Pafupi na Babeli pakaŵa tawuni yinyake yakuchemeka Uri. Mu tawuni iyi, ŵanthu ŵakasopanga Yehova yayi. Ŵakasopanga ŵachiuta ŵatesi. Kweni pakaŵa munthu munyake mu tawuni ya Uri uyo wakasopanga Yehova pera. Zina lake likaŵa Abrahamu.

Yehova wakaphalira Abrahamu kuti: ‘Fuma mu charu chako na kuleka ŵabali ŵako, ndipo ulute ku charu icho nikulongorenge.’ Pamanyuma, Chiuta wakalayizga Abrahamu kuti: ‘Nikuzgorenge mtundu ukuru, ndipo nipelekenge vinthu viwemi ku ŵanthu ŵanandi pa charu chose chapasi chifukwa cha iwe.’

Abrahamu wakamanyanga yayi uko Yehova wamutumenge. Kweni iyo wakagomezganga Yehova. Abrahamu, muwoli wake Sara, adada ŵake a Tera, na Loti mwana wa munung’una wake, ŵakapakira katundu wawo na kwamba ulendo. Ŵakapulikira nangauli ulendo ukaŵa utali chomene.

Abrahamu wakaŵa na vyaka 75, apo iyo na banja lake ŵakafikanga mu charu icho Yehova wakakhumbanga kuti ŵachiwone. Zina la charu ichi likaŵa Kenani. Wati wafika mu charu ichi, Chiuta wakayowoya na Abrahamu na kumulayizga kuti: ‘Charu chose icho ukuchiwona, nizamupeleka ku ŵana ŵako.’ Kweni Abrahamu na Sara ŵakaŵa ŵachekuru ndipo ŵakaŵavya mwana. Kasi ivyo Yehova wakayowoya vikati vichitikenge wuli, apo Abrahamu wakaŵavya ŵana?

Abrahamu na Sara ŵakakhala pa nthengwa vyaka vinandi. Ŵakaleka nyumba yawo yiwemi ku Uri na kwamba kukhala mu mahema. Kweni Sara wakadandawuranga yayi chifukwa wakagomezganga Yehova.

Sara wakamukhumbanga chomene mwana. Wakaphalira Abrahamu kuti: ‘Para muteŵeti wane Hagara wangaŵa na mwana, mbwenu nimuwonenge nga ni mwana wane.’ Nyengo yikati yajumphapo, Hagara wakaŵa na mwana mwanalume. Zina lake likaŵa Ishimayeli.

Vyaka vinandi vikajumphapo. Apo Abrahamu wakaŵa na vyaka 99, Sara vyaka 89, ŵakapokelera ŵalendo ŵatatu. Abrahamu wakaŵapempha kuti ŵapumure musi mwa khuni na kurya chakurya. Kasi ukumanya kuti ŵalendo aŵa ŵakaŵa anjani? Ŵakaŵa ŵangelo. Ŵangelo aŵa ŵakaphalira Abrahamu kuti: ‘Chaka chikwiza nyengo nga ni iyi, iwe na muwoli wako muzamuŵa na mwana mwanalume.’ Sara wakaŵa mu hema ndipo wakapulikanga ivyo ŵangelo aŵa ŵakayowoyanga. Wakaseka mu mtima wake na kujifumba kuti: ‘Kasi vingachitika kuti niŵe na mwana umo nachekulira pano?’

Chaka chikati chakwana, Sara wakababa nadi mwana mwanalume, nga umo mungelo wa Yehova wakayowoyera. Abrahamu wakamuthya zina lakuti Yisake. Zina ili likung’anamura “Seko.”

Apo Yisake wakaŵa na vyaka 5, Sara wakawona Ishimayeli wakuseka Yisake. Sara wakakhumba kuvikilira mwana wake Yisake. Wakaluta kwa Abrahamu na kumuphalira kuti wachimbizge Hagara na Ishimayeli kuti ŵawukepo pa nyumba. Pakwamba Abrahamu wakakhumbanga yayi kuchita nthena. Kweni Yehova wakaphalira Abrahamu kuti: ‘Mupulikira Sara. Nimupwelelerenge Ishimayeli. Kweni ivyo nili kukulayizga vizamuchitika kwizira mwa Yisake.’

Loti wakakhalanga ku Kenani na Abrahamu, adada ŵake ŵalara. Nyengo yikati yajumphapo, Abrahamu na Loti ŵakaŵa na viŵeto vinandi. Pa chifukwa ichi, malo ghakuti ŵaliskengeko viŵeto ghakachepa. Abrahamu wakaphalira Loti kuti: ‘Tingalutilira yayi kukhala lumoza. Sankha uko ungatemwa kukakhala. Para iwe wasankha, ine nilutenge uko undasankhe.’ Apa Abrahamu wakalongora kuti wakughanaghanira ŵanyake, asi nthena?

Loti wakawona charu chakutowa kufupi na msumba wa Sodomu. Kukaŵa maji ghanandi na utheka wakubiliŵira. Wakasankha charu ichi ndipo wakaluta na banja lake kukakhala kwenekuko.

Ŵanthu awo ŵakakhalanga mu Sodomu kweniso mu tawuni ya Gomora iyo yikaŵa pafupi ŵakaŵa ŵaheni chomene. Pa chifukwa ichi, Yehova wakaghanaghana vya kuŵakoma ŵanthu ŵa mu misumba iyi. Kweni Chiuta wakakhumbanga kuponoska Loti na banja lake. Wakatuma ŵangelo ŵaŵiri kuti ŵakamuchenjezge. Ŵangelo aŵa ŵakamuphalira kuti: ‘Yendeska! Fumamo mu tawuni iyi. Yehova wawotchenge tawuni iyi.’

Kweni Loti wakafumamo luŵiro yayi. Wakachedwanga kufumamo. Ŵangelo ŵakamukora pa woko Loti, muwoli wake, na ŵana ŵake ŵaŵiri ŵasungwana na kuŵafumiska mu tawuni iyi. Ŵangelo ŵakaŵaphalira kuti: ‘Chimbirani! Ponoskani umoyo winu. Kulaŵiska kumanyuma yayi. Para mulaŵiskenge kumanyuma, mufwenge!’

Ŵakati ŵafika mu tawuni yakuchemeka Zowari, Yehova wakalokweska moto na sulefure pa Sodomu na Gomora. Matawuni ghaŵiri agha ghakaphya na moto ndipo ghakakhala vyoto pera. Muwoli wa Loti wakapulikira yayi Yehova. Wakalaŵiska kumanyuma ndipo wakazgoka chiduli cha mchere. Kweni Loti na ŵana ŵake ŵaŵiri ŵakapona chifukwa ŵakapulikira Yehova. Ŵana chitima chikwenera kuti chikaŵakora chomene kuti amama ŵawo ŵakapulikira yayi. Loti nayo chitima chikwenera kuti chikamukora chomene. Kweni ŵakakondwa kuti iwo ŵakapulikira ivyo Yehova wakaŵaphalira.

Abrahamu wakasambizga mwana wake Yisake kuti watemwenge Yehova. Kweniso wakamusambizga kuti wagomezgenge vinthu vyose ivyo Yehova walayizga. Kweni apo Yisake wakaŵa na vyaka 25, Yehova wakapempha Abrahamu kuti wachite chinthu chinyake icho chikaŵa chakusuzga chomene. Kasi wakamuphalira vichi?

Chiuta wakaphalira Abrahamu kuti: ‘Tora mwana wako yumoza pera ndipo ukamupeleke sembe pa phiri, ku charu cha Moriya.’ Abrahamu wakamanya yayi chifukwa icho Yehova wakamutumira kuti wachite nthena. Kweni wakapulikira.

Mulenjilenji, Abrahamu wakatora Yisake na ŵateŵeti ŵake ŵaŵiri ndipo ŵakanyamuka kuluta ku Moriya. Ŵati ŵenda mazuŵa ghatatu, phiri la Moriya likayamba kuwoneka chapatali. Abrahamu wakaphalira ŵateŵeti ŵake kuti ŵamulindilire, ndipo iyo na Yisake ŵalutenge kukapeleka sembe. Abrahamu wakapa nkhuni Yisake kuti wanyamure, ndipo iyo wakayegha chimayi. Yisake wakafumba adada ŵake kuti: ‘Kasi mberere iyo tamupeleka sembe yili nkhu?’ Abrahamu wakazgora kuti: ‘Mwana wane, Yehova wamupeleka.’

Ŵakati ŵafika pa phiri, ŵakazenga jotchero la sembe. Kufuma apo, Abrahamu wakakaka Yisake mawoko na malundi na kumugoneka pa jotchero.

Abrahamu wakatora chimayi. Nyengo yeneyiyo, mungelo wa Yehova wakamuchema kufuma kuchanya kuti: ‘Abrahamu! Ungamupwetekanga yayi mwana wako! Sono namanya kuti uli na chigomezgo mwa Chiuta, chifukwa wakhumbanga nadi kunipa mwana wako kuŵa sembe.’ Pamanyuma, Abrahamu wakawona mberere yanalume yakoleka mphondo (masengwe) mu chivwati. Wakasutura Yisake mwaluŵiro na kupeleka sembe mberere yira.

Kufuma pa zuŵa ili, Yehova wakatenge Abrahamu ni mubwezi wake. Kasi ukumanya chifukwa chake? Abrahamu wakachitanga chilichose icho Yehova wamutuma kuti wachite. Wakachitanga waka, nanga wangaleka kumanya chifukwa icho Yehova wamutumira.

Yehova wakawerezgaposo ivyo wakalayizga Abrahamu. Wakati: ‘Nikutumbikenge, ndipo uŵenge na ŵana ŵanandi chomene.’ Mazgu agha ghakang’anamuranga kuti Yehova watumbikenge ŵanthu wose ŵawemi kwizira mu banja la Abrahamu.