12. Kasi tikusambirako vichi kwa ŵakerubi awo ŵakaŵikika mu munda wa Edeni?

¹² Ŵakerubi. Ivyo ŵangelo awo ŵakawonekera kakwamba ku ŵanthu ŵakachita vikutisambizga kuti nase tizizipizgenge para tapika mulimo wakusuzga. Yehova wakaŵika “ŵakerubi” chakumafumiro gha dazi kwa munda wa Edeni “na lupanga lwamoto ulo lukazingiliranga, kujanda nthowa ya ku khuni la umoyo.”^[2] (Gen. 3:24) Ntchakuwonekerathu kuti uwu ndiwo ukaŵa mulimo wa ŵakerubi yayi apo ŵakalengekanga. Nakuti likaŵa khumbo la Yehova yayi kuti ŵanthu ŵanange na kugaluka. Ndipouli, Baibolo lindayowoyepo kuti ŵakerubi, awo mbangelo ŵapachanya chomene, ŵakadandawura kuti ŵakapika mulimo wapasi uwu. Ŵakakwenyelera yayi na kuleka waka mulimo wawo. M’malo mwake, ŵakapulikira na kulutilira kuchita mulimo wawo wa ulinda ndipo ŵakazizipizga pakuchita mulimo uwu m’paka apo ukamalira. Ŵakwenera kuti ŵakachita mulimo wawo m’paka pa nyengo ya Chigumula, ndipo ukwenera kuti ukatora vyaka vyakujumpha 1,600.