Na Wovwiri wa Chiuta, Tiwelerenge Nyuma Yayi

Ŵabali awo ŵakanikayikiranga usange nilutilirenge kuchita upayiniya ŵakaŵa na chifukwa chakupulikikwa chakutichira nthena. Ningati nkhaŵa wamwamphu yayi pa vinthu vyauzimu. Nkhatemwanga yayi kupharazga ndipo zuŵa la Sabata nkhalombanga waka kuti kulokwe vula mwakuti nisange chifukwa cha kugwenthera mu upharazgi. Para naluta kukapharazga, nkhagaŵiranga waka magazini, nkhatondekanga kwambiska chidumbirano na munthu mwakugwiliskira ntchito Baibolo. Amama ŵakanihonga dankha kuti nkhaŵerenge Baibolo ku mpingo. Nkhatemwanga yayi kusambira Baibolo, ndipo nkhaŵavya vilato vyauzimu.

Nyengo ya ungano wa chigaŵa yikakwana ndipo ukachitikira ku Cardiff, Wales. Apa ndipo umoyo wane ukasinthirathu. Mubali munyake uyo wakadumbanga nkhani pa ungano wakafumba mafumbo agho ghakanovwira kuti nambe kughanaghanirapo chomene. Wakafumba ŵategherezgi kuti: “Kasi muli kujipeleka kwa Yehova na kubatizika?” Mu mtima nkhati, ‘Enya.’ Wakafumbaso kuti “Kasi muli kumuphalira Yehova kuti mumuteŵeterenge na mtima winu wose, umoyo wose, maghanoghano ghose, na nkhongono zose?” Nkhatiso ‘Enya.’ Wakatiso “Kasi muli na suzgo la muthupi panji maudindo ghakupwelelera mbumba agho ghakumutondeskani kuchita upayiniya?” Nkhati ‘Yayi.’ Wakafumbaso kuti “Kasi chilipo chinyake icho chikumutondeskani kuchita upayiniya?” Nkhati ‘Yayi.’ Mbwenu mubali uyu wakati, “Usange fumbo laumaliro mwazgora kuti yayi, ipo ntchivichi chikumutondeskani kuchita upayiniya?”

Vikaŵa nga munthu munyake waningweruska kumaso. Mu mtima nkhati: ‘Nkhusakaza umoyo wane pawaka. Nkhufiska yayi ivyo nkhamulayizga Yehova apo nkhajipelekanga kwa iyo. Nkhuteŵetera Yehova na umoyo wose yayi.’ Nkhamanya fundo yakuti usange nkhukhumba Yehova wafiske ivyo wali kunilayizga, mbwenu nane nifiskenge vyose ivyo nili kumulayizga. Ntheura mu October 1956, nkhamba upayiniya wakovwira. Mazuŵa ghano tikuti upayiniya wakanyengo.

Chaka chakulondezgapo, nkhaŵa mupayiniya wanyengozose ndipo nkhasamira mu mpingo uwo mukaŵa ŵapharazgi 19. Kufuma waka apo nkhafikira, nkhapikanga nkhani sabata yiliyose. Mwakuzikira ŵabali ŵakanovwira chomene, ndipo nkhanyololera umo ningasankhira mazgu ghakwenelera kuti ghakolerane na nkhani kweniso umo ningayiyowoyera makora. Pamanyuma pa vyaka viŵiri, mu 1959, nkhaŵa mupayiniya wapadera ndipo nkhatumika ku Aberdeen, cha kumpoto kwa Scotland. Pakajumpha myezi yichoko waka, mbwenu nkhachemeka kukateŵetera ku Beteli ya ku London. Kwa vyaka 7 ivyo nkhaŵira uku, nkhaŵa na mwaŵi wakugwira ntchito ya kupulinta mabuku.

Nkhawutemwa chomene umoyo wa pa Beteli, kweni panyengo yimozamoza nkhaŵaso na khumbo likuru lakuti nkhachite uteŵeti wapadera ku dera linyake. Nkhaŵa munyamata, wankhongono, ndipo nkhakhumbisiskanga kuti Yehova wanigwiliskire ntchito kulikose. Ntheura mu April 1965, nkhapempha kuti nilute ku Sukulu ya Giliyadi kuti nkhasambire vya umishonale.

Mu chaka ichi ine na munyane uyo tikakhalanga chipinda chimoza tikaghanaghana vya kuluta ku Berlin, Germany, kuti tikachite ungano wa chigaŵa na kukawona Chiliŵa cha Berlin icho chikazengeka vyaka vichoko waka kumasinda.

Zuŵa linyake pa ungano wa chigaŵa, tikaŵa na mwaŵi wakukapharazga ndipo ŵakanigaŵira Susanne Bandrock kuti nende nayo. Tikatorana mu 1966, ndipo pakati pajumpha vyaka viŵiri tikachemeka kuti tikanjire kilasi nambara 47 la sukulu ya Giliyadi. Ili likaŵa thumbiko lamaseŵera yayi! Tikawona nga kuti myezi yinkhondi iyo tikaŵira ku sukulu yikamara luŵiro chomene. Tikatumika ku Zaire, uko pasono nkhu Democratic Republic of the Congo. Tikazizwa chomene! Tikamanyanga vichoko waka vyakukhwaskana na charu ichi. Tikaŵa na wofi, kweni tikazomera kuluta ndipo vyose tikavileka mu mawoko gha Yehova.

Tikakhala mu ndege maora ghanandi, paumaliro tikafika mu msumba uchoko wa Kolwezi. Tikazizwa kuti kukaŵavya ŵabali kuti ŵatipokelere. Pamanyuma tikamanya kuti ŵabali ŵakapokera uthenga kuti tizenge pamanyuma pakuti ise tafika kale mazuŵa ghaŵiri agho ghajumpha. Mulara wa pa chiŵanja cha ndege wakiza pafupi na kuyowoya nase mu Chifurenchi, kweni tikapulikapo na kamoza yayi. Mama uyo wakaŵa panthazi zithu wakang’anamuka na kung’anamulira ivyo tikaphalirikanga, wakati, “Ŵati ŵamukakeninge.”

Wapolisi uyo wakatikaka wakamuchichizga dilayivala munyake kuti watikwezge galimoto yinyake yakuchitira maseŵero iyo yikaŵa yakale kweniso yichoko. Ntheura wapolisi na mweneko wa galimoto, kweniso ine na Susanne tose tikafyenyana mu galimoto iyi. Vikaŵa nga ni sinema waka uku tikwenda mu msewu wakujimika chomene.

Ŵakatikhizgira ku nyumba ya ŵamishonale. Nangauli tikamanyangako yayi uko nyumba yili, kweni wapolisi wakamanyangako. Pakaŵavya munthu pa nyumba, geti likaŵa lakujara. Ŵamishonale ŵakaluta ku ungano wa mitundu yose kweniso ku holide. Tikimilira pa zuŵa, uku tikulaŵiskana waka kuti sono ntchivichi chichitikenge. Mwamwaŵi mubali munyake wakafika. Wati watiwona, wakamwemwetera ndipo tikajipulika makora. Mubali uyu wakamumanyanga mpolisi yura, ndipo wakakhumbanga kuti wapoke ndalama kwa ise. Kweni mubali wati wadumba nayo nyengo yitali, wapolisi wakawera ndipo pamanyuma tikamanya kwakunjilira.

Ni Nyengo Yakuwelera Nyuma Yayi

Sono tikamanya kuti tili pakati pa ŵanthu ŵachimwemwe kweniso ŵachitemwa awo ŵakuzizipizga vinandi. Kweni chachitima ntchakuti vyaka 10 ivyo vyajumpha, mu charu ichi mukazura vya viwawa na nkhaza. Ndipo mu 1971, Ŵakaboni ŵa Yehova ŵakaleka kuŵa ŵakuzomerezgeka na dango nga umo vikaŵira kumasinda. Ntheura tikafipanga mtima na umo tichitirenge.

Iyi yikaŵa nyengo yakuwelera nyuma yayi chifukwa cha wofi, ndimo ŵabali na ŵadumbu ŵachoko waka ŵakachitira, nangauli ŵakachichizgikanga kuyegha khadi la chipani na kuvwara baji la chipani. Para undavware baji la chipani vikang’anamuranga kuti ulijeso mwaŵi wakusanga wovwiri uliwose kufuma ku boma kweniso ŵasilikari na ŵapolisi ŵakaŵasuzganga chomene. Ŵabali ntchito zikaŵamalira, ndipo ŵana ŵakaŵachimbizga ku sukulu. Ŵabali mahandiredi ghanandi ŵakaŵikika mu jele. Yikaŵa nyengo yakusuzga chomene. Ndipouli Ŵakaboni ŵakalutilira kupharazga makani ghawemi mwachikanga.

Tikakhumbikwiranga Kuzizipizga

Kweni vyaka vyose vira, ine na Susanne tikamaliranga nyengo yinandi chomene kwenda mu mizi apo tikachitanga mulimo wakwendera dera na chigaŵa. Kanandi umoyo wa ku mizi ukuŵa wakuyana yayi kweniso pakuŵa masuzgo ghanandi. Nyumba zikaŵanga zichokozichoko kweniso za utheka ndipo malo ghakugona ghakaŵanga ghafinyi chomene. Kanandi waka nkhajigung’uranga mutu para nkhujumpha mu milyango. Tikagezanga maji ghakuchita kuteka mu visimi na mu madambo. Usiku tikabuskanga kandulu kuti tiŵerenge. Tikaphikanga pa makara. Kweni kuyowoya unenesko, uwu ndiwo mbumoyo nadi wa ŵamishonale. Ivi ndivyo tikeneranga kuchita, nakuti tikawonanga kuti ise ndise tikwenera kuŵa pakwamba pa uteŵeti uwo tikachitanga.

Tikasambira vinandi chomene chifukwa cha kukhala na mbumba za Ŵakaboni ku mizi. Tikasambira kuzirwiska chomene vinthu ivyo nyengo zinyake tingaviwona nga ni vyambura kuzirwa: nga ntchakurya, maji, vyakuvwara, na nyumba. (1 Timote 6:8) Vinthu ivi tikwenera kuviwona kuti ntchawanangwa. Tichali kukumbuka unenesko upusu uwu.

Nangauli tindasanganepo na masuzgo nga agho mpositole Paulosi wakakumana nagho, kweni nyengo zinyake maulendo agho tikaŵanga nagho ghakupangiskanga kuti tijipulikenge kuti chipulikano chithu na vyakuchita vithu vikuyezgeka chomene. Tikeneranga kujumpha mu misewu yiheni chomene, panji uko kulijirethu misewu yakulongosoka. Para tikwenda mu misewu yamalibwe, galimoto yikasunkhunyikanga chomene. Nyengo zinyake yikaphatiranga mu mchenga. Nyengo ya vula galimoto yikaphatiranga mu mathipa, agho para ghakora ghakaŵanga nga mwachita kubatika skee na phura. Ulendo unyake, zuŵa lose lamusuma tikenda waka makilomita 70 ndipo tikayifukura mpaka maulendo 12 mu mathipa agho yikaphatiramo.

Kweni ivi ndivyo vikatipangiska kuti tijipulike kuti tili pafupi chomene na Yehova nangauli tikateŵeteranga mu nyengo zakusuzga kweniso ku mizi. Tikamanya kuti na wovwiri wa Yehova, tizizipizgenge masuzgo na chimwemwe, nangauli tilije nkhongono zakusinthira vinthu pa umoyo withu. Mwakawiro, Susanne wakutemwa yayi kuti watandarenge kuwaro kwa nyumba panji kwendakwenda kuti wawonenge vinthu, kweni viyezgo na masuzgo ivyo tikasangana navyo vindamulopweske kuti m’paka wambe kudandawura. Tikukumbuka umo vinthu vikaŵira pa nyengo iyo ndipo tikuwona kuti tikaŵa ŵakukondwa, tikasanga vitumbiko vinandi, kweniso tasambirapo vinandi.

Apo tikaŵa ku Zaire, nkhakakikapo kanandi waka. Nyengo yinyake ŵakanipusikizgira kuti nkhaguranga na kuguliska malibwe gha dayamondi mwambura kuzomerezgeka na dango. Mwakawiro, nyengo zinyake tikenjerwanga chomene, mbwenu tikajikumbuskanga kuti usange Yehova wakukhumba kuti tifiske uteŵeti uwo watipa, mbwenu watovwirenge. Ndipo wakatovwira nadi!

Tikalutilira Kuteŵetera Yehova

Mu 1981, tikachemeka kukateŵetera ku ofesi ya munthavi ku Kinshasa. Apa ndikuti pakajumpha chaka, ntchito yithu yakupharazga yati yazomerezgekaso. Ŵabali ŵakagura malo kuti ŵazengepo ofesi ya munthavi yikuruko. Kweni mu March 1986, pulezidenti wa charu ichi wakasayinira chikalata chakukanizga milimo ya Ŵakaboni ŵa Yehova. Ntchito yakuzenga yikimiskika nadi, ndipo nyengo yichoko waka, ŵamishonale ŵanandi ŵakafumamo mu charu ichi.

Tikafiska kukhala mu charu ichi kwa nyengo yichoko. Tikachita ivyo tingakwaniska kuti tilutilire kupharazga, nangauli tikamanyanga kuti ŵalaraŵalara ŵa boma maso ghali pa ise. Nangauli tikaŵa maso chomene pakuchita vinthu, kweni nkhakakika pa nyengo iyo nkhachitiskanga sambiro la Baibolo. Ŵakaniŵika mu chipinda icho chikazura na ŵakayidi. Mukawotchanga, mukanunkhanga chomene, mukaŵa chisi bii, na viswaswa bwekabweka; mukanjiranga kaungweru kufuma pachanya pa chiliŵa chimoza waka. Ŵakayidi ŵanyake ŵakanitora na kunipeleka kwa uyo ŵakatenge ni mulara wa ŵakayidi. Wakaniphalira kuti: “Wimbe sumu ya fuko!” Nkhazgora kuti: “Nkhuyimanya yayi.” Ŵakati: “Mbwenu wimbe sumu ya fuko ya mu charu chako!” Nkhazgora kuti: “Nayo nkhuyimanya yayi.” Pamanyuma wakaniphalira kuti nimilire mwa kugamira ku chiliŵa maminiti pafupifupi 45. Pamanyuma ŵabali ŵakanozga vyakuti nifumiskike.

Tikawona kuti vinthu vilutilirenge kuhenipa mu charu ichi, kweni mu nyengo yichoko waka ŵakatituma ku Zambia. Apo tikafika pa boda kuti tijambuke, tikaŵa na chitima kweniso tikamanya kuti sono tawombokwa. Tikaghanaghaniranga vyaka 18 ivyo tachitira uteŵeti withu pamoza na ŵamishonale ŵakugomezgeka kweniso ŵabali na ŵadumbu mu mpingo. Nangauli nyengo zinyake umoyo ukaŵanga wakusuzga, kweni Yehova wakatitumbikanga. Tikamanya kuti Yehova wakaŵanga nase nyengo zose. Tikasambira Chiswahili na Chifurenchi, ndipo Susanne wakasambiraso Chilingala patalipatali. Tikakondwanga chomene mu upharazgi, tawovwira ŵanthu ŵakujumpha 130 kufika m’paka pa kubatizika. Tikukondwaso kumanya kuti tawovwira kuŵika fawundeshoni yakuti ŵanthu ŵanandi kunthazi ŵazakamanye unenesko. Pamanyuma ŵanandi ŵakamanya nadi unenesko! Mu 1993, Khoti Likuru likafwatura Ŵakaboni kuti sono mbanangwa kuchita milimo yawo iyo yikakanizgika mu 1986. Pasono ku Congo kuli Ŵakaboni ŵakujumpha 240,000.

Kuno ku Zambia, tawona ofesi yiphya ya munthavi yikuzengeka kweniso kusanuzga na kusazgirako vinthu vinyake. Pasono kuli ŵapharazgi ŵamwamphu ŵanandi chomene kujumpha katatu pakuyaniska na umo vikaŵira kumasinda apo tikafikira waka mu 1987.

Ntchivichi icho chikachitikira mubali muwukirano uyo wakawonekanga kuti wangamara na mwezi wuwo yayi uku wakuchita uteŵeti wanyengozose? Na wovwiri wa Yehova kweniso muwoli wane wakutemweka, Susanne, sono nakwaniska vyaka 65 nili mu uteŵeti wanyengozose, ndipo nacheta na kuwona kuti Yehova ni muwemi!—Salimo 34:8.

Tikumanya kuti tili ŵapadera yayi, kweni tikuyezgayezga kuti tiŵe ŵakugomezgeka na kufiska ivyo tikamulayizga Chiuta. Tikugomezga kuti Yehova walutilirenge kutovwira kuti tileke ‘kuwelera nyuma’ kweni kuti tikure mu chipulikano “chakusungilira umoyo withu.”—Ŵahebere 10:39.

Wonelerani vidiyo yakuti Dayrell and Susanne Sharp: We Promised to Serve Jehovah Whole-Souled