kwali ndimwe muwukirano panji mucekuru, mwanarumi panji mwanakazi, ndondomeko iyi yimovwiraninge kuti muŵe muyowoyi muweme comene ndiposo kuŵa musambizgi waluso wa Mazgu gha Ciuta.

Mulaŵiliri wa sukulu ndiye wakugaŵa nkani ku wose awo ŵalembeska mu Sukulu ya Uteŵeti wa Ciuta. Pa mapeji ghatatu ghakurondezgapo pali fomu ya urongozgi. Manambara agho ghali kuntazi kwa maurongozgi ghakupambana-pambana ghakurongora masambiro agho ghali ku mapeji ghakuntazi. Mu masambiro agha ndimo muzamumanya ng’anamuro la maurongozgi gha kayowoyero na kasambizgiro agha, ndiposo muzamuwona umo sambiro lililose liriri lakuzirwa. Muzamusangaso urongozgi wa umo mungagwiriskilira ncito ivyo vyayowoyeka.

Mitundu (karara) iyo yili pa fomu ya urongozgi yikurongora urongozgi uwo ukugwira ncito ku nkani izo (1) zikukhumbikwira kuŵazga ku ŵategherezgi, (2) ciyerezgero cakucitika na ŵantu ŵaŵiri panji ŵanandi, panjiso (3) nkani yakuti yiwoyoyeke ku mpingo. Mulaŵiliri wa sukulu wamuphaliraninge urongozgi wakurondezgapo wakuti muzakagwilirepo ncito. Cingaŵa ciweme kuti mugwilirepo ncito urongozgi wuliwose panyengo yake. Muzamusanga candulo mwakulemba ncito iyo yili kuumaliro kwa sambiro lirilose ilo mwagaŵirika. Usange mwarongora nadi kuti mwagwiriskira ncito urongozgi wa mu sambiro ilo mukagaŵirika, mbwenu mulaŵiliri winu wa sukulu wazamum’pani urongozgi unyake kuti muzakagwilirepo ncito.

Usange nkani yinu njakuti yiŵe nga nciyerezgero, ipo mukukhumbikwira kusanka umo ciyerezgero ico ciŵirenge. Pa peji 82 pali ndondomeko ya mitundu yakupambana-pambana ya umo mungacitira ciyerezgero cinu, kweni ndipouli, mungasanga mtundu unyake wa umo mungacitira ciyerezgero cinu uwo apa palije. Nyengo zinyake mulaŵiliri winu wa sukulu wangapereka mtundu unyake wa umo mungacitira ciyerezgero cinu kuti mukuliske cimanyisko cinu. Kulwande linyake, wangamupani mwaŵi kuti musanke mwekha mtundu uwo mukukhumba.

Kuŵazga buku ili na kulemba ncito iyo yarongoreka, nangauli panyengo iyo mungaŵa kuti mukunozgekera nkani za mu sukulu yayi, kumovwiraninge kuti murute pantazi comene. Mutepanji mungasambira sambiro limoza sabata yiliyose.

Kwali mwaŵa mukudumba nkani za mu sukulu panji kuruta mu uteŵeti wa m’munda kwa nyengo zinandi, kweni ndipera, mungamanya kunyolorera maluso ghinu. Mphanyi mwasanga candulo na Sukulu ya Uteŵeti wa Ciuta.