Kung’anamura Ungano wa Chigaŵa wa 2020 Wakuti ‘Sekelerani Nyengo Zose’!

Mu July na August 2020, kazamuŵa kakwamba kuti pa charu chose chapasi, tose tizakawonelere pulogiramu yimoza ya ungano wa chigaŵa. Kuti ivi vichitike, nkhani za ungano zili kung’anamulika na kujambulika mu viyowoyero vyakujumpha 500. Mulimo uwu ukeneranga kuchitika kwa chaka chimoza panji kujumphirako. Kweni chifukwa cha muliri wa coronavirus, ŵabali na ŵadumbu awo ŵakung’anamura ŵakachita mulimo uwu mu myezi yinayi panji kucheperako.

Awo ŵakuwona vya ntchito yakung’anamura kweniso awo ŵakuwona vyakugura katundu ku Likuru la Ŵakaboni ŵa Yehova la pa charu chose ŵakawovwirapo pa mulimo ukuru uwu. Awo ŵakuwona vya ntchito yakung’anamura ŵakamanya kuti ŵabali na ŵadumbu awo ŵakuchita mulimo uwu, ŵakhumbikwirenge vyakugwilira ntchito vinandi nga ni ma mayikirofoni kuti ŵafiske mulimo wawo. Awo ŵakuwona vyakugura katundu ŵakanozga vyakugura ma mayikirofoni 1,000 na kughatumizga mu vigaŵa vyakupambanapambana pafupifupi 200.

Kuti ŵaleke kusakaza ndalama, awo ŵakugura katundu ŵakagura ma mayikirofoni ghanandi na kughatumizga pa malo ghamoza, kufuma apo ndipo ŵakaghagaŵanga na kughatumizga ku awo ŵakuchita mulimo wakung’anamura pa charu chose. Chifukwa chakuti tikagura ma mayikirofoni ghanandi nyengo yimoza, mayikirofoni yiliyose pa avereji yikagulika $170 U.S., kusazgapo na mtengo wakutumizgira. Uwu ukaŵa mtengo uwemi chomene para tingayelezgera na kugura yiliyose payekha.

Awo ŵakuwona vyakugura katundu ŵakagura ma mayikirofoni agha na kughatumizga mu myezi ya April na May 2020. Iyi yikaŵa nyengo iyo mabizinesi ghanandi ghakaŵa kuti ghakwenda makora yayi chifukwa cha muliri. Ndipouli, kuzakafika kuumaliro wa May, maofesi gha minthavi na ghakung’amulirako mabuku ghakaŵa kuti ghapokera katundu uyu.

Jay Swinney, uyo wakulaŵilira Dipatimenti Yakugura Katundu ku Ofesi Yithu Yikuru wakati, “Pakaŵa kukolerana pakati pa madipatimenti ghakupambanapambana gha pa Beteli na agho tikagurangako katundu wakuti utovwire pa ntchito iyi. Tikafiska kuchita mulimo uwu mwaluŵiro kweniso tikasakaza ndalama zinandi yayi kuti tovwire ŵabali na ŵadumbu ŵithu. Vikaŵa nthena chifukwa chakuti mzimu wa Yehova ndiwo ukatovwira chomene.”

Nicholas Ahladis, uyo wakuteŵetera ku Dipatimenti Yakung’anamura wakuti: “Ŵabali na ŵadumbu awo ŵakung’anamura ndipo ŵakufumapo yayi panyumba chifukwa cha muliri uwu, ŵakakhozgeka chomene kupokera katundu uyu. Nangauli ŵali kwaŵekha kweni ŵakufiska kugwilira lumoza ntchito na ŵanyawo, ŵakung’anamura na kujambura nkhani za pa ungano, madirama, na sumu mu viyowoyero vyakujumpha 500.”

Ichi ntchimoza mwa ivyo vikachitika pa mulimo wakunozga ungano wa chaka cha 2020 wakuti ‘Sekelerani Nyengo Zose’! Vyawanangwa vinu ivyo mukupeleka kwizira pa donate.jw.org na nthowa zinyake ndivyo vyawovwira kuti pagulike katundu uyu.