“Ine Yehova Ciuta Wako, Ndakukora ku Woko Lako la Malyero”

APO dada na mwana wake msepuka ŵali pafupi kujumpha msewu uwo mukwenda magalimoto ghanandi, dada wakuphalira mwana kuti: “Nikora ku woko.” Msepuka uyu wakuwona kuti ngwakuvikilirika ndiposo wakucita wofi yayi cifukwa cakuti adada ŵake ŵamukora pa woko. Kasi nyengo yinyake mukakhumbapo kuti munthu munyake wamovwirani pa nyengo ya masuzgo? Usange ni nthena, mungapembuzgika na mazgu agho ghakalembeka na Yesaya.—Ŵazgani Yesaya 41:10, 13.

Yesaya wakaphaliranga Ŵaisrayeli mazgu agha. Ciuta wakawonanga Ŵaisrayeli kuŵa ‘usambazi wake wapadera.’ Kweni mtundu uwu ukazingilizgika na ŵalwani. (Exodus 19:5) Kasi Ŵaisrayeli ŵakeneranga kucita wofi? Yehova wakatuma Yesaya kuti waŵaphalire uthenga wakukhozga. Apo tikusanda uthenga uwu, tikwenera kukumbuka kuti ukukhwaskaso awo ŵakusopa Ciuta mazuŵa ghano.—Ŵaroma 15:4.

Kasi awo ŵakusopa Yehova ŵakwenera kukhazga vici kwa iyo? Iyo wakuŵalayizga kuti: “Tindikufighilire na woko lane la malyero ilo ndakutonda vyose.” (Vesi 10) Iyo wakutiso: “Ine Yehova Ciuta wako, ndakukora ku woko lako la malyero.” (Vesi 13) Para mwapulika mazgu agha, kasi nchivici cikwiza mu maghanoghano ghinu? Buku linyake likuti: “Pakuwona mavesi ghaŵiri agha, tikughanaghanira za mupapi na mwana. [Dada] wakwimilira waka capatali kuti wavikilire mwana wake yayi, kweni wakuŵa nayo pafupi, ndipo wakukhumba yayi kulekana nayo.” Ghanaghanirani waka. Yehova wazomerezgenge yayi kuti ŵanthu ŵake ŵatalikirane nayo, nanga mpha nyengo iyo ŵakusuzgika comene.—Ŵahebere 13:5, 6.