Kasi Ningachita Wuli Kuti Niryenge Chakurya cha Magulu Ghose?

Para mukuleka kurya chakurya cha magulu ghose, mungananga umoyo winu. Kanandi munthu uyo wakuleka kurya chakurya cha magulu ghose apo ni muwukirano, wakulutilira kuchita nthena para wakura. Ntheura ntchakuzirwa kuti apo muchali muwukirano muryenge chakurya cha magulu ghose.

• Kasi chakurya cha magulu ghose chikuŵa wuli?

• Kasi ningachita wuli kuti nyengo zose niryenge chakurya cha magulu ghose?

• Ivyo ŵanyinu ŵakuyowoya

Kasi chakurya cha magulu ghose chikuŵa wuli?

Baibolo likusambizga kuti ‘tijikorenge mu vyakuchita,’ kusazgapo pa nkhani ya chakurya. (1 Timote 3:11) Ntheura ntchakuzirwa kumanya kuti . . .

• Mukwenera kurya chakurya cha magulu ghose. Pali magulu ghankhondi gha vyakurya agho ni mkaka, mapulotini, vipasi, mphangwe, vyakurya vya mu gulu la ngoma na mpunga. Ŵanyake ŵakuleka kurya vyakurya vinyake kuti ŵaleke kututuŵa. Kweni ivi vingapangiska kuti thupi linu lisoŵenge vyakurya vinyake vyakuzirwa chomene.

  Yezgani kuchita ichi: Fufuzani panji fumbani dokotala kuti mumanye uwemi wa kurya vyakurya vya magulu ghose. Mwachiyelezgero:

  Makabohaidireti ghakumupani nkhongono. Mapulotini ghakovwira thupi linu kuti lilimbanenge na matenda kweniso kuti mukulenge. Vyakurya vya mafuta ghachoko, vikovwira kuti muŵe na nkhongono na kuleka kulwara matenda gha mtima.

  “Nkhulimbikira chomene kurya vyakurya vya magulu ghose. Nkhwananga yayi kurya switi panji tuvyakura tunyake twakunong’omera. Kweni ntchiwemi yayi kuti munthu watandalirenge waka vyakurya vyenevivi. Ukwenera kujiŵikira mphaka.”—Brenda.

  

• Muleke kujumphizga. Apa tikung’anamura muleke kujikhawuliska na njara kwa nyengo yitali na kuzakarya chakurya chinandi pa nyengo yimoza.

  Yezgani kuchita ichi: Kwa mwezi umoza,wonani umo mukulyera, na kujifumba kuti: ‘Kasi nachita kalinga ivyo vyayowoyeka pachanya apa?’ Ni vinthu wuli ivyo mungasintha kuti muryenge vyakurya vya magulu ghose?

  “Kale, mazuŵa ghanyake nkhatemwanga kurya chomene vyakurya ivyo vikupa nkhongono, kweni mazuŵa ghanyake nkhavigwenthanga. Kufuma apo, nkhayamba waka kuti para nakhuta mbwenu nileke kurya. Pakatora nyengo kuti nichite ivi, kweni sono nkhukwaniska kurya chakurya cha magulu ghose.”—Hailey.

Kasi ningachita wuli kuti nyengo zose niryenge chakurya cha magulu ghose?

• Mumanyirengethu ivyo muryenge. Baibolo likuti: “Maghanoghano gha munthu wachitatata ghakovwira kuti vinthu vyende makora.” (Zintharika 21:5) Ntheura kuti muryenge vyakurya vya magulu ghose, mukwenera kumanyirathu ivyo ni vyakurya vyakwenelera.

  “Kuti uryenge chakurya cha magulu ghose, ukwenera kunozgekera nakuti kanandi vyakurya ivi vikuphikika pa nyumba. Nangauli vingawoneka nga ni vyakusuzga, kweni paumaliro vikumovwirani kuti muleke kunanga ndalama.”—Thomas.

• Muryenge chakurya chiwemi m’malo mwa kutangwanika na vyambura kwenelera. Baibolo likuti: “Sungilira vinjeru.” (Zintharika 3:21) Vinjeru vingamovwirani kuti musange na kumanya umo munganozgera chakurya cha magulu ghose.

  “Zuŵa lililose nkharyanga chakurya chimoza chiwemi m’malo mwa icho chinganovwira yayi. Mwachiyelezgero, m’malo mwa kurya switi, nkharyanga apulo. Pakatora nyengo yayi, mbwenu nkhamba kurya vyakurya ivyo vinganovwira m’malo mwa kutangwanika na ivyo vinganovwira yayi!”—Kia.

• Lekani kukhazga ivyo mungafiska yayi. Baibolo likuti: ‘Uryenge chakurya chako na kusekelera.’ (Mupharazgi 9:7) Kurya vya magulu ghose chikung’anamura kuti muleke kurya vyambura kunowa panji kughanaghanira waka ivyo mukurya nyengo zose yayi. Nanga mungaŵa kuti mukukhumba kuti muchepeske thupi, kweni mukwenera kumanya kuti chakuzirwa chomene nkhuŵa na umoyo uwemi. Ntheura lekani kukhazga vinthu vyakuti mungafiska yayi.

  “Sonosono apa nanguchepeska thupi na makilogiramu pafupifupi 14. Kweni pa nyengo yose iyi nkharyanga mwakukwana vyakurya vya magulu ghose, ndipo nkhadandawuranga yayi para narya vyakurya vya shunga. Nkhawamo kuti pakutora nyengo kuti munthu wachepeske thupi.”—Melanie.