Mungasanga chandulo para mukusambira Baibolo. Kweni ntchipusu yayi kusambira Baibolo. Nyengo zinyake mungamba kukayika usange mulutilirenge kusambira. Chifukwa wuli mukwenera kuŵikapo mtima kuti mulutilire kusambira Baibolo? Kasi ntchivichi chingamovwirani kuti muzizipizge masuzgo?

1. Chifukwa wuli kusambira Baibolo nkhwakuzirwa chomene?

“Mazgu gha Chiuta ngamoyo na ghankhongono.” (Ŵahebere 4:12) Baibolo ndakuzirwa chomene chifukwa muli maghanoghano gha Yehova agho wakuphalira imwe. Lingamovwirani kumanya vinjeru vya Chiuta kweniso ivyo wamulayizgani munthazi. Kweni chakuzirwa chomene ntchakuti lingamovwirani kuŵa paubwezi na Yehova. Para mukusambira Baibolo limovwiraninge kuti muŵe na umoyo uwemi.

2. Chifukwa wuli ntchakuzirwa kumanya unenesko wa mu Baibolo?

Unenesko wa mu Baibolo uli nga ni chuma cha mtengo wapatali. Lekani Baibolo likutichiska kuti “gura unenesko, ungawuguliskanga chara.” (Zintharika 23:23) Para tamanya kuti unenesko wa mu Baibolo ngwakuzirwa chomene, vitovwirenge kuti tilimbikirenge chomene kuliŵazga nanga tingatangwanika.—Ŵazgani Zintharika 2:4, 5.

3. Kasi Yehova wangamovwirani wuli kuti mulutilire kusambira Baibolo?

Pakuŵa Mlengi Wankhongonozose kweniso mubwezi winu, Yehova wakukhumba kumovwirani kuti musambirenge vya iyo. Iyo wangamupani “khumbo kweniso nkhongono kuti muchite vyose ivyo wakukhumba.” (Ŵazgani Ŵafilipi 2:13.) Wangamovwirani kuti muŵe na khumbo lakusambira na kulondezga ivyo mukusambira. Wangamupaniso nkhongono kuti mulimbane na masuzgo kweniso ŵanthu para ŵakumususkani. Lombani Yehova kuti wamovwirani kulutilira kusambira Baibolo.—1 Ŵatesalonika 5:17.

MANYANI VINANDI

4. Muwonenge kuti kusambira Baibolo nkhwakuzirwa chomene

Nyengo zinyake tikutangwanika chomene mwakuti tingawona kuti tilije nyengo yakusambilira Baibolo. Kasi ntchivichi chingamovwirani kuti mulutilire kusambira Baibolo? Ŵazgani Ŵafilipi 1:10, kufuma apo dumbiskanani mafumbo agha:

• Kasi mukuwona kuti “vinthu vyakuzirwa chomene” ni vichi pa umoyo?

• Kasi mungachita wuli kuti kusambira Baibolo kuŵenge pakwamba pa umoyo winu?

1. Para mwamba kuŵika mchenga mu pelo, mbwenu malibwe ghanyake ghasoŵenge malo

2. Para mwamba kuŵika malibwe, mbwenu mchenga unandi unjirenge. Mwakuyana waka, usange mukuŵika pakwamba “vinthu vyakuzirwa chomene” pa umoyo winu, mbwenu muŵenge na nyengo yinandi yakuchitiraso vinthu vinyake

Para tikusambira Baibolo tikukhorweska njara yithu yauzimu, tikumumanya makora Chiuta ndipo tikumusopa. Ŵazgani Mateyu 5:3, kufuma apo dumbiskanani fumbo ili:

• Kasi tingasanga chandulo wuli para kusambira Baibolo ndiko kukuŵa pakwamba pa umoyo withu?

5. Zizipizgani para ŵakumususkani

VIDIYO: Wakatumbikika Chifukwa Chakuzizipizga (5:22)

• Kuyana na ivyo mwawona mu vidiyo, kasi ŵanyake ŵa Francesco kweniso ŵabali ŵake ŵakachita wuli wati waŵaphalira ivyo wakasambiranga?

• Kasi wakasanga vitumbiko wuli chifukwa cha kuzizipizga?

Ŵazgani 2 Timote 2:24, 25, kufuma apo dumbiskanani mafumbo agha:

• Kasi ŵanyinu kweniso ŵabali ŵinu ŵakumuwonani wuli para mukusambira Baibolo?

• Kuyana na mavesi agha, kasi mungachita wuli usange ŵanyake ŵakukondwa yayi kuti mukusambira Baibolo? Chifukwa wuli?

6. Thembani Yehova

VIDIYO: Yehova Wakutovwira Kuti Tisinthe (3:56)

• Kuyana na ivyo mwawona mu vidiyo, kasi Jim wakasintha vichi kuti wakondweske Yehova?

• Kasi ntchivichi chamukondweskani na umo wakachitira?

Ŵazgani Ŵahebere 11:6, kufuma apo dumbiskanani mafumbo agha:

• Kasi Yehova wakuchita wuli na awo “ŵakumupenja na mtima wose” kung’anamura ŵanthu awo ŵakukhumba kumumanya na kumukondweska?

• Kasi mukuwona kuti Yehova wakujipulika wuli para wakuwona kuti mukuŵikapo mtima kusambira Baibolo?

MWAKUDUMURA

Nangauli ntchipusu yayi kusambira Baibolo, kweni kungamovwirani kuŵa ŵakukondwa kwamuyirayira. Lutilirani kuthemba Yehova, ndipo wazamumutumbikani.

Kuweleramo

• Chifukwa wuli unenesko wa mu Baibolo ngwakuzirwa kwa imwe?

• Kasi mungachita wuli kuti “musande ivyo ni vinthu vyakuzirwa chomene”?

• Chifukwa wuli mukwenera kulomba Yehova kuti wamovwirani kulutilira kusambira Baibolo?

SANGANI FUNDO ZAKUSAZGIKIRA

Wonani vinthu vitatu ivyo vyawovwira ŵanthu ŵanandi kuti ŵagwiliskirenge ntchito mwamahara nyengo yawo.

“Kasi Mungachita Wuli Kuti Mugwiliskirenge Makora Ntchito Nyengo Yinu?” (Wukani!, Febuluwale 2014)

Wonani umo Yehova wakawovwilira mwanakazi munyake uyo mfumu wake wakapulikiskanga yayi chifukwa icho wakaŵikirapo mtima kukondweska Chiuta.

Yehova Wakutipa Nkhongono Kuti Titonde Masuzgo (5:05)

Wonani umo mwanalume munyake wakasangira chandulo chifukwa cha kuzizipizga kwa muwoli wake.

Nkhakhumbanga Kumanya Usange Ivyo Ŵakusambizga Ni Vyaunenesko (6:30)

Ŵanthu ŵanyake ŵakuti Ŵakaboni ŵa Yehova ŵakumazga nthengwa za ŵanthu, kasi mbunenesko?

“Kasi Ŵakaboni ŵa Yehova Ŵakumazga Panji Ŵakukhozga Nthengwa?” (Nkhani ya pa Intaneti)

Tose tikusankha vyakuchita zuŵa na zuŵa. Vinyake ivyo tikusankha vikukhwaska chomene ŵanyithu kweniso ubwezi withu na Yehova. Mwachiyelezgero, tingasankha uko tikukhumba kukhala, umo tingasangira ndalama, kweniso tingasankha kunjira mu nthengwa panji yayi. Para tasankha vinthu mwamahara, tikukondwa na umoyo ndipo tikukondweska Yehova.

1. Kasi Baibolo lingamovwirani wuli kuti musankhenge vinthu mwamahara?

Pambere mundasankhe vyakuchita, lombani Yehova kuti wamovwirani. Kweniso fufuzani mu Baibolo kuti mumanye umo Yehova wakuwonera ivyo mukukhumba kusankha. (Ŵazgani Zintharika 2:3-6.) Nyengo zinyake Yehova wakupeleka dango lakudunjika. Usange pali dango lakudunjika, mukwenera kupulikira na mtima wose.

Kweni, kasi mungachita wuli usange palije dango lakudunjika la mu Baibolo? Apa napo Yehova walutilirenge kumulongozgani “mu nthowa iyo mukwenera kwendamo.” (Yesaya 48:17) Kasi wangamulongozgani wuli? Iyo wamupaninge waka fundo izo zingamulongozgani. Fundo za mu Baibolo, ni unenesko uwo ukuvumbura maghanoghano gha Chiuta, umo wakuwonera vinthu kweniso umo wakujipulikira. Kanandi tikumanya umo Chiuta wakujipulikira para tikuŵerenga nkhani zinyake mu Baibolo. Para tamanya umo Chiuta wakuwonera vinthu, tisankhenge vinthu ivyo vingamukondweska.

2. Kasi ni vinthu wuli ivyo mukwenera kughanaghanirapo pambere mundasankhe chakuchita?

Baibolo likuti: “Wakuchenjera wakulanguruka pa mendero ghake ghose.” (Zintharika 14:15) Ivi vikulongora kuti tikwenera kughanaghanirapo dankha pambere tindasankhe vyakuchita. Apo mukughanaghanirapo, mungachita makora kujifumba kuti: ‘Kasi ni fundo wuli za mu Baibolo izo nkhwenera kulondezga? Kasi ivyo nisankhenge, vinovwirenge kuti niŵe na mtende wa mu mtima? Kasi ivyo nisankhenge vikhwaskenge wuli ŵanyake? Kweni fumbo lakuzirwa chomene ndakuti, kasi ivyo nisankhenge vikondweskenge Yehova?’—Dotoronome 32:29.

Yehova wali na wanangwa wakutiphalira icho ntchiwemi na chiheni. Para taghamanya makora malango na fundo zake na kuvilondezga, tisambizgenge makora njuŵi yithu. Kasi njuŵi ni vichi? Njuŵi ni wunthu withu wamukati uwo ukutovwira kupambaniska pakati pa chiwemi na chiheni. (Ŵaroma 2:14, 15) Para tasambizga makora njuŵi yithu, yitovwirenge kuti tisankhenge vinthu mwamahara.

MANYANI VINANDI

3. Baibolo ndilo limulongozganinge

VIDIYO: Mulongozgekenge na Fundo za mu Baibolo (5:54)

• Kasi wanangwa wakusankha ni vichi?

• Chifukwa wuli Yehova wali kutipa wanangwa wakusankha?

• Kasi watipa vichi ivyo vingatovwira kuti tigwiliskirenge ntchito mwamahara wanangwa wakusankha?

Kuti muwone fundo zinyake za mu Baibolo izo zingamovwirani kuti musankhe vinthu mwamahara, ŵazgani Ŵaefeso 5:15, 16. Kufuma apo dumbiskanani umo mungachitira kuti “mugwiliskirenge ntchito makora nyengo yinu” kuti . . .

• muŵerengenge Baibolo nyengo zose.

• muŵe mfumu, muwoli, mupapi panji mwana muwemi.

• muwunganenge na mpingo.

4. Sambizgani njuŵi yinu kuti musankhenge vinthu mwamahara

VIDIYO: “Lutilirani Kuŵa na Njuŵi Yiwemi” (5:13)

• Kuyana na ivyo mwawona mu vidiyo, kasi ni vinthu wuli ivyo vikawovwira mudumbu kuti wasambizge njuŵi yake, na kusankha vinthu ivyo vingakondweska Yehova?

Chifukwa wuli tikwenera yayi kufumba ŵanyithu kuti ndiwo ŵatisankhirenge vyakuchita? Ŵazgani Ŵahebere 5:14, kufuma apo dumbiskanani mafumbo agha:

• Nangauli chingaŵa chipusu kufumba waka ŵanyithu kuti ndiwo ŵatisankhirenge vyakuchita, kweni kasi ni vinthu wuli ivyo tikwenera kusankha tekha?

• Kasi ni vinthu wuli ivyo vingamovwirani kuti musambizge njuŵi yinu na kusankha vinthu mwamahara?

5. Muchindikenge njuŵi za ŵanyinu

Ŵanthu ŵakusankha vinthu mwakupambana. Kasi tingalongora wuli kuti tikuchindika njuŵi za ŵanyithu? Wonani viyelezgero viŵiri ivi:

Chiyelezgero chakwamba: Mudumbu uyo wakutemwa kuphoda wasamira mu mpingo unyake uwo ŵadumbu ŵanandi ŵakukondwa yayi para ŵawona munthu waphoda.

Ŵazgani Ŵaroma 15:1 na 1 Ŵakorinte 10:23, 24, kufuma apo dumbiskanani mafumbo agha:

• Kuyana na malemba agha, kasi mudumbu uyu wangasankha vichi? Kasi mungachita wuli para munyake njuŵi yake yikumukanizga kuchita vinthu ivyo njuŵi yinu yikumuzomerezgani?

Chiyelezgero chachiŵiri: Mubali wakumanya kuti Baibolo likukanizga yayi kumwa moŵa, kweni iyo wasankha kuleka waka kumwa. Ŵanyake ŵamuchema ku ntchezgo ndipo wakuwona kuti ŵabali ŵanyake ŵakumwa moŵa.

Ŵazgani Mupharazgi 7:16 na Ŵaroma 14:1, 10, kufuma apo dumbiskanani mafumbo agha:

• Kuyana na malemba agha, kasi mubali uyu wangasankha vichi? Kasi mungachita wuli para mwawona munyinu wakuchita vinthu ivyo njuŵi yinu yikumukanizgani?

Kasi ni vinthu wuli ivyo vingamovwirani kuti musankhenge vinthu mwamahara?

1. Lombani Yehova kuti wamovwirani kusankha chakuchita.—Yakobe 1:5.

2. Fufuzani mu Baibolo na mu mabuku ghakulongosora Baibolo kuti musange fundo izo zingamovwirani. Nyengo zinyake mungafumba Ŵakhristu ŵakukhwima mwauzimu.

3. Ghanaghanirani umo vyakusankha vinu vikhwaskirenge njuŵi yinu kweniso za ŵanyinu.

MWAKUDUMURA

Para tikughanaghanira umo Yehova wakuwonera vinthu, kweniso umo vyakusankha vithu vingakhwaskira ŵanyithu, vitovwirenge kuti tisankhe vinthu mwamahara.

Kuweleramo

• Kasi mungachita wuli kuti musankhe vinthu ivyo vingakondweska Yehova?

• Kasi mungasambizga wuli njuŵi yinu?

• Kasi mungalongora wuli kuti mukuchindika njuŵi za ŵanyinu?

SANGANI FUNDO ZAKUSAZGIKIRA

Kasi mungachita wuli kuti musankhe vinthu ivyo vingakhozga ubwezi winu na Chiuta?

“Vyakusankha Vinu Vichindike Chiuta” (Gongwe la Mulinda, Epulero 15, 2011)

Wonani umo Yehova wakutipira ulongozgi.

Yehova Wakulongozga Ŵanthu Ŵake (9:50)

Wonani ivyo vikawovwira mwanalume munyake kuti wasankhe vinthu mwamahara.

Yehova Wakutilayizga Kuti Watichitirenge Viwemi Nyengo Zose (5:46)

Wonani umo mungasankhira vinthu mwamahara kuti mukondweske Yehova nangauli palije dango lakudunjika la mu Baibolo.

“Kasi Nyengo Zose Mukukhumbikwira Dango Lakudunjika la mu Baibolo?” (brw031201)