Baibolo likuti umoyo wa ŵanthu ‘ngufupi na wakuzura na masuzgo.’ (Yobu 14:1) Kasi Chiuta wakakhumbanga kuti tiŵe na umoyo wanthena? Usange zgoro ndakuti yayi, kasi Chiuta wakakhumbanga kuti umoyo withu uŵenge wuli? Kasi khumbo la Chiuta lizamufiskika? Wonani mazgoro ghakupembuzga agho Baibolo likupeleka.

1. Kasi Yehova wakukhumba kuti tikhalenge umoyo wuli?

Yehova wakukhumba kuti tiŵenge na umoyo uwemi chomene. Wakati walenga Adamu na Eva, wakaŵaŵika mu munda wakutowa chomene wakuchemeka Edeni. Kufuma apo “Chiuta wakaŵatumbika, ndipo Chiuta wakati kwa iwo: ‘Babanani, mwandane muzuzge charu chapasi na kuchithereska.’” (Genizesi 1:28) Yehova wakakhumbanga kuti ŵababe ŵana, ŵazgore charu kuŵa paradiso na kupwelelera vinyama. Yehova wakakhumbanga kuti ŵanthu ŵaŵenge na umoyo uwemi na kukhala kwamuyirayira.

Nangauli ivyo vikuchitika ndivyo Chiuta wakakhumbanga yayi,a kweni khumbo lake lindasinthe. (Yesaya 46:10, 11) Iyo wakukhumba kuti ŵanthu ŵakupulikira ŵazakakhale kwamuyirayira mu charu chambura masuzgo.—Ŵazgani Chivumbuzi 21:3, 4.

2. Kasi tingachita wuli kuti tikondwenge na umoyo sono?

Yehova wali kutilenga kuti tiŵenge na “njara yauzimu,” lekani tikukhumba kumumanya na kumusopa. (Ŵazgani Mateyu 5:3-6.) Iyo wakukhumba kuti tiŵenge paubwezi wakukhora na iyo, “kwenda mu nthowa zake zose, kumutemwa,” na kumuteŵetera ‘na mtima withu wose.’ (Dotoronome 10:12; Salimo 25:14) Para tikuchita ivi tiŵenge ŵakukondwa nangauli tikusangana na masuzgo. Para tikusopa Yehova tikuŵa na umoyo uwemi kweniso wakukhorweska.

3. Yehova wakukhumba kuti ŵanthu ŵaŵenge na umoyo uwemi chomene

Wonelerani VIDIYO, kufuma apo dumbiskanani mafumbo agha.

VIDIYO: Chifukwa Wuli Chiuta Wakalenga Charu?—Yakudumura (1:41)

• Chifukwa wuli Chiuta wakalenga charu chakutowa chomene?

Ŵazgani Mupharazgi 3:11, kufuma apo dumbiskanani fumbo ili:

• Kasi ivi vikutisambizga vichi vya Yehova?

4. Khumbo la Yehova lindasinthe

Ŵazgani Salimo 37:11, 29 na Yesaya 55:11, kufuma apo dumbiskanani fumbo ili:

• Kasi tikumanya wuli kuti khumbo la Yehova lindasinthe?

5. Para tikusopa Yehova tikuŵa na umoyo uwemi

VIDIYO: Nkhamanya Kuti Umoyo Uli na Chandulo (5:03)

• Kasi Terumi wakasanga vitumbiko wuli wakati wamanya kuti umoyo uli na chilato?

Ŵazgani Mupharazgi 12:13, na kudumbiskana fumbo ili:

• Pakuti Yehova watichitira vinthu vinandi chomene pa umoyo withu, kasi ise tingalongora wuli kuti tikumuwonga?

MWAKUDUMURA

Yehova wakukhumba kuti tizakakondwe na umoyo wamuyirayira wambura masuzgo pa charu chapasi. Para tikumusopa na mtima wose, tikuŵa na umoyo wa chandulo nanga ni sono nthena.

Kuweleramo

• Kasi Yehova wakakhumbanga kuti Adamu na Eva ŵaŵe na umoyo wuli?

• Kasi tikumanya wuli kuti khumbo la Chiuta lindasinthe?

• Kasi mungachita wuli kuti muŵe na umoyo wa chandulo?

SANGANI FUNDO ZAKUSAZGIKIRA

Wonani ukaboni uwo ukulongora kuti munda wa Edeni ukaŵako nadi.

“Kasi Munda wa Edeni Ukaŵako Nadi?” (brwp110101)

Wonani chifukwa icho tikugomezgera kuti charu chapasi chikhalilirenge muyirayira.

“Kasi Charu Chapasi Ndicho Chizamuparanyika?” (Nkhani ya pa Intaneti)

Wonani ivyo Baibolo likuyowoya pa nkhani ya umo tingaŵira na umoyo wa chandulo.

“Chifukwa Wuli Tili na Umoyo?” (Nkhani ya pa Intaneti)

Wonani umo mwanalume munyake uyo wakawonanga kuti wali na chilichose, wakasangira icho wakasoŵerwanga pa umoyo wake.

Sono Ndipo Nkhukondwa na Umoyo (3:55)

2. Kasi mbanjani awo ŵazamulamulira na Yesu?

Yesu wazamulamulira yekha yayi. Ŵanthu “kufuma mu fuko lililose na lulimi na ŵanthu na mtundu . . . [ŵazamuwusa] charu chapasi nga ni mathemba.” (Chivumbuzi 5:9, 10) Kasi mbanthu ŵalinga awo ŵazamulamulira na Khristu? Kufuma waka apo Yesu wakizira pa charu chapasi, ŵanthu mamiliyoni ghanandi ŵazgoka ŵalondezgi ŵake. Kweni ŵanthu 144,000 pera ndiwo ŵamulamulira na Yesu kuchanya. (Ŵazgani Chivumbuzi 14:1-4.) Ŵakhristu ŵanyake wose ŵazamuŵa ŵenekaya ŵa Ufumu wa Chiuta pano pa charu chapasi.—Salimo 37:29.

Ufumu wa Chiuta uli kwamba kale kulamulira kuchanya. Sonosono apa uzamusintha vinthu vinandi chomene pa charu chapasi. Tiyeni tidumbiskane vinyake mwa vinthu viwemi ivyo Ufumu wa Chiuta uzamuchita pano pasi.

1. Kasi Ufumu wa Chiuta uzamuwezgerapo wuli mtende na urunji pa charu chapasi?

Yesu, uyo ni Fumu ya Ufumu wa Chiuta, wazamuparanya ŵanthu ŵaheni na maboma ghose pa nkhondo ya Aramagedoni. (Chivumbuzi 16:14, 16) Pa nyengo iyo, uchimi wa mu Baibolo wakuti: “Kwakhala kanyengo kachoko waka, ŵaheni ŵazamuŵakoso chara,” uzamufiskika nadi. (Salimo 37:10) Kwizira mu Ufumu wa Chiuta, Yesu wazamuwoneseska kuti pa charu chose pali mtende na urunji.—Ŵazgani Yesaya 11:4.

2. Kasi umoyo uzamuŵa wuli para khumbo la Chiuta lazakafiskika pa charu?

Para Ufumu wa Chiuta wazakamba kulamulira pa charu, “ŵarunji ŵazamuhara charu chapasi, ndipo ŵazamukhala mwenemumo muyirayira.” (Salimo 37:29) Ghanaghanirani waka umo umoyo uzamuŵira pa charu para ŵanthu wose ŵazakaŵa ŵarunji, ŵakutemwa Yehova kweniso ŵanyawo! Palije uyo wazamulwara ndipo tose tizamukhala kwamuyirayira.

3. Kasi Ufumu wa Chiuta uzamuchita vichi para ŵaheni ŵazakaparanyika?

Para ŵaheni ŵazakaparanyika, Yesu wazamulamulira nga Themba kwa vyaka 1,000. Pa nyengo iyi, Yesu na ŵa 144,000 ŵazamovwira ŵanthu pa charu chapasi kuti ŵazakaŵe ŵakufikapo na ŵambura kwananga. Para vyaka 1,000 vyajumpha, charu chose chizamuŵa paradiso ndipo ŵanthu wose ŵazamuŵa ŵakukondwa na kupulikira Yehova. Kufuma apo, Yesu wazamuwezgera Ufumu kwa Adada ŵake, Yehova. Apa ndipo zina la Yehova ‘lizamutuŵiskika’ nadi. (Mateyu 6:9, 10) Tizamujiwonera tekha kuti Yehova ndiyo wakulamulira makora, ndipo wakupwelelera nadi ŵanthu ŵake. Kufuma apo, Yehova wazamuparanya Satana na viŵanda vyake kweniso ŵanthu wose awo ŵakugalukira Ufumu wake. (Chivumbuzi 20:7-10) Vinthu viwemi ivyo Ufumu wa Chiuta uzamuchita vizamukhalilira kwamuyirayira.

MANYANI VINANDI

4. Ufumu wa Chiuta uzamumazga maboma gha ŵanthu

“Munthu wakuwusa munyake na kumupweteka.” (Mupharazgi 8:9) Yehova wazamugwiliskira ntchito Ufumu wake kuti wazakamazge vinthu vyambura urunji ivi.

Ŵazgani Daniyeli 2:44 na 2 Ŵatesalonika 1:6-8, kufuma apo dumbiskanani mafumbo agha:

• Kasi Yehova na Mwana wake Yesu, ŵazamuchita vichi na maboma gha ŵanthu kweniso wose awo ŵakughalondezga?

• Kasi ivyo mwasambira vyakukhwaskana na Yehova na Yesu, vyamovwirani wuli kumanya kuti ŵazamuchita vinthu mwaurunji?

5. Yesu ni Fumu yiwemi chomene

Pakuŵa Fumu ya Ufumu wa Chiuta, Yesu wazamuchitira ŵanthu vinthu viwemi chomene pa charu chapasi. Wonelerani VIDIYO iyo yikulongora kuti Yesu wakukhumba nadi kovwira ŵanthu, kweniso kuti Chiuta wali kumupa nkhongono zakusinthira vinthu.

VIDIYO: Yesu Wakalongora Ivyo Ufumu wa Chiuta Uzamuchita (1:13)

Apo wakaŵa pa charu chapasi, Yesu wakalongora ivyo Ufumu wa Chiuta uzamuchita. Kasi ni vinthu wuli ivyo mwawona mu vidiyo, ivyo mukukhumba kuti vizakafiskike? Ŵazgani malemba ghakulondezgapo agha, agho ghakutovwira kumanya vinandi vyakukhwaskana na vitumbiko ivi.

6. Ufumu wa Chiuta uzamuchita vinthu viwemi chomene

VIDIYO: Kughanaghanira Vitumbiko Viwemi Chomene Vyamunthazi (4:38)

Ŵazgani Salimo 145:16, kufuma apo dumbiskanani fumbo ili:

• Kasi mukujipulika wuli kumanya kuti Yehova ‘wazamukhorweska chamoyo chose’?

MWAKUDUMURA

Ufumu wa Chiuta uzamufiska vyose ivyo Chiuta wakukhumba. Uzamuzgora charu chapasi kuŵa paradiso ndipo charu chose chizamuzura na ŵanthu ŵawemi awo ŵazamusopa Yehova kwamuyirayira.

Kuweleramo

• Kasi Ufumu wa Chiuta uzamutuŵiska wuli zina lake?

• Chifukwa wuli tikugomezga kuti Ufumu wa Chiuta uzamufiska ivyo Baibolo likulayizga?

• Kasi imwe mukukhumba kuti Ufumu wa Chiuta uzakachite vichi?

SANGANI FUNDO ZAKUSAZGIKIRA

Manyani ng’anamuro la Aramagedoni.

“Kasi Nkhondo ya Aramagedoni Ni Vichi?” (Nkhani ya pa Intaneti)

Manyani vinthu ivyo vizamuchitika pa “suzgo yikuru” iyo Yesu wakayowoya.—Mateyu 24:21

“Kasi Suzgo Yikuru ni Vichi?” (Nkhani ya pa Intaneti)

Wonani ivyo mabanja ghangachita kuti ghaghanaghanirenge umo umoyo uzamuŵira mu Ufumu wa Chiuta.

Jiwonani Kuti Muli mu Paradiso (1:50)

Ŵerengani nkhani ya mutu wakuti “Nkhajifumbanga Mafumbo Ghanandi,” kuti mumanye umo munthu uyo wakagalukira boma wakasangira vinthu ivyo wakakhumbanga.

“Baibolo Likusintha Umoyo wa Ŵanthu” (Gongwe la Mulinda, Janyuwale 1, 2012)