndipo mukukondweska mtima wake.—Zintharika 27:11.